စက်တင်ဘာ ၂၃၊ ၂၀၁၅
M-Media
– အသင်းအား ရလဒ်ကောင်းများ ရရှိအောင် စွမ်းဆောင်နိုင်ခြင်းမရှိသည့် နည်းပြ ဘရန်ဒန်ရော်ဂျာ၏ နေရာတွင် အစားထိုးရန်အတွက် လီဗာပူးလ်အသင်း ပိုင်ရှင်များမှာ ရီးယဲလ်နည်းပြဟောင်း အန်ဆယ်လော့တီအား ဆက်သွယ်နေသည်ဟု သတင်းများ ထွက်ပေါ်လာသည်။
ပရီးမီးယားလိဂ် အဖွင့်ပွဲစဉ် ၂ ခုတွင် လီဗာပူးလ်မှာ ရာနှုန်းပြည့်နိုင်ပွဲကို ရယူနိုင်ခဲ့သော်လည်း နောက်ပိုင်း ၃ ပွဲတွင် မန်ယူနှင့် ၀က်စ်ဟမ်းတို့ကို အိမ်ကွင်း၌ပင် ရှုံးနိမ့်ခဲ့သည်။ ထို့ပြင် ယခုတစ်ပတ်တွင်လည်း နော်ဝစ်ခ်ျအား ဦးဆောင်ဂိုး သွင်းနိုင်ခဲ့သော်လည်း ထိန်းမထားနိုင်ခဲ့ဘဲ ချေပဂိုး ပြန်ပေးခဲ့ရကာ တစ်ဂိုးစီ သရေကျခဲ့သည်။
ထို့ကြောင့် နည်းပြရော်ဂျာမှာ ဝေဖန်မှုများနှင့် ရင်ဆိုင်နေရပြီး ဗာပူးလ်တာဝန်ရှိသူများက အန်ဆယ်လော့တီအား ဆက်သွယ်နေသည်ဟူသော သတင်းများမှာ ၎င်းအပေါ် ဖိအားပိုလာစေခဲ့သည်။
အေစီမီလန်အသင်းတွင် ချန်ပီယံလိဂ် ၂ ကြိမ်အပါအ၀င် ဆုဖလားအများအပြားကို ရရှိခဲ့သည့် အန်ဆယ်လော့တီမှာ ချယ်ဆီးသို့ ပြောင်းရွှေ့လာခဲ့ပြီးနောက် ပရီးမီးယားလိဂ်နှင့် FA ဖလားတို့ကို ရရှိခဲ့သည်။ ထို့နောက် ပီအက်စ်ဂျီသို့ ပြောင်းရွှေ့ခဲ့ပြီး ၂၀၁၃ ခုနှစ်တွင် ပြင်သစ်လီဂူးချန်ပီယံဖြစ်အောင် စွမ်းဆောင်ပေးနိုင်ခဲ့သည်။
ပီအက်စ်ဂျီမှတစ်ဆင့် ရီးယဲလ်သို့ ရောက်ရှိလာပြီးနောက် အန်ဆယ်လော့တီမှာ ၂၀၁၄ ခုနှစ်တွင် ရီးယဲလ်၏ ၁၀ ကြိမ်မြောက် ချန်ပီယံလိဂ်ဖလားပါအ၀င် ဖလား ၄ လုံးရရှိအောင် ဦးဆောင်နိုင်ခဲ့သည်။ သို့သော်လည်း ပြီးခဲ့သည့် ဘောလုံးရာသီတွင် ရီးယဲလ်မှာ မျှော်မှန်းထားသည့် အောင်မြင်မှုများ မရခဲ့ခြင်းကြောင့် အန်ဆယ်လော့တီမှာလည်း ထုတ်ပယ်ခြင်း ခံခဲ့ရသည်။
ယခုအချိန်တွင် အန်ဆယ်လော့တီမှာ လန်ဒန်ရှိ ၎င်း၏ အိမ်နှင့် ဗန်ကူးဗားတို့တွင် အနားယူလျက် ရှိနေသည်။
Ref: Dailymail
Comments