ဘာကီနာဖာဆိုတွင် အာဏာသိမ်းအဖွဲ့နှင့် အစိုးရတို့ ငြိမ်းချမ်းရေး စာချုပ် ချုပ်ဆို

စက်တင်ဘာ ၂၃၊ ၂၀၁၅
M-Media

– နိုင်ငံရေး မတည်မငြိမ်ဖြစ်နေသည့် အာဖရိကနိုင်ငံငယ် ဘာကီနာဖာဆိုတွင် အာဏာသိမ်း သမ္မတအထူးအစောင့်တပ်ဖွဲ့ ခေါင်းဆောင်များမှာ စစ်တန်လျားပြန်ရန်နှင့် ဖြုတ်ချခဲ့သည့် ကြားဖြတ်အစိုးရအား အာဏာပြန်ပေးရန် အစိုးရကို ထောက်ခံသည့် စစ်တပ်နှင့် သဘောတူညီချက်တစ်ခုကို လက်မှတ်ရေးထိုးခဲ့သည်ဟု သိရသည်။

ထိုသဘောတူညီချက်ကို နိုက်ဂျီးရီးယားမြို့တော် အဘူဂျာတွင် ယမန်နေ့ညပိုင်းက ဘာကီနာဖာဆိုမှ ခေါင်းဆောင်များ အလျင်အမြန် ဆွေးနွေးခဲ့ပြီးနောက် ရရှိခဲ့ခြင်းဖြစ်သည်။

ပြီးခဲ့သည့်တစ်ပတ် ဗုဒ္ဓဟူးနေ့တွင် သမ္မတအထူးအစောင့်တပ်ဖွဲ့ RSP က ကြားဖြတ်အစိုးရမှ သမ္မတနှင့် ၀န်ကြီးချုပ်တို့ကို ဖမ်းဆီးကာ အာဏာသိမ်းခဲ့ခြင်းဖြစ်ပြီး ရက်အနည်းငယ်အကြာတွင် အာဏာလွှဲပြောင်းပေးရန် သဘောတူညီခဲ့သည်။

ကြားဖြတ်အစိုးရအား ထောက်ခံသည့် စစ်တပ်ကမူ ယမန်နေ့က မြို့တော် အူဂါဒူဂူသို့ ၀င်ရောက်လာခဲ့ပြီး RSP ၏ လှုပ်ရှားမှုကို စောင့်ကြည့်ခဲ့သည်။ RSP မှာ ဖမ်းဆီးထားသည့် ၀န်ကြီးချုပ်ကို လွှတ်ပေးခဲ့သော်လည်း အာဏာလွှဲပြောင်းပေးခြင်း မရှိသောကြောင့် စစ်တပ်က ချေမှုန်းရန် စီစဉ်ခဲ့သည်။

ယခု သဘောတူညီချက်အရ RSP မှာ အာဏာလွှဲပြောင်းပေးရန် သဘောတူညီခဲ့ပြီး၊ စစ်တပ်ကလည်း အူဂါဒူဂူမှ ကီလိုမီတာ ၅၀ အကွာအဝေးသို့ ဆုတ်ခွာပေးရန်နှင့် RSP အဖွဲ့ဝင်များနှင့် ၎င်းတို့၏ မိသားစုများ၏ ဘေးအန္တရာယ်ကင်းရှင်းရေးအတွက် အာမခံပေးခဲ့သည်။

သဘောတူညီချက်အား ဘာကီနာဖာဆို၏ မိုဆီမျိုးနွယ်မှ ဘုရင်ဖြစ်သူ မွဂ်ဟို နာဘာအား မီဒီယာများရှေ့မှောက်တွင် ယနေ့နံနက် စောစောပိုင်းက တင်ပြခဲ့သည်။

Ref: Aljazeera