တရုတ်ရှိ ၀ီဂါမွတ်စလင်များ အီးဒ်ပွဲတော် ဆင်နွှဲ

ဇူလိုင် ၂၀၊ ၂၀၁၅
M-Media

– တရုတ်နိုင်ငံ အနောက်မြောက်ပိုင်း ဇင်ဂျန်းကိုယ်ပိုင်အုပ်ချုပ်ခွင့်ရဒေသမှ ၀ီဂါလူမျိုး အစ္စလာမ်ဘာသာဝင်များမှာ ရမ်ဇာန်ဥပုသ်လအကုန်တွင် ကျရောက်သည့် အီဒွလ်ဖိသီရ် ၀ါကျွတ်အီးဒ်ပွဲတော်ကို စုပေါင်း ဆင်နွှဲခဲ့ကြသည်ဟု သိရသည်။

“ကျွန်တော်ပျော်ပါတယ်။ ဒီရက်တွေမှာ ဒါက ကျွန်တော်တို့ရဲ့ပွဲတော် ဖြစ်ပါတယ်။ ဒီဝတ်ပြုဆုတောင်းမှုမှာ လာရတာကို ကျွန်တော် ပျော်ပါတယ်။ ဒီပွဲတော်အတွက် ကျွန်တော် ပြင်ဆင်ခဲ့တာပါ။ အိမ်ကိုသန့်ရှင်းတယ်။ ပြီးတော့ အစားကောင်းအသောက်ကောင်းတွေနဲ့ အ၀တ်အစားအသစ်တွေကိုလည်း ၀ယ်ခဲ့ပါတယ်” ဟု ၀ီဂါမွတ်စလင်တစ်ဦးက CCTV.CN သို့ ယမန်နေ့တွင် ပြောကြားခဲ့သည်။

အီဒွလ်ဖိသီရ်မှာ အစ္စလာမ်ဘာသာဝင်တို့၏ အဓိက ဘာသာရေးပွဲတော် ၂ ခုအနက်မှ တစ်ခုဖြစ်ပြီး ၀တ်ပြုဆုတောင်းခြင်း၊ အလှူဒါနပြုခြင်း၊ မုန့်များလုပ်၍ ပတ်ဝန်းကျင်၊ ဆွေမျိုး မိတ်သင်္ဂဟများသို့ ဝေငှခြင်း၊ လူကြီးသူမများအား သွားရောက်တွေ့ဆုံ ဂါရ၀ပြုခြင်းတို့ကို ဆောင်ရွက်ရသည်။

ဇင်ဂျန်းပြည်နယ်မြို့တော် အူရွမ်ကီတွင် ၀ီဂါမွတ်စလင် ထောင်ပေါင်းများစွာမှာ အီးဒ်နေ့မနက်တွင် ၀တ်ပြုဆုတောင်းရန်အတွက် ဗလီဝတ်ကျောင်းတော်များသို့ သွားရောက် စုရုံးခဲ့ကြသည်။

အူရွမ်ကီရှိ သက်တမ်း နှစ် ၁၂၀ ရှိပြီဖြစ်သော ယန်ဟန် ဗလီဝတ်ကျောင်းတော်တွင် ၀တ်ပြုသူ ၁၁၀၀၀ ကျော် လာရောက်ခဲ့ကြပြီး ‘အီးဒ်မုဘာရက်’ ဟု ကျွေးကြော်ခဲ့ကြသည်။ အီးဒ်နေ့ ၀တ်ပြုဆုတောင်းမှုမှာ မိနစ် ၃၀ ခန့် ကြာမြင့်ပြီး အမျိုးသား၊ အမျိုးသမီးနှင့် ကလေးသူငယ်များပါ တက်ရောက်ခဲ့ကြသည်။

နွေခေါင်ခေါင်တွင် ကျရောက်ခဲ့သည့် ရမ်ဇာန်ဥပုသ်လအား အဆုံးသတ်သော အဆိုပါအီးဒ်နေ့တွင် ဟန်ယန်ဗလီဝတ်ကျောင်းတော်က ၀တ်ပြုရန် လာရောက်ကြသူများအား သစ်သီးနှင့် ဖျော်ရည်များကို ဝေငှခဲ့သည်။

“ရမ်ဇာန်ဟာ ကျွန်တော့်အတွက် မလွယ်ပါဘူး။ ရာသီဥတုက သိပ်ပူပါတယ်။ ဒါပေမယ့် နောက်ဆုံးတော့ အဆုံးသတ်သွားတာပါပဲ” ဟု ၀တ်ပြုရန်လာရောက်သူတစ်ဦးက ပြောကြားခဲ့သည်။

တရုတ်အာဏာပိုင်များမှာ ဇင်ဂျန်းပြည်နယ်ရှိ ၀ီဂါလူမျိုး အစ္စလာမ်ဘာသာဝင်များအား နှစ်စဉ် ရမ်ဇာန်ဥပုသ်လရောက်တိုင်း ဘာသာရေးဆိုင်ရာ ကန့်သတ်ချုပ်ချယ်မှုများကို ပြုလုပ်လေ့ရှိသည်။

ထို့ကြောင့် ကမ္ဘာတစ်ဝှမ်းမှ လူ့အခွင့်အရေးအဖွဲ့များနှင့် မွတ်စလင်အသင်းအဖွဲ့များက တရုတ်အစိုးရ၏ ထိုလုပ်ရပ်အား ဆန့်ကျင်ရှုတ်ချခဲ့ကြသည်။

Ref: Onislam