ပြည်သူ့ ပါတီ NLD ကိုသာမဲပေးသင့်

စက်တင်ဘာ ၁၆ ၊ ၂၀၁၅
M-Media
ဆောင်းပါးရှင်-နေမျိုး

အမျိုးသားဒီမိုကရေစီအဖွဲ့ ချုပ်က မွတ်စလင်မ်အမတ်လောင်းများကို ပယ်ချခဲ့ပြီး မွတ်စလင်မ်အများ ဆုံးနေထိုင်သည့် မဲဆန္ဒနယ်များတွင်ပင် ဗုဒ္ဓဘာသာဝင် အမတ်လောင်းများကို ၀င်ရောက်ယှဉ် ပြိုင်ရန် ဆုံးဖြတ်ချက်ချပြီးနောက်ပိုင်း မြန်မာတ၀ှမ်း မွတ်စလင်မ် အသိုင်းအ၀ိုင်း များစွာတွင် အမျိုးသားဒီမိုကရေစီအဖွဲ့ ချုပ် (NLD) ကို မဲမပေးရန် ပြော ဆိုမှုများ၊ အင်တာနက် စာမျက်နှာများတွင် ရေးသားဝေဖန်မှုများရှိလာသည်။

NLD ဆုံးဖြတ်ချက်သည် မွတ်စလင်မ်များအား ခွဲခြားခြင်းဖြစ်ကြောင်း၊ NLD သည်လည်း ဗမာဗုဒ္ဓဘာသာ ကြီးစိုးသည့် ပါတီဖြစ်ပြီး သူနိုင်လည်း မွတ်စလင်မ်များအတွက် ထူးခြားမည် မဟုတ်ကြောင်း၊ ထို့ ကြောင့် NLD အား အလေးပေး မဲထည့်ရန် မလိုကြောင်း  ပြောဆိုရေးသားမှုများ ရှိလာသည်။ ထိုသို့ ပြောဆိုမှုများ၊ ဝေဖန်မှုများ၊ စိတ်ပျက်မှုများအား အပြစ် မတင်လိုပါ။ အစ္စလာမ် ဘာသာယုံကြည် ကိုးကွယ်ကြတဲ့ နိုင်ငံသား မွတ်စလင်မ်ပြည်သူများကို မ.ဘ.သ ကမ်ပိန်းများဖြင့်သော် လည်းကောင်း၊ မျိုးစောင့် ဥပဒေကဲ့သို့ ဥပဒေပြု  လမ်းကြောင်းဖြင့်သော် လည်းကောင်း၊ နိုင်ငံရေးအရသော် လည်းကောင်း၊ မွတ်စလင်မ် ၁၅၀ နီးပါးကို ၂၀၁၂ နောက်ပိုင်း အပြစ်မရှိ အပြစ်ရှာပြီး ဖမ်းဆီးနှိပ်စက် ပြီး ပြည်ထဲရေးလက်မှတ်ဖြင့် တရားစွဲအမိန့် ချထောင်ချသည့် တရားစီရင်ရေး အရသော် လည်းကောင်း အဘက်ဘက်မှ  နှိပ်ကွပ်နေသည့် ကာလတွင် အဖွဲ့ ချုပ်၏ ဆုံးဖြတ်ချက်သည် မွတ်စလင်မ်များကို သူများနည်းတူ ခွဲခြား ဆက်ဆံသဖွယ်ဖြစ်နေသည်။

သို့ သော် NLD ကို မွတ်စလင်မ်ဆန့် ကျင်ရေး ပါတီဟု စွပ်စွဲရန် မသင့်။ NLD ကို ဆန့် ကျင်ရန်မသင့်။ NLD ကို ဆန့် ကျင်ခြင်း၊ မဲမထည့်ခြင်း သည် အာဏာရှင်များ ဆင်ထားသည့် ထောင်ခြောက်ထဲသို့  ဆင်းသက်ခြင်းသည်ဖြစ်သည်။

စစ်အာဏာရှင်များ၏ အကြီးဆုံး နိုင်ငံရေးရန်သူသည် NLD ဖြစ်သည်။ အထူးသဖြင့် ပါတီခေါင်းဆောင် ဒေါ်အောင်ဆန်းစုကြည်ဖြစ်သည်။ သူမအား ပြည်သူထောက်ခံမှု  ကျဆင်းရန်၊ ရွေးကောက်ပွဲ မနိုင်စေရန် အဖက်ဖက်မှ ပူးညှပ်မိစေရန်  စနစ်တကျ အကွက်ဆင်ထားခြင်းဖြစ်သည်။

