မန်စီးတီးနောက်ခံလူ မန်ဂါလာ၏ ပြောင်းရွှေ့မှု ဖီဖာစုံစမ်းနေ

အောက်တိုဘာ ၁၄၊ ၂၀၁၅
M-Media

– ပေါ်တူဂီကလပ် ပေါ်တိုအသင်းမှ မန်စီးတီးသို့ ၂၀၁၄ ခုနှစ်က နောက်ခံလူ အယ်လီယာကွင်း မန်ဂါလာ ပြောင်းရွှေ့မှုတွင် ကုမ္ပဏီတစ်ခု ပါဝင်ခဲ့ပြီး တတိယအုပ်စု ကန့်သတ်ချတ်နှင့် ငြိစွန်းသည်ဟူသော သံသယဖြင့် ဖီဖာက စုံစမ်းစစ်ဆေးမှုများ ပြုလုပ်နေသည်ဟု တာဝန်ရှိသူတစ်ဦးက အတည်ပြုခဲ့သည်။

ထိုအပြောင်းအရွှေ့တွင် ပေါ်တိုအသင်းမှာ ပြောင်းရွှေ့ကြေး၏ ၅၆.၆၇ ရာခိုင်နှုန်း ယူရို ၃၀.၅ သန်းသာ ရရှိခဲ့သည်။ ကစားသမားကို တတိယအုပ်စုမှ ပိုင်ဆိုင်ခြင်းကို ဖီဖာက ပြီးခဲ့သည့်နှစ်မေလတွင် ပိတ်ပင်ခဲ့သော်လည်း ပုဂ္ဂလိက ရှယ်ယာကုမ္ပဏီတစ်ခုဖြစ်သည့် Doyen Sports အုပ်စုက မန်ဂါလာ ပရီးမီးယားလိဂ်သို့ ပြောင်းရွှေ့ခြင်းမပြုမီ မန်ဂါလာအား ပိုင်ဆိုင်မှုအပေါ် ရင်းနှီးမြှုပ်နှံခဲ့သည်။

“ကျွန်တော်တို့ ဒါကို စုံစမ်းနေပါတယ်” ဟု ဖီဖာပြောရေးဆိုခွင့်ရှိသူ တစ်ဦးက Omnisport သို့ ပြောကြားခဲ့သည်။ ကစားသမားများအား တတိယအုပ်စုက ပိုင်ဆိုင်မှုမှာ ပေါ်တူဂီတွင် ပုံမှန်လိုလို ဖြစ်ပွားနေပြီး Doyen ကုမ္ပဏီမှာ မန်ယူနောက်ခံလူ မာကို့စ်ရိုဂျိုအား ပိုင်ဆိုင်မှုတွင်လည်း ပါဝင်နေသည်။

Ref: Goal