လာမည့်နှစ်မှစ၍ အွမ္မရာဗီဇာများ ဆော်ဒီတိုးမြှင့်မည်

အောက်တိုဘာ ၁၅၊ ၂၀၁၅
M-Media

– မစ်ဂျစ်ဒ်ဟရမ် ဗလီဝတ်ကျောင်းတော် ဧရိယာအား တိုးချဲ့ခဲ့ပြီးနောက် နှစ်စဉ်နှစ်တိုင်း အွမ္မရာဗီဇာကို တိုးမြှင့်ပေးသွားရန် ဆော်ဒီအာရေဗျက ဆုံးဖြတ်လိုက်သည်ဟု သိရသည်။

“လာမယ့် ၅ နှစ်အတွင်းမှာ အွမ္မရာဘုရားဖူး အရေအတွက် နှစ်ဆတိုးသွားမယ့် ကျွန်တော်တို့ အစီအစဉ်ကို အွန်လိုင်းမှာ ကြေငြာတော့မှာပါ” ဟု ဟဂ်ျရေးရာဝန်ကြီး ဘန်ဒါရ် အလ်-ဟဂ်ျဂျာက Saudi Gazette သို့ ပြောကြားခဲ့သည်။

၂၀၁၆ ခုနှစ်မှစ၍ လစဉ် အွမ္မရာဘုရားဖူးသူအရေအတွက် ၁.၂၅ သန်း လာရောက်ည်ဟု မျှော်မှန်းထားပြီး လက်ရှိတွင်မူ တစ်လျှင် ၄ သိန်းခန့် လာရောက်နေကြသည်ဟု ၎င်းက ထည့်သွင်းပြောကြားခဲ့သည်။

အွမ္မရာဗီဇာများ တိုးမြှင့်ပေးမည့် အစီအစဉ်အသစ်က ဆော်ဒီအစိုးရမှ အကောင်အထည်ဖော်ထားသည့် မတ်စ်ဂျစ်ဒ်ဟရမ် ဗလီဝတ်ကျောင်းတော် တိုးချဲ့မှုကြောင့် တိုးတက်လာမည့် ဘုရားဖူးများအတွက် ရည်ရွယ်ခြင်းဖြစ်သည်။

ဝန်ကြီးကမူ လာမည့် နိုဝင်ဘာ ၁၄ ရက်နေ့တွင် စတင်မည့် အွမ္မရာရာသီအတွက် ဘုရာဖူးလာရောက်ရန် ၀န်ဆောင်မှုပေးနေသည့် ကုမ္ပဏီများနှင့် တွေ့ဆုံ၍ အဆိုပါအစီအစဉ်ကို မကြာမီ ဆွေးနွေးသွားမည်ဟု ထည့်သွင်းပြောကြားခဲ့သည်။ ဟဂ်ျနှင့် အွမ္မရာခရီးစဉ်များအတွက် ကောင်းမွန်သည့် ၀န်ဆောင်မှုများ ပေးရေး ပိုမိုနက်ရှိုင်းစွာ ပူးပေါင်းဆောင်ရွက်ကြရန်လည်း အလ်-ဟဂ်ျဂျာက ထည့်သွင်း ဆော်သြခဲ့သည်။

ဟဂ်ျဝန်ကြီးဌာန၏ ဖော်ပြမှုအရ ၂၀၁၃ ခုနှစ်တွင် အွမ္မရာဗီဇာ စုစုပေါင်း ၅ သန်းကို ထုတ်ပေးခဲ့ပြီး ၂၀၁၄ နှင့် ၂၀၁၅ ခုနှစ်တွင် ၆ သန်းစီ ထုတ်ပေးခဲ့သည်ဟု သိရသည်။ ၂၀၁၆ ခုနှစ်တွင်မူ အွမ္မရာဗီဇာ ၁၀ သန်း ထုတ်ပေးရန်နှင့် ၂၀၁၈ ခုနှစ်အရောက်တွင် တစ်နှစ် ဗီဇာ သန်း ၆၀ ထုတ်ပေးသွားရန် ၀န်ကြီးဌာနက မျှော်လင့်ထားသည်။

Ref: Onislam