ဒီမိုကရေစီနှင့် လူ့အခွင့်အရေးကို မြှင့်တင်ပေးမည့် ကိုယ်စားလှယ်လောင်းများကို မဲပေးကြရန် ကာဒီနယ် ချားလ်စ်မောင်ဘို တိုက်တွန်း

စက်တင်ဘာ ၂၈၊ ၂၀၁၅
M-Media

– မကြာမီအချိန်ကာလအတွင်း ကျင်းပပြုလုပ်တော့မည့် မြန်မာနိုင်ငံ၏ သမိုင်းဝင်ရွေးကောက်ပွဲတွင် နိုင်ငံသားများအနေဖြင့် ဒီမိုကရေစီယဉ်ကျေးမှု၊ လူ့အခွင့်အရေးနှင့် အမျိုးသားရင်ကြားစေ့ရေးကို မြှင့်တင်ဆောင်ရွက်ပေးမည့် ကိုယ်စားလှယ်လောင်းများ၊ ပါတီများကိုသာ ရွေးချယ်ကြရန် ပုပ်ရဟန်းမင်းကြီး၏ ကာဒီနယ် ဆရာတော် ချားလ်စ်မောင်ဘိုက တိုက်တွန်းပြောကြားလိုက်သည်။

“မြန်မာနိုင်ငံသားများသို့” ဆိုသည့် ခေါင်းစဉ်ဖြင့် ရေးသားထားသော ဆရာတော်၏ မေတ္တာရပ်ခံ ပန်ကြားလွှာတွင် မြန်မာပြည်သူများအနေဖြင့် လာမည့် နိုဝင်ဘာ ၈ ရက်နေ့တွင် ပြုလုပ်မည့် ရွေးကောက်ပွဲအား စစ်မှန်သော ဒီမိုကရေစီကျင့်သုံးမှု ဖြစ်အောင် ဆောင်ရွက်ရန် လိုအပ်သည်ဟု ဖော်ပြထားပြီး၊ မြန်မာနိုင်ငံ၏ ဒီမိုကရေစီ ခရီးမှာ ခက်ခဲရှည်ကြာမည်ဟု ဆိုသည်။

“မဲပေးတယ်ဆိုတာ ဒီမိုကရေစီရဲ့ အခြေခံအခွင့်အရေးပါ။ ဒီတာဝန်ကို ရွေးကောက်ပွဲမှာ ဖြည့်ဆည်းပေးကြပါ။ မဲရုံတွေဆီ သွားကြပါ။ မှန်ကန်တဲ့ ကိုယ်စားလှယ်တွေကို ရွေးချယ်မဲပေးကြပါ” ဟု မြန်မာနိုင်ငံမှ ခရစ်ယာန်ကက်သလစ် ဂိုဏ်းချုပ်ဆရာတော် ချားလ်စ်မောင်ဘိုက စက်တင်ဘာ ၂၄ ရက်နေ့တွင် ထုတ်ပြန်သည့် ထိုပန်ကြားလွှာ၌ တိုက်တွန်းခဲ့သည်။

“ဒီရွေးကောက်ပွဲဟာ နိုင်ငံအတွက် တကယ့် အခွင့်အလမ်းကြီးပါ။ ငြိမ်းချမ်းမှုနဲ့ သာယာဝပြောမှုဟာ လွပ်လပ်ပြီး၊ တရားမျှတတဲ့ ရွေးကောက်ပွဲရဲ့ အသီးအပွင့်တွေ ဖြစ်ပါတယ်”

ထိုပန်ကြားလွှာ မထုတ်ပြန်ခင်တစ်ရက်က ဆရာတော်ချားလ်စ်မှာ UCANEWS သို့ ပြောကြားရာတွင် ယခုရွေးကောက်ပွဲမှာ ပြောင်းလဲဖို့လိုအပ်နေသည့် နိုင်ငံအတွက် အလွန်အရေးကြီးသည့်အချိန် ဖြစ်သောကြောင့် ပြည်သူများအနေဖြင့် အသိဥာဏ်ရှိရှိ မဲပေးကြရန် မိမိအနေဖြင့် တိုက်တွန်းချင်ကြောင်း ပြောကြားခဲ့သည်။

“အာဏာရှင်ဟောင်းတွေ သတ်မှတ်ခဲ့တဲ့ စနစ်က ဘာပြောင်းလဲမှုမှ ဖြစ်မလာပါဘူး။ ဒါ့ကြောင့် ပြည်သူတွေဟာ ဘယ်သူက စစ်မှန်တဲ့အပြောင်းအလဲကို ယူဆောင်လာနိုင်လဲဆိုတာ သတိထားဖို့ လိုပါတယ်”

ဆရာတော်ချားလ်စ်မှာ ယခင်က နိုင်ငံသားဖြစ်ခွင့်နှင့် အခြေခံလူမှုဝန်ဆောင်မှုများကို ငြင်းပယ်ခြင်းခံထားရသည့် ရိုဟင်ဂျာများ၏ ကိစ္စအပါအ၀င် မြန်မာနိုင်ငံအတွင်းရှိ လူ့အခွင့်အရေးဆိုင်ရာ ကိစ္စရပ်များကို ပွင့်ပွင့်လင်းလင်း ဝေဖန်ပြောဆိုခဲ့ဖူးသည်။

ယခုထုတ်ပြန်လိုက်သည့် ပန်ကြားလွှာတွင် ဆရာတော်က ကိုယ်စားလှယ်လောင်းများကို မှတ်ကျောက်တင်ရန် လမ်းညွှန်ချက် ၁၀ ခုကိုလည်း ဖော်ပြထားသည်။ ထိုလမ်းညွှန်ချက်များတွင် “မတူညီသော တိုင်းရင်းသားလူမျိုးစုများ၊ ဘာသာတရားများ” နှင့်အတူ အလုပ်လုပ်နိုင်သည့် စွမ်းရည်နှင့် နိုင်ငံ၏ သဘာဝ သယံဇာတများကို နိုင်ငံခြား အင်အားကြီးနိုင်ငံများ၏ လက်ဝါးကြီးအုပ်ခြင်းမှ ကာကွယ်ပေးနိုင်သည့် စွမ်းရည်တို့ပါဝင်သည်။

ထိုလမ်းညွှန်ချက်များမှ အချို့ကို လက်ရှိအစိုးရအား တိုက်ခိုက်မှုအဖြစ် သမုတ်နိုင်သော်လည်း မိမိအနေဖြင့် နိုင်ငံ၏ အခြေအနေအမှန်ကိုသာ ပွင့်ပွင့်လင်းလင်း ပြောကြားရန် လိုအပ်သည်ဟု အင်တာဗျူးတွင် ဆရာတော်က ထည့်သွင်းပြောကြားခဲ့သည်။

အသက် ၆၇ နှစ်အရွယ် ရှိပြီဖြစ်သည့် ဆရာတော်ချားလ်စ်က မိမိတို့ ကက်သလစ်အသင်းတော်မှာ ဘာသာဝင်များကို လမ်းညွှန်မှုပေးခြင်း၊ လက်ကမ်းစာဆောင်များ ဝေငှခြင်းဖြင့် နိုင်ငံအား ကူညီနိုင်မည်ဖြစ်သည်ဟု ထည့်သွင်းပြောကြားခဲ့သည်။

Ref: radiovaticana