ကိုမြအေး ရေးသားသည့် မိုးကောင်းကင်၌ တိမ်တိုက်များ စာအုပ်ထွက်ရှိ

သြဂုတ်၊၃ ရက်၊၂၀၁၂

၈၈မျိုးဆက်ကျောင်းသားခေါင်းဆောင်တစ်ဦးဖြစ်သော ကိုမြအေး ရေးသားသည့် မိုးကောင်းကင်၌တိမ်တိုက်များ စာအုပ် စတင်မိတ်ဆက်ဖြန့်ချိခြင်းနှင့်အမှတ်တရ လက်မှတ်ရေးထိုးပွဲကို ယနေ့(၃၊၈၊၂ဝ၁၂)နေ့ နေ့ခင်း ၁၁ နာရီတွင် ရန်ကုန်မြို့မြေနီကုန်းရှိ ဒဂုန်စင်တာ 2 စတုတ္ထထပ်၌ ကျင်းပခဲ့ပါသည်။

၈၈ မျိုးဆက်ကျောင်းသားခေါင်းဆောင် ကိုမြအေး စာအုပ်ဝယ်ယူသူများကို အမှတ်တရ လက်မှတ်ထိုးပေးစဉ် (ဓါတ်ပုံ-88 Generation Students FB)

ဒီစာအုပ် ရေးသားထုတ်ဝေရတာဟာ မိသားစုဘ၀အတွင်းက လေးစား တန်ဖိုးထားစရာတွေကို သိမြင်တတ်စေဖို့ ရည်ရွယ်ချက်နဲ့ ဖြစ်ပါတယ်လို့ ကိုမြအေးက RFA နဲ့တွေ့ဆုံခန်းပြုလုပ်ခဲ့သည့် အချိန်က ပြောကြားခဲ့သည်။

“ဒီဝတ္ထုရဲ့ အတွေးကို ဟိုလွန်ခဲ့တဲ့ ၁၅ နှစ် ကျွန်တော်ထောင်ထဲမှာ နေစဉ်တုန်းက ရခဲ့တယ်။ အဲတုန်းက ထောင်ထဲမှာက ကျွန်တော်တို့ လွတ်လွတ်လပ်လပ် မရှိဘူးလေ။ စာဖတ်ခွင့်၊ စာရေးခွင့် ဆိုတာလည်း မရှိဘူး။ အပြင်ထွက်ရတဲ့ ရေချိုးဆင်းတဲ့ အချိန် တစ်နာရီ လောက်ဆိုတာပဲ ရှိတာပေါ့။ ကျန်တဲ့ ၂၃ နာရီက ကျွန်တော်တို့က အခန်းထဲမှာပဲ လူ သုံး လေး ငါးယောက် နေရတာဆိုတော့ ဇာတ်လမ်းတွေ ပြောကြတယ်ဗျာ။ အဲပေါ်မှာ အဲဒီဝတ္ထုလေးတွေ တွေးပေါ့ဗျာ။ အဲဒါလေးကို စခဲ့တယ်။ လွိုင်ကော်ထောင်မှာ အကြမ်းရေးဖြစ်တယ်။ တောင်ကြီးထောင်မှာ ကျွန်တော် အချောသတ်တာပေါ့။ အဓိကက ကျွန်တော် နိုင်ငံရေး လုပ်တာက ဆင်းရဲသားတွေ အတွက်ကို ကျွန်တော် လုပ်တယ်ဗျာ။ အဲဒီအပေါ်မှာ ဆင်းရဲသည်ဖြစ်စေ၊ ချမ်းသာသည်ဖြစ်စေ လူတိုင်း လူတိုင်းမှာ မိသားစုဘဝလေး တစ်ခုကို ပိုင်ဆိုင်ချင်ကြတယ်ဗျာ။ အဲဒီ မိသားစုဘဝလေး တစ်ခုကို ရှိနေတဲ့သူတွေက မြတ်နိုးရကောင်းမှန်း၊ တန်ဖိုးထားရကောင်းမှန်း ဆိုတာ မသိဘူးပေါ့နော။ အဲတော့ တစ်ခုခုကြောင့် ပြိုလဲသွားပြီဆိုရင် မိသားစုဘဝလေးက ပြန်ပြီး အစားထိုးနိုင်ဖို့ အရမ်းခက်တယ်”

မကြာသေးမီးကပဲ ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်ရဲ့ နောက်ကြည့်မှန် ဆိုတဲ့ ရှစ်လေးလုံး သမိုင်းနောက်ခံနဲ့ လုံးချင်း အချစ်ဝတ္တု ထွက်ပေါ်လာခဲ့ပြီး ရုပ်ရှင် ရိုက်ဖို့ အထိဖြစ်လာခဲ့ပါတယ်။ ဒီအရင်ကလည်း ကိုဂျင်မီရဲ့ အနုပညာ လက်ရာ ထွက်ခဲ့ဖူးပါသေးတယ်။

ကိုပြုံးချို ရေးဆွဲပေးထားသော ကိုမြအေးရဲ့ စာအုပ်မျက်နှာဖုံး
(ဓါတ်ပုံ ကိုမြအေး FB)

ကျောင်းသားခေါင်းဆောင်တွေဟာ အနုပညာဝါသနာ ပါသူတွေလည်းဖြစ်ပါတယ်။ အခု ကိုမြအေးရဲ့ စာအုပ် မျက်နှာဖုံး ပန်းချီ ကိုတော့ ကိုပြုံးချိုက ရေးဆွဲပေးထားတာဖြစ်ပါတယ်။

ကိုမြအေးနဲ့ပတ်သက်ပြီး စပယ်ဖြူ မဂ္ဂဇင်း က ပြောထားတာကတော့ “ကိုမြအေးက စာတွေ ကဗျာတွေ အများကြီးရေးဖူးပါတယ်.. ထောင်ကျစဉ် အတွင်းမှာပါ…သီချင်းတွေလည်း ရေးခဲ့ဖူးပါတယ်.. ကိုမင်းကိုနိုင် အပါအ၀င် ၈၈ မျိုးဆက်ကျောင်းသားခေါင်းဆောင်တွေက အနုပညာကိုလည်း ၀ါသနာပါပါတယ်.. ကိုပြုံးချိုရဲ့ ကာဗာ ပန်းချီလက်ရာလေးကိုပါ ချီးမွမ်းကြပါစို့ ” လို့ ဆိုထားပါတယ်။