ဒုက္ခသည်များ ခွဲဝေလက်ခံရေး ဥရောပနိုင်ငံများ သဘောတူ

စက်တင်ဘာ ၂၃၊ ၂၀၁၅
M-Media

– ဥရောပသို့ ၀င်ရောက်လာကြသည့် ဒုက္ခသည်များနှင့် ပတ်သက်၍ အရေးပေါ်အစည်းအဝေး ပြုလုပ်ခဲ့ပြီးနောက် ဒုက္ခသည် ၁၂၀၀၀၀ ကို ဥရောပသမဂ္ဂအဖွဲ့ဝင် နိုင်ငံများမှ ခွဲဝေလက်ခံကြရန်အတွက် ပြည်ထဲရေးဝန်ကြီးများက သဘောတူညီချက်တစ်ခု ရရှိခဲ့သည်ဟု သိရသည်။

ဥရောပအရှေ့ပိုင်းနိုင်ငံများနှင့် အလယ်ပိုင်းနိုင်ငံအချို့က ဆယ်စုနှစ်များအတွင်း အဆိုးဝါးဆုံး ဥရောပ၏ ဒုက္ခသည် ပြဿနာနှင့်ပတ်သက်၍ ဒုက္ခသည်များလက်ခံရန် ဆန့်ကျင်မှုများ ပြုလုပ်ခဲ့ကြသော်လည်း ယမန်နေ့က ဘရပ်ဆဲလ်၌ ပြုလုပ်ခဲ့သည့် ထိုအစည်းအဝေးတွင် သဘောတူညီခဲ့ကြခြင်း ဖြစ်သည်။

ပြင်သစ်ပြည်ထဲရေးဝန်ကြီး ဘာန်းနာ့ဒ် ကာဇီနျူဗီကမူ အဆိုပါ အစီအစဉ်ကို နိုင်ငံအများစုက လက်ခံအတည်ပြုခဲ့သည်ဟု ပြောကြားခဲ့သည်။

“ဥရောပက တာဝန်ယူဖို့၊ တိုးတက်အောင်ဆောင်ရွက်ဖို့အတွက် ဒီဆုံးဖြတ်ချက်က ပဋိဥာဏ်ပါပဲ”

ဒုက္ခသည်များ မျှဝေလက်ခံရေး အစီအစဉ်ကို ဟန်ဂေရီ၊ ချက်၊ ရိုမေးနီးယားနှင့် ဆလိုဗက်ကီးယားနိုင်ငံများက ကန့်ကွက်မဲပေးခဲ့ကြပြီး ဖင်လန်နိုင်ငံက ကြားနေခဲ့သည်။

အဆိုပါ သဘောတူညီချက်အရ ဥရောပဒေသတွင်းရှိ နိုင်ငံများမှာ အရှေ့အလယ်ပိုင်း၊ အာရှနှင့် အာဖရိကတို့မှ ထပ်မံရောက်ရှိလာသည့် ဒုက္ခသည် ထောင်နှင့်ချီ၍ လက်ခံရမည်ဖြစ်သည်။ အဆိုပါဒုက္ခသည်များမှာ လက်ရှိတွင် ဂရိနှင့် အီတလီနိုင်ငံများသို့ ရောက်ရှိနေသည်။

ယနေ့တွင် ဥရောပ ခေါင်းဆောင်များမှာ ထိပ်သီးအစည်းအဝေးတစ်ခုကို ကျင်းပရန် ရှိနေပြီး ထိုအစည်းအဝေးတွင် ပြည်ထဲရေးဝန်ကြီးများ၏ သဘောတူညီချက်ကို အတည်ပြုရန်ရှိနေသည်။

ထိုသဘောတူညီချက်တွင် ယခင်က ရောက်ရှိလာခဲ့သည့် ဒုက္ခသည် ၅၄၀၀၀ နှင့် ယခုလက်ရှိ အီတလီနှင့် ဂရိတို့တွင်ရှိနေသည့် ဒုက္ခသည် ၆၆၀၀၀ တို့ အကြုံးဝင်မည်ဖြစ်သည်။

Ref: Aljazeera