ဥရောပသို့ လူကုန်ကူးသူများကို စစ်ရေးဖြင့် တစ်ဆင့်တက် နှိမ်နင်းတော့မည်

စက်တင်ဘာ ၁၄၊ ၂၀၁၅
M-Media

– မြေထဲပင်လယ်အတွင်း လူကုန်ကူးသူများအား စစ်ရေးအရ အရေးယူခြင်း ဒုတိယအဆင့် တိုးမြှင့်ဆောင်ရွက်ရန် ဥရောပသမဂ္ဂက အတည်ပြုလိုက်ပြီဟု AFP သတင်းဌာနက ယနေ့တွင် ဖော်ပြခဲ့သည်။

ပြောင်းရွှေ့အခြေချသူများအား တရားမ၀င် ပို့ဆောင်သူ သို့မဟုတ် လူကုန်ကူးသူများ အသုံးပြုနေသော၊ သို့မဟုတ် အသုံးပြုနေသည်ဟု သံသယရှိသော သင်္ဘောများနှင့် အထောက်အပံ့ပစ္စည်များကို ရှာဖွေ၊ ဖမ်းဆီး၊ ဖယ်ရှားရန်အတွက် ဥရောပမှာ ဇွန်လအတွင်းက “မြေထဲပင်လယ်ဒေသ ဥရောပရေတပ်” EUNAVFOR Med ကို စတင်ဖွဲ့စည်း ဆောင်ရွက်ခဲ့သည်။

ယခုကဲ့သို့ ဒုတိယအဆင့်ကို အတည်ပြုခဲ့ခြင်းအတွက် အဆိုပါရေတပ်မှာ မြေထဲပင်လယ်အတွင်းရှိ သံသယရှိသော သင်္ဘောများကို ရပ်တန့်ခွင့် ရမည်ဖြစ်ပြီး လိုအပ်ပါက ပြောင်းရွှေ့ အခြေချသူများအား တရားမ၀င် သယ်ဆောင်လေ့ရှိသော သင်္ဘောများကို ဖျက်ဆီးခွင့်ရမည်ဖြစ်သည်။

အာဏာပိုင်များကလည်း စစ်ဖြစ်ပွားနေသော လစ်ဗျားရှိ လူကုန်ကူးကွန်ယက်များကို ဖြိုခွဲရန်အတွက် ၎င်းတို့၏ သင်္ဘောများအား ရှာဖွေဖျက်ဆီးခြင်းကို ဆောင်ရွက်ရန် စီစဉ်နေပြီဖြစ်သည်။

ဒုတိယအဆင့် စစ်ဆင်ရေး လုပ်ငန်းအသစ် ဆောင်ရွက်ရန်အတွက် အခြေအနေများအားလုံး ပြည့်မီနေပြီဟု ဥရောပ သံတမန်တစ်ဦးက AFP သတင်းဌာနသို့ ပြောကြားခဲ့သည်။ သို့သော်လည်း ယနေ့တွင် အတည်ပြုလိုက်သည့် အဆိုပါအဆင့်ကို နိုင်ငံတကာရေပိုင်နက်တွင် ဆောင်ရွက်ခွင့်ရမည် မဟုတ်ချေ။

စစ်ရေးအရ အရေးယူမှု တတိယအဆင့်တွင် လစ်ဗျားနိုင်ငံ၏ ရေပိုင်နက်အတွင်းသို့ ၀င်ရောက်၍ လူကုန်ကူးသူများကို နှိမ်နင်းခြင်း ပါဝင်မည်ဖြစ်ပြီး ၎င်းတို့ ပင်လယ်ထဲသို့ သင်္ဘောများ မောင်းမထွက်ခင်အချိန်တွင် ထိုသင်္ဘောများအား ဖျက်ဆီးရန်နှင့် လူကုန်ကူးကွန်ယက်များကို ဖြိုခွဲရန် ရည်ရွယ်ခြင်းဖြစ်သည်။

နိုင်ငံတကာ ပြောင်းရွှေ့အခြေချသူများအဖွဲ့ IOM ကမူ ယခုနှစ်အတွင်း မြေထဲပင်လယ်ကို ဖြတ်၍ ဥရောပသို့ ၀င်ရောက်လာကြသူများ အရေအတွက်မှာ စံချိန်တင် မြင့်မားခဲ့ပြီး ၄ သိန်းကျော်ရှိခဲ့ကာ ၂၀၁၄ ခုနှစ်က အရေအတွက်ထက် ၂ ဆ ကျော် မြင့်မားနေသည်ဟု ပြောကြားခဲ့သည်။

Ref: RT