ဆီးရီးယားသူပုန်များအား လေ့ကျင့်ပေးမှုကို အမေရိကန် ရပ်ဆိုင်းမည်

အောက်တိုဘာ ၁၀၊ ၂၀၁၅
M-Media

– IS အားတိုက်ခိုက်နေသော ဆီးရီးယားမှ အလယ်အလတ်ဝါဒီ သူပုန်များအား လေ့ကျင်ပေးမှုများကို အမေရိကန်က ရပ်တန့်တော့မည်ဖြစ်ပြီး ထိုအစား သူပုန်ခေါင်းဆောင်များနှင့် မြေပြင်တွင် အမှန်တကယ် တိုက်ပွဲဝင်နေသော ၎င်းတို့၏ တပ်ဖွဲ့များအား လက်နက်ခဲယမ်း ထောက်ပံ့မှုကိုသာ ပြုလုပ်သွားမည်ဟု အမေရိကန်အစိုးရက ယမန်နေ့တွင် ကြေငြာခဲ့သည်။

ယခုနှစ်တွင် စတင်ခဲ့ပြီး ကန်ဒေါ်လာ သန်း ၈၅၀ ခန့် ကုန်ကျမည့် ဆီးရီးယားသူပုန်များအား လေ့ကျင့်ပေးရေးနှင့် လက်နက်ထောက်ပံ့ရေး မအောင်မြင်သော အစီအစဉ်ကို လူအများက ဝေဖန်ခဲ့ပြီးနောက် ယခုကဲ့သို့ ပင်တဂွန်၏ ကြေငြာမှု ထွက်ပေါ်လာခြင်းလည်းဖြစ်သည်။

လက်နက်များထောက်ပံ့မှုတွင်လည်း သူပုန်များမှာ အကြမ်းဖက်အဖွဲ့များနှင့် မပတ်သက်ကြောင်း အမေရိကန်က စီစစ်ပြီးမှသာ ထောက်ပံ့ပေးအပ်သွားမည်ဖြစ်သည်။ လေးနှစ်ကျော် ကြာပြီဖြစ်သည့် ဆီးရီးယားပြည်တွင်းစစ်တွင် ရုရှားက ပါဝင်လာပြီးနောက်ပိုင်း အမေရိကန်၏ ဆီးရီးယားမဟာဗျူဟာနှင့် ဒေသတွင်း လွှမ်းမိုးမှုများအပေါ် မေးခွန်းများ မြင့်တက်လာခဲ့သည်။

Ref: Reuters