လင်းနို့လူသား ၀တ်စုံနဲ့ စတန့်ထွင်ခဲ့တဲ့ တိုင်ဆန်ဖျူရီ

စက်တင်ဘာ ၂၄၊ ၂၀၁၅
M-Media

– ဗြိတိန်လက်ဝှေ့သမား တိုင်ဆန်ဖျူရီမှာ အောက်တိုဘာလတွင် ကလစ်ရှ်ုကိုနှင့် ထိုးသတ်မည့် လက်ဝှေ့ပွဲအတွက် သတင်းစာရှင်းလင်းပွဲတွင် လင်းနို့လူသားဝတ်စုံဖြင့် စတန့်ထွင်ခဲ့သည်ဟု သိရသည်။

ဗြိတိန် လက်ဝှေ့ချန်ပီယံဖြစ်သည့် ဖျူရီမှာ WBA၊ WBO နှင့် IBF ဟဲဗီးဝိတ်ချန်ပီယံ ယူကရိန်းနိုင်ငံသား ဗလာဒီမီရ် ကလစ်ရ်ှကိုအား စိန်ခေါ်သူဖြစ်ပြီး လာမည့် အောက်တိုဘာ ၂၄ ရက်တွင် ဂျာမနီနိုင်ငံ၌ ၎င်းတို့နှစ်ဦး ထိုးသတ်သွားမည်ဖြစ်သည်။

ယမန်နေ့က ပြုလုပ်ခဲ့သော သတင်းစာရှင်းလင်းပွဲတွင် တိုင်ဆန်ဖျူရီမှာ လင်းနို့လူသားဝတ်စုံဖြင့် တက်ရောက်လာခဲ့ပြီး ကလစ်ရ်ှကိုထိုင်နေရာသို့ သွားရောက်ကာ လက်ညှိုးထိုး၍ “နောက်တစ်ခါ ခင်းဗျားအလှည့်” ဟု သုံးကြိမ်တိုင်တိုင် ဒေါသတစ်ကြီး ပြောကြားခဲ့သည်။

ထို့နောက် သတင်းစာရှင်းလင်းပွဲလုပ်မည့်နေရာတွင် ၀င်ထိုင်ခဲ့ပြီး ရုပ်ရှင်ထဲမှ လင်းနို့လူသား၏ ရန်သူဖြစ်သူ ဂျိုကာမျက်နှာဖုံး ၀တ်ထားသည့် လူတစ်ဦး အရှေ့သို့ ထွက်လာသည့်အခါ ဖျူရီက စားပွဲပေါ်မှ ခုန်ကျော်ကာ ဂျိုကာအား ကြမ်းပြင်ပေါ်သို့ လှဲချခဲ့၍ ကလစ်ရ်ှကို၏ ချန်ပီယံ ခါးပတ်အချို့ကိုလည်း ကြမ်းပြင်ပေါ်သို့ ပစ်ချခဲ့သည်။

ထိုစတန့်ထွင်မှုအပြီးတွင် ဖျူရီက ကလစ်ရ်ှကိုအား ဒေါသဖြစ်စေမည့် စကားအချို့ကို ပြောင်လှောင်သည့် သဘောဖြင့် ပြောကြားခဲ့ပြီး ကလစ်ရ်ှကိုကလည်း ဖျူရီကို လူရွှင်တော်ဟု သမုတ်ခဲ့သည်။

နောက်ပိုင်းတွင် ဖျူရီမှာ ပုံမှန် ပွဲတက်အ၀တ်အစားဖြင့် သတင်းစာရှင်လင်းပွဲသို့ ပြန်လည် တက်ရောက်ခဲ့သည်။ ဖျူရီမှာ သတင်းစာရှင်းလင်းပွဲကို သတ်မှတ်ချိန်ထက် ၁၅ မိနစ်နောက်ကျပြီးမှ ရောက်ရှိလာခဲ့သည်။

သတင်းစာရှင်းလင်းပွဲမစခင် ၎င်းတို့နှစ်ဦးမှာ အပြန်အလှန် စကားစစ်ထိုးခဲ့ကြပြီး နောက်ဆုံးတွင် နွေထွေးစွာ လက်ဆွဲနှုတ်ဆက်ခဲ့ကြသည်။

Ref: Dailymail