WTA Finals တင်းနစ်ပြိုင်ပွဲတွင် ရှာရာပိုဗာ နိုင်ပွဲဆက်

အောက်တိုဘာ ၂၈၊ ၂၀၁၅
M-Media

– စင်ကာပူနိုင်ငံ၌ ကျင်းပပြုလုပ်နေသည့် ရာသီပိတ် အမျိုးသမီး တင်းနစ်ပြိုင်ပွဲ WTA Finals ဒုတိယပွဲ၌ ရုရှားတင်းနစ်မယ် မာရီယာ ရှာရာပိုဗာမှာ နိုင်ခြေအဆင့် ၁ ရ ဆီမွန်နာဟဲလ်ပ်ကို ၂ ပွဲပြတ်ဖြင့် အနိုင်ရခဲ့သည်ဟု သိရသည်။

ယမန်နေ့က ကစားခဲ့သည့် အဆိုပါပွဲမှာ ၂ နာရီနီးပါး ကြာမြင့်ခဲ့ပြီး ရှာပိုဗာက ၆-၄၊ ၆-၄ ဖြင့် အနိုင်ရရှိခဲ့သည်။ ရှာရာပိုဗာမှာ ဟဲလ်ပ်နှင့် တွေ့ဆုံခဲ့သည် ၅ ပွဲစလုံးတွင် ပွဲအားလုံးကို အနိုင်ရရှိအောင် ကစားနိုင်ခဲ့သည်။

ကမ္ဘာ့ထိပ်တန်း တင်းနစ်မယ် ၈ ဦးကို အုပ်စုနှစ်ခုခွဲ၍ ကစားစေသည့် အဆိုပါပြိုင်ပွဲ၌ အနီရောင်အုပ်စု၌ ကျသော ရှာပိုဗာမှာ အဖွင့်ပွဲစဉ်တွင်လည်း အန်နစ်ကာ ရဒ်ဝမ်စကာကို ပွဲငယ်တစ်ပွဲ ရှုံးနိမ့်နေရာမှ နောက်ကလိုက်ကစားကာ အနိုင်ယူနိုင်ခဲ့သည်။

ယမန်နေ့ စောစောပိုင်းပွဲစဉ်တွင် အဖွင့်ပွဲ၌ ဟဲလ်ပ်အား ရှုံးနိမ့်ခဲ့သည့် ဖလာဗီယာ ပန်နက်တာမှာ ရဒ်ဝမ်စကာအား ၂ ပွဲပြတ်ဖြင့်ပင် အနိုင်ရခဲ့သည်။ အဖြူရောင်အုပ်စုတွင်မူ ဂါဘိုင်း မူဂူရူဇာနှင့် အိန်ဂျလိက် ကာရ်ဘာရ်တို့က တစ်ပွဲစီ အနိုင်ရထားသည်။

Ref: Dailymail