ဘီဘာအိုအရှုံးအတွက် ဆင်ခြေပေး၍မရဟု ဘာကာနောက်ခံလူပြော

သြဂုတ် ၁၈၊ ၂၀၁၅
M-Media

– စပိန်စူပါဖလားတွင် ဘီဘာအိုအသင်းအား ရှုံးနိမ့်ခဲ့မှုအတွက် အသင်းမှာ မည်သည့်ဆင်ခြေမှ ပေး၍မရဟု ဘာစီလိုနာအသင်း၏ ၀ါရင့်နောက်ခံလူ ဒန်နီ အဲလ်ဗက်စ်က ပြောကြားလိုက်သည်။

ပြီးခဲ့သည့်တစ်ပတ် ပထမအကျာ့ အဝေးကွင်းတွင် ၄ ဂိုးပြတ်ဖြင့် အရှက်တကွဲ ရှုံးနိမ့်ခဲ့ရသည့် ဘာစီလိုနာအသင်းမှာ ယနေ့နံနက်က ကစားခဲ့သည့် ဒုတိယအကျော့ ပထမပိုင်းတွင် မက်ဆီ၏ဂိုးဖြင့် ဦးဆောင်နိုင်ခဲ့သော်လည်း နောက်ခံလူ ပီကေး အထုတ်ခံရမှုနှင့်အတူ ချေပဂိုး ပြန်ပေးလိုက်ရကာ ၁ ဂိုးစီ သရေကျခဲ့ပြီး နှစ်ကျော့ပေါင်း ၅ ဂိုး ၁ ဂိုးဖြင့် ရှုံးနိမ့်ခဲ့ရသည်။

“နှစ်ပွဲစလုံးမှာ ကျွန်တော်တို့ လုံလောက်အောင် မဆောင်ရွက်နိုင်ခဲ့တာ ဖြစ်ကောင်းဖြစ်နိုင်ပါတယ်။ ပြီးတော့ ကျွန်တော်တို့တတ်နိုင်သလောက် မာမာကျောကျော မယှဉ်ပြိုင်နိုင်ခဲ့တာလည်း ဖြစ်ကောင်းဖြစ်နိုင်ပါတယ်။ ဥရောပစူပါဖလားပွဲအတွက် ကျွန်တော်တို့ ပေးဆပ်လိုက်ရတာပါ။ ပြီးတော့ ပြင်ဆင်ချိန် ကောင်းကောင်းလည်း မရခဲ့ပါဘူး။ ဒါမျိုးတွေရှိပေမယ့် ဆင်ခြေပေးလို့တော့ မရပါဘူး” ဟု အဲလ်ဗက်စ်က သတင်းထောက်များအား ပြောကြားခဲ့သည်။

နောက်ခံအလယ်လူ ပီကေးမှာ ၅၆ မိနစ်တွင် တိုက်ရိုက်အနီကဒ်ဖြင့် ထုတ်ပယ်ခြင်း ခံခဲ့ရပြီး အဲလ်ဗက်စ်ကမူ ပီကေးအထုတ်ခံခဲ့ရခြင်းက အသင်း၏ အခွင့်အလမ်းများကို ထိခိုက်သွားစေခဲ့သည်ဟု ပြောကြားခဲ့သည်။

“အခြေအနေနဲ့ပတ်သက်ပြီး ပီကေးကတော့ ပေါက်ကွဲခဲ့ပါတယ်။ ကျွန်တော်တို့ကို ပျက်ဆီးစေတဲ့ ဆုံးဖြတ်ချက်မျိုး ဒိုင်လူကြီးက ချခဲ့တာပါ။ ဒါပေမယ့် ဒီအတွက်လည်း ဆင်ခြေပေးလို့ မရပါဘူး”

Ref: Goal