အရှေ့အလယ်ပိုင်းမှ ဒုက္ခသည် ၁၂၀၀၀ ကို သြစတေးလျ ထပ်မံလက်ခံမည်

စက်တင်ဘာ ၉၊ ၂၀၁၅
M-Media

– ဆီးရီးယားရှိ IS အဖွဲ့၏ ပစ်မှတ်များကို ရက်ပိုင်းအတွင်း မိမိတို့က လေကြောင်းမှ တိုက်ခိုက်သွားမည်ဟု သြစတေးလျက ကြေညာလိုက်ပြီး အရှေ့အလယ်ပိုင်းမှ ဒုက္ခသည် ၁၂၀၀၀ ကိုလည်း ထပ်မံလက်ခံသွားမည်ဟု ဆိုသည်။

ဝန်ကြီးချုပ် တိုနီအက်ဘော့က ယနေ့တွင် ထိုကဲ့သို့ ကြေညာခဲ့ခြင်းဖြစ်ပြီး မိမိတို့အစိုးရမှာ ဂျော်ဒန်၊ လက်ဘနွန်နှင့် တူရကီရှိ ဒုက္ခသည်စခန်းများမှ ဆီးရီးယား၊ အီရတ် ဒုက္ခသည် ၂၄၀၀၀၀ အား ထောက်ပံ့ကူညီရန်အတွက် ကန်ဒေါ်လာ ၃၁ သန်းကို ထပ်မံပေးအပ်သွားမည်ဟု ထည့်သွင်းပြောကြားခဲ့သည်။

အက်ဘော့မှာ တနင်္ဂနွေနေ့က နိုင်ငံ၏ နှစ်စဉ်လက်ခံနေကြဖြစ်သော ဒုက္ခသည်အရေအတွက် ၁၃၇၅၀ ဦးတွင် ဆီးရီးယားမှ တိုက်ခိုက်မှုများကြောင့် ထွက်ပြေးလာသည့် ဒုက္ခသည်များကို ပို၍ ထည့်သွင်းပေးမည်ဟု ပြောကြားခဲ့သည်။ သို့သော်လည်း အရေအတွက်အားလုံး မဟုတ်သည့်အတွက် ဝေဖန်မှုများ ခံခဲ့ရသည်။

အတိုက်အခံ လေဘာပါတီကမူ အဓိကထား ဝေဖန်ခဲ့ပြီး ဆီးရီးယားမှ ဒုက္ခသည် ၁၀၀၀၀ ခန့်ကို နေရာချထားပေးရန် တောင်းဆိုခဲ့သည်။ ယနေ့တွင် အက်ဘော့က ၁၂၀၀၀ လက်ခံမည်ဟု ကြေညာခဲ့ပြီးနောက် အတိုက်အခံခေါင်းဆောင် ဘီလ်ရှော့တန်က ထိုဆုံးဖြတ်ချက်ကို ပါတီနှစ်ခုစလုံးက ထောက်ခံသည်ဟု ပြောကြားခဲ့သည်။

သြစတေးလျအစိုးရမှာ ဒုက္ခသည်များမှ အမျိုးသမီးများ၊ ကလေးများနှင့် မိသားစုများကို ဦးစားပေးသွားမည်ဖြစ်သည်။

ဝန်ကြီးချုပ် အက်ဘော့က အီရတ်၌ IS အား လေကြောင်းမှ တိုက်ခိုက်မှုတွင် ပါဝင်နေသည့် မိမိတို့မှာ ဆီးရီးယားရှိ IS ပစ်မှတ်များကိုလည်း လာမည့်ရက်အတွင်း တိုးချဲ့တိုက်ခိုက်သွားမည်ဟု ထည့်သွင်းကြေညာခဲ့သည်။

“ဒီလူသတ်သမားတွေကို သုတ်သင်တာဟာ အရှေ့အလယ်ပိုင်းမှာ လူသားချင်းစာနာထောက်ထားမှုဆိုင်ရာ ပြဿနာတွေ အဆုံးသတ်သွားဖို့တင် မဟုတ်ပါဘူး။ သြစတေးလျနဲ့ ကမ္ဘာတစ်ဝှမ်း ခြိမ်းခြောက်နေမှုကို အဆုံးသတ်သွားဖို့လည်း ဖြစ်ပါတယ်” ဟု အက်ဘော့က ပြောကြားခဲ့သည်။

Ref: Aljazeera