နိုင်ငံတကာသတင်းတို (သြဂုတ် ၁၊ ၂၀၁၅)

သြဂုတ် ၁၊ ၂၀၁၅
M-Media

ပျောက်ဆုံး မလေးလေယာဉ်မှဟု ယူဆရသည့် အစိတ်အပိုင်း ပြင်သစ်သို့ ရောက်ရှိ
…………………………….
အိန္ဒိယသမုဒ္ဒရာအတွင်းရှိ ပြင်သစ်ပိုင် ရီယူနီယံကျွန်းတွင် တွေ့ရှိခဲ့ရပြီး ပြီးခဲ့သည့်နှစ်မတ်လက ပျောက်ဆုံးသွားခဲ့သည့် မလေးရှားလေကြောင်းလိုင်း၏ MH370 မှဟု ယူဆရသော လေယာဉ်တောင်ပံ အစိတ်အပိုင်းတစ်ခုမှာ စမ်းသပ်စစ်ဆေးမှုများ ပြုလုပ်ရန်အတွက် ပြစ်သစ်နိုင်ငံ တူးလော့စ်မြို့သို့ ယနေ့တွင် ရောက်ရှိလာခဲ့သည်။ အဆိုပါ အပိုင်းအစမှာ ဘိုးအင်း ၇၇၇ မှ အစိတ်အပိုင်းဖြစ်မည်ဟု ကျွမ်းကျင်သူများက ဟောကိန်းထုတ်ထားကြပြီး ထိုအမျိုးအစားမှာ MH370 ၏ လေယာဉ်အမျိုးအစားလည်း ဖြစ်သည်။ စစ်ဆေးမှုများကို လာမည့်သီတင်းပတ်တွင် ပြုလုပ်သွားမည်ဖြစ်သည်။

ဂျပန်တွင် အပူလှိုင်းကြောင့် လူ ၃ ဦးသေဆုံး
………………………..
ဂျပန်နိုင်ငံတွင် ကျရောက်နေသည့် အပူလှိုင်းကြောင့် ယနေ့တွင် လူ ၃ ဦး သေဆုံးခဲ့ပြီး ၁၆၀၀ ကျော်ကို ဆေရုံများသို့ တင်ပို့ခဲ့ရသည်။ အပူလှိုင်းဒဏ်ကို တစ်နိုင်ငံလုံး ခံစားရခြင်းဖြစ်ပြီး အချို့ဒေသများတွင် အပူချိန်မှာ ၃၉ ဒီဂရီ ဆဲလ်စီးယက်စ်အထိ ရှိနေသည်။ ဆေးရုံတင်ထားရသူများတွင် ၁၂ ဦးမှာ စိုးရိမ်စရာကောင်းသည့် အခြေအနေ ရှိနေသည်။ အပူလှိုင်းမှာ ဇူလိုင်လ အစောပိုင်းကတည်းက ဂျပန်နိုင်ငံသို့ ၀င်ရောက်ခဲ့ခြင်းဖြစ်ပြီး ပြည်သူများအနေဖြင့် နေရိပ်သောနေရာတွင် နေထိုင်ရန်၊ ဓာတ်ဆားရည်နှင့် အေးသော အရည်များသောက်ရန် ဆရာဝန်များက ညွှန်ကြားထားသည်။ ပြီးခဲ့သည့်နှစ် အပူလှိုင်းအတွင်း ဂျပန်နိုင်ငံတွင် လူ ၃၀ သေဆုံးခဲ့ကာ ၃၅၀၀၀ ခန့် ဆေးကုသမှု ခံယူခဲ့ရသည်။

ဗင်နီဇွဲလားတွင် စူပါမားကတ်များအား ပြည်သူများ ၀င်လု
………………………………….
ဆန်၊ နို့နှင့် ဂျုံအပါအ၀င် အဓိက စားသောက်ကုန်ပစ္စည်းများ ရှားပါးမှုကြောင့် ဗင်နီဇွဲလားနိုင်ငံ အရှေ့တောင်ပိုင်း စီအူဒက်မြို့ရှိ စူပါမားကတ်များတွင် ယမန်နေ့က လုယက်မှုများ ဖြစ်ပွားခဲ့ပြီး ရဲတပ်ဖွဲ့ဝင်များ၏ နှိမ်နှင်းမှုအတွင်း ၁ ဦးသေဆုံးခဲ့ကာ ဒါဇင်နှင့်ချီ၍ အဖမ်းခံခဲ့ရသည်။ သမ္မတ နီကိုလက်စ် မာဒူရိုကမူ အဆိုပါ မငြိမ်မသက်ဖြစ်မှု၏ နောက်ကွယ်တွင် အမေရိကန်ပါဝင်သည်ဟု
ဆိုသည်။ အမေရိကန် တောင်ပိုင်းစစ်ဌာနချုပ်မှ တပ်မှူး ဗိုလ်ချုပ် ဂျွန်ကဲလီက ဗင်နီဇွဲလားနိုင်ငံတွင် ဇူလိုင်လ၌ လူမှုရေးဆိုင်ရာ မတည်မငြိမ်ဖြစ်မည်ဟု ဖေဖော်ဝါရီလက ပြောကြားမှုကို ကိုးကား၍ မာဒူရိုက ထိုကဲ့သို့ စွပ်စွဲခဲ့ခြင်းဖြစ်သည်။

Ref: News Agencies