အစ္စရေးက ပစ်သတ်ခဲ့သူများ၏ အလောင်းများ ပြန်ရရေး ပါလက်စတိုင်းများ ဆန္ဒပြ

အောက်တိုဘာ ၂၈၊ ၂၀၁၅
M-Media

– ပြီးခဲ့သည့် သီတင်းပတ်များက ပါလက်စတိုင်းပိုင် အနောက်ဖက်ကမ်းတွင် ဖြစ်ပွားခဲ့သော မတည်ငြိမ်မှုများအတွင်း အစ္စရေးက ၎င်းတို့ပစ်သတ်ခဲ့သည့် ပါလက်စတိုင်းများ၏ ကြွင်းကျန်ရစ်သော ရုပ်ကလပ်များကို ပြန်လည်ပေးပို့ရန် ငြင်းဆန်သောကြောင့် ဟီဘရွန်မြို့တွင် ပါလက်စတိုင်များက ဆန္ဒပြခဲ့ကြသည်ဟု သိရသည်။

ယမန်နေ့က ပြုလုပ်ခဲ့သည့် အဆိုပါဆန္ဒပြမှုတွင် ထောင်နှင့်ချီသော ပါလက်စတိုင်းများ ပါဝင်ခဲ့ပြီး သေဆုံးသွားခဲ့သည့် ပါလက်စတိုင်းများမှ ရုပ်ကလပ် ၁၁ ခုကို ပြန်ပေးရန် တောင်းဆိုခဲ့ကြသည်။ လက်ရှိအချိန်တွင် အစ္စရေးအာဏာပိုင်များမှာ သေဆုံးသွားသူ ပါလက်စတိုင်းများ၏ ရုပ်ကလပ် ၁၆ ခုကို ထိန်းသိမ်းထားသည်။

ထိုဆန္ဒပြမှုတွင် မည်သည့်ထိပ်တိုက် တွေ့ဆုံမှုမှ မရှိသော်လည်း အစ္စရေးစစ်တပ်က မျက်ရည်ယိုဗုံးများ၊ ရာဘာအုပ်ထားသည့် စတီးကျည်ဆံများနှင့် ကျည်အစစ်များဖြင့် ပစ်ခတ်ခဲ့သောကြောင့် အနည်းဆုံး ပါလက်စတိုင်း ၁၄၃ ဦး ဒဏ်ရာရရှိခဲ့သည်။

Ref: Aljazeera