ပြည်မြို့ မွတ်စလင် သုဿာန်အဟောင်းတွင် မြှုပ်နှံမှုအတွက် တရားရင်ဆိုင်နေရ

သြဂုတ် ၁ ရက်၊ ၂၀၁၂
ရန်ကုန်။
M-Media
သတင်း – ပြည့်ပြည့်

ပြည်မြို့ မြန်မာ မွတ်စလင်မ်သင်္ချိုင်းဟောင်း ကို မ.ယက မှ ၂၀၀၈-ခုနှစ်ကတည်းက ပြောင်းရွေှ့ရန်အမိန့်ထုတ်ပြီး နေရာအသစ်ပေးထားသော်လည်း သုဿာန်နေရာ အသစ်မှာ မြေကျင်းတူးလိုက်ပါက ရေများထွက်လာ၍ မွတ်စလင်သုဿာန်အဟောင်းတွင်ပင် ဆက်လက်မြှုပ်နှံနေခဲ့ကြရာ ယခုအချိန်တွင် ဆက်လက်မမြှုပ်နှံတော့ရန် အတင်းအကြပ်အမိန့်ထုတ်လာခဲ့ပြီး  ဆက်လက်မြှုပ်နှံခဲ့သည့် ၃-ဦးမှာ တရားစွဲခံနေရကြောင်းသိရပါသည်။ ၁-ဦးမှာ တရားရုံးတွင် လက်ရှိတရားရင်ဆိုင်နေရပြီး တစ်ဦးမှာ လာမည့် သြဂုတ်လ ၈-ရက်နေ့တွင် ရုံးချိန်းသတ်မှတ်ထားကြောင်း၊ နောက်တစ်ဦးမှာ တရားရုံးမှ ရုံးချိန်း မခေါ်ဆိုသေးကြောင်းသိရသည်။

နှစ်ပေါင်း ၁၀၀-ကျော်သက်တမ်းရှိ ပြည်မြို့မှ မွတ်စလင်မ်သုဿာန် အားသော့ခတ်ထားပုံ

“၂၄-ရက်နေ့က မိုင်ယသ်(အသုဘ)ချဖို့အတွက် သေမိန့်တောင်းခံတာကို မြို့နယ်အုပ်ချုပ်ရေးမှူးကနေ မိုင်ယသ် (အသုဘ) ချခါနီးအထိ သေမိန့်မပေးဘူး။ မိုင်ယသ်(အသုဘ)ဖြစ်လို့ ပူဆွေးရတာကတစ်မျိုး သေမိန့်မရလို့ စိတ်ပူပန်ရတာတစ်မျိုးနဲ့ အရမ်းကိုသောက ဖြစ်ကြရပါတယ်။ တစ်ချိန်လုံး မြို့နယ်အုပ်ချုပ်ရေးမှူးရုံးမှာ ထိုင်စောင့်နေခဲ့ရတယ်။ မိုင်ယသ် (အသုဘ) ချချိန်ရောက်တော့ ဒီအတိုင်းပဲ ချလိုက်ရတော့တယ်။” ဟု ယင်းဖြစ်ရပ်ကို သိရှိခဲ့သူတစ်ဦးကပြောပါတယ်။

“အဲလို မိုင်ယသ်(အသုဘ)ချလိုက်တော့ တရားစွဲခံရတယ်၊ ၂၅-ရက်နေ့မှာ မြို့နယ်အုပ်ချုပ်ရေးမှူး ဦးအောင်ဇော်ထက်က တရားစွဲတာ ၁၈၈ နဲ့စွဲတာ။ အခု တရားရုံးမှာ ရင်ဆိုင်နေရတယ်။ အဲလိုဖြစ်လို့ အာမခံရဖို့ အာမခံပေးမယ့်သူက ရပ်ကွက်မှာနေထိုင်ကြောင်းထောက်ခံစာယူတော့ ဆံတော်ရပ်ကွက် အုပ်ချုပ်ရေးမှူးကမပေးဘူး။ သူကပြောသေးတယ် သဂြိုလ်မှုနဲ့ပတ်သက်တဲ့ အာမခံအတွက်ဆို ထောက်ခံမပေးဘူးတဲ့။ ဒါနဲ့ တစ်ခြားရပ်ကွက်က ထောက်ခံစာယူလိုက်ရတယ်။ တရားစွဲခံရတော့ တရားခံအနေနဲ့ ရှေ့နေလည်းငှားရတော့တယ်။ တရားရုံးမှာ သက်သေ ၂-ယောက်ကို စစ်တယ်။ အဲဒီ သက်သေ ၂-ယောက်က တရားလိုဘက်က ရှေ့နမေးတာကို ဖြေတော့ဖြေတယ်။ ဒါပေမယ့် တရားသူကြီးက တချို့မေးခွန်းတွေကိုမမေးသင့်ဘူးဆိုပြီး ပယ်ချလိုက်တယ်။ အခုတော့ တရားရုံးမှာ ရင်ဆိုင်နေရတယ်။ ဘယ်လိုဆက်ဖြစ်လာဦးမလဲတော့ မသိသေးဘူး။ မြို့နယ်အုပ်ချုပ်ရေးမှူးက သူတို့ကို မြို့နယ် အုပ်ချုပ်ရေးရုံးမှာ ခေါ်ပြီးခြိမ်းခြောက်သေးတယ်။ အဲဒီတုန်းကတော့ အခုလိုလုပ်ရင် ထောင် ၆-လ ကျမယ်လို့ပြောတယ်။ အခုတော့ အိမ်က မိုင်ယသ်(နာရေး)ဖြစ်ထားလို့ ၀မ်းနည်းပူဆွေးရတာကတစ်မျိုး၊ တရားရင်ဆိုင်နေရလို့စိတ်ညစ်နေရတာကတစ်မျိုးနဲ့ တော်တော်လေးကို စိတ်သောကဖြစ်နေကြတယ်”လို့ ပြည်မြို့ခံတစ်ဦးက ပြောပြခဲ့သည်။

အဆိုပါဖြစ်ရပ်မှာ မတရား အနိုင်ကျင့်မှုဖြစ်တာကြောင့် ပြည်မြို့ခံ မြန်မာမွတ်စလင်များအနေနှင့် စိတ်မကောင်းဝမ်းနည်း ခံပြင်းမှုများ ဖြစ်ပေါ်နေကြကြောင်းလည်း သိရှိခဲ့ရပါသည်။