ရည်မှန်းချက်၏ သုံးပုံတစ်ပုံ ပြီးစီးပြီဟု တယ်လီနောမြန်မာ ပြော

စက်တင်ဘာ ၂၉၊ ၂၀၁၅
M-Media

– တစ်နှစ်တာ ကြာမြင့်ပြီးနောက် နိုင်ငံတစ်ဝှမ်းတွင် ဆက်သွယ်ရေးအခြေစိုက်စခန်း ၃၀၀၀ ကျော်ကို တည်ဆောက်ပြီးစီးခဲ့ပြီး နိုင်ငံလူဦးရေ၏ ၅၃ ရာခိုင်နှုန်းအတွက် ဆက်သွယ်ရေးကွန်ယက်ကို ဖန်တီးနိုင်ခဲ့ပြီဟု တယ်လီနောမြန်မာ၏ စီအီးအိုဖြစ်သူ ပီတာ ဖာရ်ဘာ့ဂ်က ပြောကြားလိုက်သည်။

မြန်မာနိုင်ငံတစ်ဝှမ်းလုံးကို အရည်သွေးပြည့်မီသည့် ၀န်ဆောင်မှုပေးနိုင်ရန်အတွက် အခြေစိုက်စခန်းပေါင်း ၈၀၀၀ကျော် လိုအပ်သည်ဟု ၎င်းက ထည့်သွင်းပြောကြားခဲ့သည်။

“လုပ်ဆောင်ရမှာတွေထဲက ၃ ပုံ ၁ ပုံ လောက် ပြီးစီးပါပြီ၊ ကျွန်တော်တို့ရဲ့ ရည်မှန်းချက်အတွက် နောက် သုံးလေးနှစ်လောက် ကျန်ပါသေးတယ်”

၁၂ လတာကာလအတွင်း မြန်မာနိုင်ငံ၌ တယ်လီနောကို သုံးစွဲသည့်ဦးရေမှာ ၉.၅ သန်းရှိပြီး ဆက်သွယ်ရေး ဈေးကွက်၏ ၃၄ ရာခိုင်နှုန်းကို ရယူထားနိုင်ခဲ့သည်။ အော်ဒီဒူးကမူ သုံးစွဲသူ ၄.၃ သန်းဖြင့် ဈေးကွက်၏ ၁၅ ရာခိုင်နှုန်းကို ရယူထားခဲ့သည်။

မြန်မာနိုင်ငံတွင် စမတ်ဖုန်းသုံးစွဲသူများမှာ အခြားသောဈေးကွက်များထက် ပိုမိုလျင်မြန်စွာ ကြီးထွားလာသည်ဟုလည်း ဖာ့ရ်ဘာ့ဂ်က ထည့်သွင်းပြောကြားခဲ့သည်။ ဇွန်လကုန်ပိုင်း စစ်တမ်းအရ တယ်လီနောသုံးစွဲသူများ၏ ၅၅ ရာခိုင်နှုန်းမှာ ဒေတာဖြင့် အင်တာနက်သုံးစွဲမှု ပြုလုပ်နေကြသည်ဟု ဆိုသည်။

Ref: mobileworldlive