၂၀၁၂ ကြားဖြတ် ရွေးကောက်ပွဲ အပြီးတွင် ပေါ်လာသော မွတ်စလင်မ် ဆန့် ကျင်ရေး လှုပ်ရှားမှုများသည် ဒေါ်အောင်ဆန်းစုကြည်နှင့် အမျိုးသား ဒီမိုကရေစီ အဖွဲ့ ချုပ် သိက္ခာ မကျကျအောင်၊ နိုင်ငံတကာနှင့် ပြည်တွင်းထောက်ခံ မှုမကျကျအောင် အစိုးရက မဟာဗျူဟာကျကျ ဖန်တီးစီစဉ်ထားခြင်းဖြစ်သည်။ အစိုးရစီစဉ်ဖန်တီးမှုများကြောင့် လူထုခေါင်းဆောင် ဒေါ်ဆောင်ဆန်းစုကြည် အနေဖြင့် မွတ်စလင်မ်ကိစ္စ ပြောသည်ဖြစ်စေ၊ မပြောသည်ဖြစ်စေ၊ မွတ်စလင်မ်ဖက်မှ ပြောသည်ဖြစ်စေ မပြောသည်ဖြစ်စေ လက်ညှိုးထိုး အပြစ်တင်စရာ အလိုအလျောက်ဖြစ်သွားသည်။

ယခုဆိုလျှင် နိုင်ငံတကာအဖွဲ့ အစည်းများ၊ အစိုးရများ၊ သတင်းမီဒီယာများ၊ ပြည်တွင်း လူ့ အခွင့်အရေးအဖွဲ့  အစည်းများပင်လျှင် အစိုးရ၏ ထောက်ခြောက်ထဲရောက်မှန်း မသိရောက်ကုန်သည်။ ဒေါ်စုက မွတ်စလင်မ် အရေးမပြောလို့ ဟု ဆိုကာ ဝေဖန်သဖြင့်  ဒေါ်စု တိုက်ခိုက်ခံရသည်။ လူ့ အခွင့်အရေး လှုပ်ရှား သူများကလည်း လူ့ အခွင့်အရေး အခြေခံဖြင့် ဒေါ်စုကို ဝေဖန်သဖြင့် ဒေါ်စုပင် လူ့ အခွင့်အရေးချိုးဖောက်သူ အဖြစ် တိုက်ခိုက်ခံရသည်။ မွတ်စလင်မ် အသိုင်းအ၀ိုင်းကလည်း အထင်လွဲ ဝေဖန်သည်။

အကယ်၍ မွတ်စလင်မ်များက NLD ကို မဲမပေးတော့ပါက အာဏာရှင်များမှ ပို၍တောင်ကြိုက်ဦးမည်။ ၄င်းတို့ ချဉ်းသာမဟုတ် တိုင်းရင်းသား ပါတီအများစုကလည်း ၀မ်းသာကြအုံးမည်။ တိုင်းရင်းသားပါတီများသည် ၂၀၁၅ ရွေးကောက်ပွဲတွင် တိုင်းရင်းသား မဲဆန္ဒနယ်မြေများ  တွင် NLD ဝင်ပြိုင်၍ ဒေါ်အောင်ဆန်းစုကြည် အမြင်မကြည့်ဖြစ်နေကြသည်။ ။ တိုင်းရင်းသားအရေးကို အလေးမထားဟု ယူဆကာ ဒေါ်စု ရွေးကောက်ပွဲနိုင်မည့်အရေး မလိုလားကြပါ။ NLD နည်းတူ တိုင်းရင်းသား ဒေသအားလုံးတွင် ဝင်ပြိုင်သည် ပြည်ခိုင်ဖြိုး(USDP) ပါတီနှင့် ပတ်သက်၍ တော့ အသံကျယ်ကျယ်ထွက်မလာကြပေ။

