ရေနံသူခိုးများကို ဒရုန်းလေယာဉ်ဖြင့် နိုက်ဂျီးယား စောင့်ကြည့်သွားမည်

စက်တင်ဘာ ၂၊ ၂၀၁၅
M-Media

– ရေနံခိုးယူမှုကို တိုက်ဖျက်ရန် ဆောင်ရွက်ချက်အဖြစ် နိုင်ငံ၏ရေလမ်းကြောင်းများတွင် သင်္ဘောများ လှုပ်ရှားသွားလာမှုကို ဒရုန်းများဖြင့် စောင့်ကြည့်သွားမည်ဟု နိုက်ဂျီးရီးယား နိုင်ငံပိုင် ရေနံကုမ္ပဏီ NNPC က ပြောကြားလိုက်သည်။

ဂီနီပင်လယ်ကွေ့ လုံခြုံရေးနှင့်ပတ်သက်၍ ယမန်နေ့က ပြုလုပ်ခဲ့သော အထူးညီလာခံတစ်ခုတွင် နိုက်ဂျီးရီးယား ရေနံကော်ပိုရေးရှင်း NNPC မှ မန်းနေးဂျင်းဒါရိုက်တာ အီဘေး ကာချစ်ဝူက ထိုကဲ့သို့ ပြောဆိုလိုက်ခြင်းဖြစ်သည်။

“ကျွန်တော်တို့ရဲ့ ရေပိုင်နက်အတွင်းမှာ သင်္ဘောတွေ လှုပ်ရှားမှုကို စစ်ဆေးဖို့ စစ်သင်္ဘောအုပ်စုတွေနဲ့ စောင့်ကြည့်တဲ့နည်းလမ်းကို ဆောင်ရွက်သွားမှာဖြစ်ပြီး အဲဒီမှာ ဒရုန်းလေယာဉ်တွေရဲ့ ပူးပေါင်းဆောင်ရွက်မှုလည်း ပါဝင်မှာပါ” ဟု NNPC က တရားဝင်ထုတ်ပြန်ခဲ့သော ကြေညာချက်တွင် ဖော်ပြထားသည်။

ထို့ပြင် ပတ္တယောင်လှည့်ရန်အတွက် နိုက်ဂျီးရီးယားရေတပ်တွင် ပစ္စည်းကိရိယာ မပြည့်စုံမှုကို ကူညီသွားရန်လည်း ကြိုးစားနေသည်ဟု ၎င်းက ထပ်လောင်းပြောကြားခဲ့သည်။ ထိုဆောင်ရွက်ချက်ဖြင့် လာမည့် ၈ လအတွင်း ရေနံခိုးယူသူများကို အဆုံးသတ်သွားရန် မျှော်လင့်သည်ဟု NNPC ၏ ကြေညာချက်တွင် ထည့်သွင်းဖော်ပြထားသည်။

ကာချစ်ဝူကမူ ရေနံသူခိုးများကို စစ်ဆေးမှု မရှိပါက နိုင်ငံ၏ ရေနံသန့်စင်စက်ရုံ ၄ ခုကို လည်ပတ်ရန်မှာ NNPC အတွက် မဖြစ်နိုင်ဟု ထည့်သွင်းပြောကြားခဲ့သည်။

နိုက်ဂျီးရီးယား နိုင်ငံတစ်ဝှမ်းရှိ ရေနံပိုက်လိုင်းများတွင် ၂၀၁၄ ခုနှစ် ဇွန်လမှ ၂၀၁၄ ခုနှစ် ဇွန်လအထိ တိုက်ခိုက်မှုပေါင်း ၄၀၀၀ ခန့် ဖြစ်ပွားခဲ့ပြီး၊ လွန်ခဲ့သည့် ၃ နှစ်အတွင်း NNPC အလုပ်သမား၊ ရဲတပ်ဖွဲ့ဝင်နှင့် ပြည်သူ စုစုပေါင်း ၃၅၀ ခန့်မှာ ရေနံသူခိုးများ၏ သတ်ဖြတ်မှုများကြောင့် သေဆုံးခဲ့ရသည်။

ထိုကဲသို့ ရေနံခိုးယူသူများကို နှိမ်နှင်းရန် အစိတ်အပိုင်းတစ်ခုအဖြစ် နိုင်ငံတကာအသိုင်းအ၀ိုင်း၏ အကူအညီကိုလည်း နိုက်ဂျီးရီးယားက ရယူသွားမည်ဖြစ်ပြီး အထူးသဖြင့် ခိုးယူထားသော ရေနံများ ပို့ဆောင်သည့် ကုန်တင်သင်္ဘောများကို လက်ခံသည့် နိုင်ငံများဖြစ်သည်။ နိုက်ဂျီးရီးယား နိုင်ငံခြားငွေရရှိမှု၏ ၉၀ ရာခိုင်နှုန်းမှာ ရေနံလုပ်ငန်းမှ ရရှိခြင်းဖြစ်သည်။

Ref: Aljazeera