UNC ပါတီမှ ပယ်ချခံ ကိုယ်စားလှယ် ၆ ဦးမှ သုံးဦးကို ကော်မရှင် ပြန်လည်ခွင့်ပြု

စက်တင်ဘာ ၁၉၊ ၂၀၁၅
M-Media
မိုးစက်

ရန်ကုန်။    ။ ၂၀၁၅ ရွေးကောက်ပွဲတွင် ဝင်ရောက်ယှဉ်ပြိုင်မည်ဖြစ်သော မူလက ပယ်ချခံထားရသော အမျိုးသားညီညွတ်ရေး ကွန်ဂရက်ပါတီ ၆ ဦးအနက် ကိုယ်စားလှယ်လောင်းသုံးဦး ပြန်လည်ယှဉ်ပြိုင်ခွင့်ရရှိခဲ့ကြောင်း သိရသည်။

အဆိုပါပါတီမှ ၂၀၁၅ ရွေးကောက်ပွဲတွင် ဝင်ရောက်ယှဉ်ပြိုင်ရန်အတွက် ကိုယ်စားလှယ်လောင်း (၁၂) ဦးတင်သွင်းထားသော်လည်း (၆) ဦးသာ ရွေးကောက်ပွဲကော်မရှင်က လက်ခံခဲ့ခြင်း ဖြစ်သည်။

အဆိုပါ ကိုယ်စားလှယ်လောင်း (၆) ဦးအဖြစ်လျှောက်ထားသူများသည် ရွေးကောက်ပွဲ ကော်မရှင်ထံသို့ အယူခံဝင်ခဲ့ရာ ကော်မရှင်မှ သုံးဦးကို ပြန်လည်ခွင့်ပြုခဲ့ခြင်း ဖြစ်ခဲ့သည်ဟု အမျိုးသားညီညွတ်ရေးကွန်ဂရက်ပါတီမှ ဥပဒေတာဝန်ခံ ဦးရန်နိုင် (မြောင်းမြ) က M-Media သို့ပြောသည်။

“အန်ကယ်တို့ကိုသူတို့ပယ်တာက ၂၀၀၈ ဖွဲ့စည်းပုံမှာ မရှိတော့တဲ့ ဥပဒေတွေ၊ အဖေ အမေ နိုင်ငံသားဖြစ်မှုမှာ သံသယရှိတဲ့ ဆိုတဲ့ဟာတွေနဲ့ဆိုတော့ အဲဒါတွေကို အန်ကယ်တို့ဘက်က အထောက်အထားခိုင်မာစွာနဲ့ ပြန်လည်ဖြေရှင်းပြီး ကော်မရှင်မှာ အယူခံဝင်ခဲ့တာပါ” ဟု ၎င်းကဆက်လက်ပြောဆိုခဲ့သည်။

ရွေးကောက်ပွဲကော်မရှင်ထံမှ ကိုယ်စားလှယ်လောင်းအဖြစ် သတ်မှတ်သည့် တရားဝင်စာကို မရရှိသေးပေမယ့် လည်း ရွေးကောက်ပွဲကော်မရှင် ဥက္ကဌ ဦးတင်အေး ကိုယ်တိုင် ဖုန်းဆက်၍ပြောသည်ဟုလည်း ဦးရန်နိုင်က ဆိုခဲ့သည်။

အမျိုးသားညီညွတ်ရေး ပါတီမှ ပြန်လည်ရွေးချယ်ခံရသည့် ကိုယ်စားလှယ်များမှာ-  ဦးရန်နိုင် (မြောင်းမြ) (သင်္ဃန်းကျွန်းမဲဆန္ဒနယ်)၊ ဦးအောင်မြင့်မင်း (တာမွေမဲဆန္ဒနယ်)၊ ဦးရန်နိုင်ဟိန်း (တောင်ဥက္ကလာမဲဆန္ဒနယ်) တို့ဖြစ်ကြသည်။

၂၀၁၅ ရွေးကောက်ပွဲတွင် ဝင်ရောက်ယှဉ်ပြိုင်မည့် လက်ရှိ ပြည်သူ့လွှတ်တော် အမတ် ဦးရွှေမောင် အပါအဝင် အစ္စလာမ်ဘာသာဝင် လွှတ်တော် ကိုယ်စားလှယ်လောင်းများအား ရွေးကောက်ပွဲကော်မရှင်မှ ၇၀% ထက် မနည်းပယ်ချခဲ့ရာ သက်ဆိုင်ရာပါတီများမှ ပြန်လည်ယှဉ်ပြိုင်ခွင့်ရရန် ကော်မရှင်ထံသို့ အယူခံဝင်လျက်ရှိကြသည်။