ခြေစမ်းပွဲအရှုံးက စမ်းသပ်မှုဖြစ်သည်ဟု မော်ရင်ဟိုပြော

ဇူလိုင် ၂၃၊ ၂၀၁၅
M-Media

– ရာသီကြိုခြေစမ်းပွဲတွင် နယူးယောက် ရဒ်ဘူးလ်အသင်းအား ၄ ဂိုး ၂ ဂိုးဖြင့် ရှုံးနိမ့်မှုမှာ တစ်ဖက်သတ် အနိုင်ရရှိခြင်းထက်ပို၍ အသင်းအတွက် အကျိုးရှိသည်ဟု ချယ်ဆီးနည်းပြ မော်ရင်ဟိုက ပြောကြားလိုက်သည်။

နိုင်ငံတကာ ချန်ပီယံဖလားပြိုင်ပွဲ အဖွင့်ပွဲစဉ်အဖြစ် ယမန်နေ့က ယှဉ်ပြိုင်ခဲ့သည့် အဆိုပါပွဲတွင် ချယ်ဆီးအသင်းမှာ အခွင့်အရေးများကို အသုံးမချနိုင်ခဲ့ဘဲ ထိုကဲ့သို့ ဂိုးပြတ်ဖြင့် ရှုံးနိမ့်ခဲ့ရခြင်း ဖြစ်သည်။

မိုရင်ဟိုကမူ ထိုအရှုံးက အသင်းအတွက် စမ်းသပ်မှုဖြစ်သည်ဟု ဆိုသည်။

“တကယ်လို့ ကျွန်တော်တို့ ၁၀ ဂိုးပြတ်နဲ့ နိုင်ရင်လည်း ဘာမှ ကောင်းသွားမှာမဟုတ်ပါဘူး။ ကျွန်တော်တို့ စမ်းသပ်မှုတစ်ခု လိုချင်ပြီး အဲဒီစမ်းသပ်မှုကို ရခဲ့ပါတယ်။ သူတို့ဟာ သွက်လက်တယ်၊ လျင်မြန်တယ်၊ လှုံ့ဆော်မှုကောင်းတယ်၊ ကျွန်တော်တို့နဲ့ ကစားရတာကို တော်တော်ပျော်ကြပါတယ်။ ကျွန်တော်တို့ထင်ထားတာထက်ပိုပြီး သူတို့က ပိုကောင်းခဲ့ပါတယ်” ဟု မော်ရင်ဟိုက ပွဲအပြီးတွင်
သတင်းထောက်များအား ပြောကြားခဲ့သည်။

ထိုပွဲတွင် ချယ်ဆီးမှာ ဒုတိယပိုင်း၌ ပိုမိုဆိုးရွားခဲ့ပြီး မော်ရင်ဟိုကမူ မိမိမှာ အင်္ဂလန်မှ အကောင်းဆုံးအသင်း၏ နည်းပြဖြစ်သည်ဟု ဆိုသည်။

“ကျွန်တော်ဟာ အင်္ဂလန်ရဲ့အကောင်းဆုံးအသင်းက နည်းပြတစ်ဦးပါ။ ကျွန်တော်တို့မှာ ထိပ်တန်းကစားသမားတွေရှိတယ်။ အကွဲအပြဲလည်းမရှိပါဘူး။ ခြောက်ရက်မှာ လေ့ကျင့်ခန်း ၁၁ ကြိမ်လောက် ကျွန်တော်တို့ လုပ်ခဲ့ပါတယ်။ ကစားသမားတွေကို ကျွန်တော်ယုံပါတယ်။ ဒီအသင်းနဲ့ ၁၀ ပွဲကစားရင် ကျွန်တော်တို့ ၉ ပွဲ နိုင်ပါတယ်”

ချယ်ဆီးမှာ ဒုတိယပွဲစဉ်အဖြစ် ပီအက်စ်ဂျီအသင်းနှင့် စနေနေ့တွင် ကစားရမည်ဖြစ်သည်။

Ref: Goal