ဘာသာပေါင်းစုံ ညီညွတ်ရေး အထောက်အကူဖြစ်ရန် ရည်ရွယ်ပြုလုပ်တဲ့ ရန်ကုန်က အီးဒ် မိတ်ဆုံစားပွဲ

ဇူလိုင် ၂၆၊ ၂၀၁၅
M-Media
သတင်း/ဓါတ်ပုံ- မိုးစက်

အီးဒ်မိတ်ဆုံစားပွဲသို့ တက်ရောက်လာသည့် ပရိတ်သတ်များ

ရန်ကုန်။    ။ မြန်မာမွတ်စလင်စီးပွားရေး လုပ်ငန်းရှင်များအဖွဲ့မှ ဦးဆောင်ပြုလုပ်တဲ့ ၂၀၁၅ ခုနှစ် အီးဒ်မိတ်ဆုံစားပွဲ အခမ်းအနားတရပ်ကို ဇူလိုင်လ ၂၅ ရက်နေ့က ရန်ကုန်မြို့ Strand Hotel မှာ ကျင်းပပြုလုပ်ခဲ့ပါတယ်။

အခုလို နယ်ပယ်အသီးသီးကလူတွေနဲ့ မိတ်ဆုံစားပွဲကျင်းပတာဟာ ဘာသာပေါင်းစုံချစ်ကြည်ညီညွတ်ရေး အတွက် အထောက်အကူပြုချင်လို့ပါ အားဖြည့်ပေးချင်တဲ့အတွက်ကြောင့် ကျင်းပရခြင်းဖြစ်ပါတယ်လို အငြိမ်းစား သံအမတ်ကြီး ဒေါက်တာဦးလှမောင်က အမှာစကားပြောကြားစဉ်မှာ ထည့်သွင်းပြောကြားခဲ့ပါတယ်။

အလ်ဟာဂ်ျဦးအေးလွင် ဦးဆောင်ရေးမှူး (အစ္စလာမ့်ဓမ္မဗိမာန်) မှ အမှာစကားပြောကြားစဉ်

အစ္စလာမ် ဘာသာရေးခေါင်းဆောင် အလ်ဟာဂ်ျဦးအေးလွင် ဦးဆောင်ရေးမှူး (အစ္စလာမ့်ဓမ္မဗိမာန်)မှလည်း “ကျွန်တော်တို့တွေ မတူခြင်းဟာ အပြစ်မဟုတ်ပါဘူး။ မတူခြင်းဆိုတာ ရှိပေမယ့်လည်း ကျွန်တော်တို့မှာ တူတာတွေရှိ ပါတယ်။ မြန်မာနိုင်ငံမှာ နှစ်ပေါင်းထောင်နဲ့ ချီပြီး ဘာသာပေါင်းစုံ ချစ်ကြည်စွာနေလာနိုင်ခြင်းသည် မြန်မာတိုင်း ဂုဏ်ယူရမဲ့ ကိစ္စပါ။ လူမျိူးခြား ဘာသာခြားဆိုပြီး စိမ်းစိမ်းကားကားမနေကြဘဲ မတူမှုဆိုတာ ညီနောင်များဖြစ်တယ်ဆိုတာကို သဘောပေါက်ရင် မြန်မာ့ အလှလေးကပိုပြီး ထွန်းတောက်လာမှာပါ”။ ဟု ဘာသာပေါင်းစုံ ချစ်ကြည်ရေးနှင့် ပတ်သတ်ပြီး ပြောခဲ့ပါတယ်။

” အဖွင့်မှာ ရွတ်ဖတ်သွားတဲ့ ကျမ်းမြတ်ကုရ်အာန်ရဲ့ အဓိပ္ပါယ်ကို နားမလည်သော်လည်း နားထောင်ရသည်မှာ ရင်ထဲ နှလုံးသားအထိ ခံစားမိပါတယ်။” လို့ ပြောကြားခဲ့တာကတော့ အမျိုးသားဒီမိုကရေစီအဖွဲ့ချုပ်မှ နာယက သူရ ဦးတင်ဦးဖြစ်ပါတယ်။

