အရှေ့တောင်အာရှရှိ ရေဘေးသင့်ပြည်သူများအတွက် ကူညီပေးရန် အဖွဲ့ဝင်နိုင်ငံများအား အိုအိုင်စီ တိုက်တွန်း

သြဂုတ် ၁၉၊ ၂၀၁၅
M-Media

– မြန်မာနိုင်ငံအပါအ၀င် ရေးဘေးဒဏ်ခံစားခဲ့ရသော အာရှနိုင်ငံများအတွက် ထပ်တူထပ်မျှ ၀မ်းနည်းကြေကွဲရသည်ဟု အစ္စလာမ့်မစ်နိုင်ငံများ ပူးပေါင်းဆောင်ရွက်ရေးအဖွဲ့က ပြောကြားလိုက်ပြီး အဖွဲ့ဝင်နိုင်ငံများအနေဖြင့်လည်း ရေဘေးသင့်ပြည်သူများအား ကူညီဖေးမမှုများပြုလုပ်ရန် တိုက်တွန်းခဲ့သည်။

အဆိုပါ ၀မ်းနည်းကြောင်း ပြောကြားမှုကို အိုအိုင်စီ၏ ၀ဘ်ဆိုက်စာမျက်နှာတွင် သြဂုတ်လ ၁၇ ရက်နေ့စွဲဖြင့် လွှင့်တင်ထားခြင်းဖြစ်ပြီး မြန်မာ၊ ဘင်္ဂလားဒေ့ရှ်၊ ပါကစ္စတန်၊ အိန္ဒိယနှင့် အရှေ့တောင်အာရှနိုင်ငံများတွင် ဆိုက်ကလုန်းကိုမန်းနှင့် မိုးသည်းထန်စွာ ရွာသွန်းမှုများကြောင့် ဖြစ်ပွားခဲ့သော ရေကြီးရေလျှံမှုများမှ ဖြစ်လာသည့် အကျိုးဆက်များတွက် အလွန်အမင်းစိုးရိမ်မိကြောင်း ရေးသားဖော်ပြထားသည်။

ထို့ပြင် အိုအိုင်စီ အထွေထွေအတွင်းရေးမှူး အီယဒ် အေမင် မာဒန်က ရေဘေးအတွင်း ကွယ်လွန်သေဆုံးသွားသူများနှင့် ရေဘေးသင့်ပြည်သူများအတွက် မိမိတို့မှာ ထပ်တူထပ်မျှ ၀မ်းနည်းကြေကွဲရသည်ဟု ပြောကြားခဲ့ပြီး၊ အိုအိုင်စီအဖွဲ့ဝင်နိုင်ငံများ၊ နိုင်ငံတကာနှင့် ဒေသတွင်း လူသားချင်းစာနာထောက်ထားမှုဆိုင်ရာ အဖွဲ့အစည်းများ၊ အန်ဂျီအိုအဖွဲ့ဝင်များအနေဖြင့် အဆိုပါ
ရေဘေးသင့်ပြည်သူများအတွက် ကူညီထောက်ပံ့မှုများ ပြုလုပ်ရန်လည်း တိုက်တွန်းခဲ့သည်။

အိုအိုင်စီမှာ ကမ္ဘာတစ်ဝှမ်းမှ အစ္စလာမ်ဘာသာဝင်အများစုရှိရာ နိုင်ငံ ၅၇ နိုင်ငံဖြင့် ဖွဲ့စည်းထားသည့် အဖွဲ့ဖြစ်ပြီး ကုလသမဂ္ဂပြီးနောက် နိုင်ငံအများအပြားဖြင့် ဖွဲ့စည်းထားသည့် ဒုတိယအကြီးဆုံး အဖွဲ့လည်းဖြစ်သည်။

Ref: OIC’s website