ဖြစ်စဉ်တလျှောက်လုံးကို ပြန်လည်သုံးသပ်ပါက NLD သည်သာ မဲပေးသင့်သော ပါတီဖြစ်သည်။ NLD သည် မွတ်စလင်မ်အရေးရယ်လို့  မပြောသော်လည်း မွတ်စလင်မ် ဆန့် ကျင်ရေးကို မူဝါဒအနေဖြင့်မလုပ်ခဲ့ပါ (အောက်ခြေမှ လုပ်ရပ်များသည် ပါတီပေါ်လစီမဟုတ်ပါ)။

အာဏာရ ကြံခိုင်ရေး ပါတီနှင့် ၄င်းပါတီမှ ရွေးချယ်တင်မြှောက်ထားတဲ့ အစိုးရ ကသာ မွတ်စလင်မ် ဆန့် ကျင်ရေးလှုပ်ရှားမှုများနျှင့် အကြမ်းဖက်မှု ဖြစ်ရပ်များတွင် တာဝန်အရှိဆုံးဖြစ်သည်။  နှစ်ပေါင်းများစွာ မွတ်စလင်များကို ခွဲခြားနှိပ်ချခြင်း၊ အကြမ်းဖက်ခြင်း၊ လူမုန်းအောင်လုပ်ခြင်း၊ အမုန်တရား ပြန့်ပွားအောင် ပြုလုပ်ခြင်း၊ အဖက်ဖက်တွင် ဖိနှိပ်ခြင်းတို့ ကို ကျူးလွန်သည်မှာ NLD မဟုတ်ဘဲ ယခင် စစ်အစိုးရ အစဉ်အဆက် က ပြုလုပ်ခဲ့ပြီး ယခု အစိုးရလက်ထက်တွင် အဆိုးဆုံး အခြေအနေဖြစ်လာခဲ့သည်။

အဖွဲ့ ချုပ်သည် စတင်ဖွဲ့ စည်းကတည်းက လူ့ အခွင့်အရေးနှင့် ဒီမိုကရေစီရေးကို ဦးစိုက်ဆောင်ရွက်လာခဲ့ပြီး ပါတီခေါင်းဆောင်များ အမိန့် ကြောင့်ရယ်လို့  ဗလီဖျက် မီးရှို့  လူသတ်ရယ်လို့ မရှိခဲ့ပါ။ အကြမ်းဖက်သမားများကို မွေးပြီး လူမျိုးရေး၊ ဘာသာရေးပြသနာများဖြစ်အောင် ဖန်တီးသည့် သမိုင်းလည်းမရှိခဲ့ပါ။ ယခု မွတ်စလင်မ်ဆန့် ကျင်ရေးလှုပ်ရှားမှုများ အရှိန်မြင့်နေသည့်ကာလတွင်တောင် မွတ်စလင်မ်ဆန့် ကျင်ရေးအဖွဲ့ များ၏လုပ်ရပ်ကို ထောက်ခံအားပေးခြင်းမလုပ်ခဲ့ (သေး) ပါ။

နည်းလမ်းပေါင်း များစွာဖြင့်ဆင်ထားသော ထောင်ခြောက်ကို ရှောင်နေရသည့် ပါတီသာဖြစ်သည်။

ထိုနည်းတူ မွတ်စလင်မ်များအနေဖြင့်လည်း အာဏာရှင်များ ထောင်ခြောက်တွင်းသို့  ဆင်းသလိုမဖြစ်ရအောင် ထိုထောင်ခြောက်ကို ရှောင်ဖို့ လိုပါသည်။

** ဆောင်းပါးရှင်၏ အမြင်နှင့် အာဘော်သာဖြစ်သည်။

ဆက်စပ်ဆောင်းပါးများဖတ်ရန်
——————————–
‘NLD မနိုင် ကုလားမဲ’ ၊ ‘NLD လည်း ကုလားမဲ’
http://www.m-mediagroup.com/news/45547

မြန်မာနိုင်ငံရေးနှင့် ဖွတ်မရ ဓားမဆုံး မြန်မာမွတ်စလင်မ်များ
http://www.m-mediagroup.com/news/45508

NLD ရှုံးစေဖို့ ကုလားမုန်းကြစို့
http://www.m-mediagroup.com/news/42672

၂၀၁၅ အထွေထွေရွေးကောက်ပွဲ ဖြစ်လာရင် ဘယ်သူ့ကိုမဲပေးမလဲ ?
http://www.m-mediagroup.com/news/39006