ရန်ကုန်တိုင်း ဝန်ကြီးချုပ် ဦးမြင့်ဆွေမှ အမှာစကားပြောကြားနေစဉ်

“ယုံကြည်ရာဘာသာများကို သူ့အလိုက်ကျင်းပနေကြခြင်း ရိုးရာဘာသာရေးပွဲတော်တွေကို ကျင်းပလျှက်ရှိကြပါတယ်။ အစ္စလာမ်သာသာဝင်တွေရဲ့ ဥပုသ်လဟာဆိုရင် တခြားလတွေထက်ပိုပြီး ထူးထူးခြားခြားပြုမှု ရကြောင်း သိရပါတယ်။ မကောင်းမှု ဒုစရိုက်တွေကိုလည်း တခြားလတွေထက် ပိုပြီး ရှောင်ရှားကြရပါတယ်။ အစ္စလာမ်သာသာဝင်တွေရဲ့ ဥပုသ်စောင့်ထိန်းရတဲ့ ရည်ရွယ်ချက်တွေကို လေ့လာကြည့်ရင်လဲ အလ္လာဟ်အရှင်မြတ်ရဲ့ အမိန့်တော်တွေကို နာခံခြင်းဖြစ်ပါတယ်” လို့ ရန်ကုန်တိုင်းဒေသကြီး အစိုးရအဖွဲ့ ဝန်ကြီးချုပ် ဦးမြင့်ဆွေကလည်း အီးဒ်အထိမ်းအမှတ် စကားများ ပြောကြားခဲ့ပါတယ်။

အဆိုပါ ဘာသာပေါင်းစုံ အီးဒ်မိတ်ဆုံစားပွဲသို့  အမျိုးသားဒီမိုကရေစီအဖွဲ့ချုပ်မှ နာယက သူရ ဦးတင်ဦး၊ ရန်ကုန်တိုင်းဒေသကြီး လွှတ်တော်ဥက္ကဌ၊ ရန်ကုန်တိုင်းဒေသကြီး လူမှုရေးဝန်ကြီး ဒေါက်တာမြင့်သိန်း အစိုးရအဖွဲ့ဝင်ဝန်ကြီးများ၊ သံရုံးအသီးသီးမှ တာဝန်ရှိပုဂ္ဂိုလ်များ၊ မြန်မာနိုင်ငံ ဘာသာပေါင်းစုံ ချစ်ကြည်ရေးအဖွဲ့၊ မြန်မာနိုင်ငံ လူ့အခွင့်အရေးကော်မရှင် ဥက္ကဌ၊ ဘာသာအသီးသီးမှ ဘာသာရေးခေါင်းဆောင်များ၊ နယ်ပယ်အသီးသီးမှ လူ့အဖွဲ့အစည်းများ တက်ရောက်ခဲ့ကြပါတယ်။

ထို မြန်မာမွတ်စလင် စီးပွားရေး လုပ်ငန်းရှင်များအဖွဲ့မှ ကြီးမှူး ကျင်းပသော  ဘာသာပေါင်းစုံ အီးဒ်မိတ်ဆုံစားပွဲကို ယခုအကြိမ်တွင် လေးကြိမ်မြောက်ကျင်းပခဲ့ခြင်း ဖြစ်ပါတယ်။

သံအမတ်ကြီး (အငြိမ်းစား) ဦးလှမောင်မှ အမှာစကားပြောကြားနေစဉ်

အီးဒ်မိတ်ဆုံစားပွဲတွင် တွေ့ရသည့် ဘောလိဝုဒ် မင်းသမီး လိုင်လာခန်း

၈၈ ပွင်လင်းလူ့အဖွဲ့အစည်းမှ ဦးမြအေးနှင့် ဦးကိုကိုကြီး

အီးဒ်မိတ်ဆူံစားပွဲသို့ တက်ရောက်လာသည့် သံတမန်များ

အီးဒ်မိတ်ဆုံစားပွဲသို့တက်ရောက်လာသည့် ဘာသာပေါင်းစုံအဖွဲ့များ