မြန်မာနိုင်ငံဖွား ကချင်အမျိုးသမီးတစ်ဦး ၂၀၁၅ စင်ကာပူအလှမယ်ဘွဲ့ရ

အောက်တိုဘာ ၂၅၊ ၂၀၁၅
M-Media

– ၂၀၁၅ ခုနှစ် စင်ကာပူအလှမယ်ရွေးပွဲ Miss World Singapore တွင် မြန်မာနိုင်ငံဖွား ကချင်အမျိုးသမီးတစ်ဦးက သရဖူရရှိခဲ့သည်ဟု သိရသည်။

အသက် ၂၄ နှစ်ရွယ် ချယ်ရတီ မာရူဖြစ်ပြီး ၂၀၀၇ ခုနှစ်က စင်ကာပူနိုင်ငံသားဖြစ်ခဲ့ကာ လက်ရှိတွင် အလွတ်တန်း ဘာသာပြန်အဖြစ် အလုပ်လုပ်ကိုင်နေသူ ဖြစ်သည်။

အောက်တိုဘာ ၂၁ ရက်၊ ဗုဒ္ဓဟူးနေ့က နောက်ဆုံးအဆင့်ပြိုင်ပွဲတွင် သူမမှာ ဇကာတင် ၁၄ ယောက်နှင့် ယှဉ်ပြိုင်ခဲ့ရပြီးနောက် ထိုကဲ့သို့ စင်ကာပူအလှမယ်အဖြစ် ရွေးချယ်ခံခဲ့ရခြင်းဖြစ်သည်။ သူမကို ချယ်ရတီ လုလုဆန်ဟုလည်း သိကြသည်။

“ကျွန်မက ဒီမှာရှိတဲ့ လူနည်းစုဝင်တွေထဲက တစ်ယောက်ပါ။ ကျွန်မဟာ ကချင်လူမျိုးဖြစ်တယ်။ ဆိုလိုတာက မြန်မာနိုင်ငံ မြောက်ဖျား ကချင်ပြည်နယ်ကနေ ကျွန်မ ဒီကို ရောက်လာတယ်။ ဒါပေမယ့် စင်ကာပူနိုင်ငံက ကျွန်မကို ဒီလိုအခွင့်အရေးပေးခဲ့ပြီး၊ ဒီလိုတာဝန်ကိုလည်း ယုံယုံကြည်ကြည် အပ်နှင်းခဲ့ပါတယ်။ အဲဒီအတွက် ကျွန်မ အရမ်း ကျေးဇူးတင်ပါတယ်။ ပြီးတော့ နိုင်ငံတကာ Miss World ပြိုင်ပွဲမှာ ဆုရဖို့အတွက် ကျွန်မ အကောင်းဆုံး ကြိုးစားသွားပါမယ်” ဟု ဆုရအပြီးတွင် ပြောကြားခဲ့သည်။

သူမ၏ နိုင်ငံသားဖြစ်မှုနှင့်ပတ်သက်၍ စင်ကာပူပြည်သူအချို့က ဝေဖန်မှုများ ရှိခဲ့သော်လည်း အများစုမှာ သူမအား ချီးကျူးခဲ့ကာ၊ ဆုမွန်ကောင်းများ တောင်းပေးခဲ့ကြသည်။

Ref: Yahoo