အကျိုးအမြတ် တစ်စုံတစ်ရာ မမျှော်မှန်းဘဲ ပြုလုပ်တဲ့ မ.မ.လ အဖွဲ့ရဲ့ (၁၈) ကြိမ်မြောက် သွေးလှူဒါန်းပွဲ

ဇူလိုင် ၂၆၊ ၂၀၁၅
M-Media
သတင်း/ဓါတ်ပုံ- မိုးစက်

ရန်ကုန်။        ။ အကျိုးအမြတ် တစ်စုံတစ်ရာကို မျှော်မှန်းရည်မှန်းပြီး သွေးလှူဒါန်းပွဲ ကျင်းပရခြင်း မဟုတ်ပါဟု မြန်မာနိုင်ငံလုံး ဆိုင်ရာ မြန်မာ မွတ်စလင်(မ်) လူငယ်များ (ဘာသာရေး) အဖွဲ့မှ အမျိုးသမီးရေးရာ ဌာနမှူး ဒေါ်ချိုက ဒီကနေ့ပြုလုပ်တဲ့ မမလ ဌာနချုပ် က ဦးဆောင်တဲ့ (၁၈) ကြိမ်မြောက် သွေးလှူဒါန်းပွဲမှာ ပြောကြားခဲ့ပါသည်။

“ဒီနေ့သွေးလှူလိုက်ပြီး နောက်တစ်ချိန် ကိုယ်သွေးပြန်လိုတဲ့ အချိန်ကျ သွေးပြန်ရပါစေတော့ ဆိုတော့ စိတ်ဓာတ်မျိုးနဲ့ သွေးလှူဒါန်း ပွဲလုပ်နေရခြင်း မဟုတ်ပါဘူး။ လိုအပ်တဲ့နေရာမှာ လိုသလိုသုံးနိုင်အောင်ပါ။ ဒီနေ့ ဒီမှာလာလှူကြတဲ့ လူတွေအားလုံးက စိတ်ထားချင်းတူလို့ ဒီနေရာကို ရောက်လာတာပါ” ဟု ၄င်းကဆက်လက်ပြောဆိုခဲ့သည်။

အဆိုပါသွေးလှူးဒါန်းတွင် ဘာသာပေါင်းစုံမှ လူများ ပါဝင် လှူဒါန်းခဲ့ကြပြီး လှူဒါန်းခဲ့ကြသော သွေးများကို သွေးလိုအပ်နေသော မည်သည့် ဘာသာဝင်မဆို လူသားဝါဒနှင့်သာ လိုအပ်သည့်သွေးများကို ကူညီမည်ဖြစ်ကြောင်း မမလ ဌာနချုပ်မှ တာဝန်ရှိသူတစ်ဦးက ဆိုခဲ့သည်။

မမလ ဌာနချုပ်မှ ပြုလုပ်သော (၁၈) ကြိမ်မြောက် သွေးလှူဒါန်းပွဲတွင် ယခင်အကြိမ်များထက် လူဦးရေ လျော့နည်းသွားကြောင်းလဲ သိရသည်။ အစ္စလာမ်ဘာသာဝင်တို့၏ ဥပုသ်လသည်လည်း မကြာသေးမီ ရက်များအတွင်းကမှ ပြီးဆုံးခဲ့သည်ဖြစ်သောကြောင့် လှူဒါန်းမည့် ပုဂ္ဂိုလ်များ အားနည်းနေသောကြောင့် ယခုတစ်ကြိမ်တွင် ယခင်အကြိမ်များထက် လူနည်းနေရခြင်းဖြစ်ကြောင်း မမလမှ တာဝန်ရှိသူတစ်ဦးက သုံးသပ်ပြောဆိုခဲ့သည်။

(၁၈) ကြိမ်မြောက် လှူဒါန်းသော သွေးလှူဒါန်းပွဲတွင် လူဦးရေ (၁၀၀) ကျော်သာ လှူဒါန်းခဲ့သည် ဖြစ်သည်။ မမလ ဌာနချုပ်မှ ဦးစီးပြီး လေးလတစ်ကြိမ် အဖြစ် ရန်ကုန်မြို့ အမျိုးသားသွေးလှူ ဘဏ်ဌာနတွင် လှူဒါန်းလျှက်ရှိရာ ယခုတစ်ကြိမ်နှင့်ဆိုလျှင် လူပေါင်း (၃၉၀၀) ကျော်လှူဒါန်းနိုင်ခဲ့ပြီး ဖြစ်ပါသည်။