ဖီဖာပြဿနာကို ပလာတီနီကစသည်ဟု ဘလတ္တာပြော

အောက်တိုဘာ ၂၉၊ ၂၀၁၅
M-Media

– ၂၀၂၂ ကမ္ဘာ့ဖလား အိမ်ရှင်ရွေးချယ်ပွဲ လုပ်ငန်းစဉ်ကို ယူအီးအက်ဖ်အေ ဥက္ကဌ ပလာတီနီက ပြောင်းလဲခဲ့ခြင်းဖြစ်ပြီး ဖီဖာရင်ဆိုင်နေရသည့် ချစားမှု ပြဿနာ၏ ရင်းမြစ်မှာ ထိုကိစ္စမှ စတင်ခဲ့ခြင်းဖြစ်သည်ဟု ရာထူးမှ အနားပေးခံထားရသည့် ဖီဖာဥက္ကဌ ဆပ်ဘလတ္တာက ပြောကြားလိုက်သည်။

၂၀၁၈ နှစ့် ၂၀၂၂ ကမ္ဘာ့ဖလားပြိုင်ပွဲ အိမ်ရှင်ရွေးချယ်မှုများတွင် ချစားမှုများ ရှိခဲ့သည်ဟူသော ကိစ္စနှင့် ပတ်သက်၍ အမေရိကန် တရားရေးဌာနက ဖီဖာ၏ ၀န်ထမ်းဟောင်းများနှင့် လက်ရှိဝန်ထမ်း စုစုပေါင်း ၁၄ ဦးကို တရားစွဲဆိုထားသည်။ ပလာတီနီနှင့် ဘလတ္တာတို့မှာလည်း သံသယဖြစ်စရာ ငွေပေးချေမှုနှင့် ပတ်သက်၍ စုံစမ်စစ်ဆေးမှုများကို ခံနေရပြီး ၎င်းတို့၏ ရာထူးမှ ရက်ပေါင်း ၉၀ အနားပေးခြင်း ခံထားရသည်။

“(၂၀၁၈) ကမ္ဘာ့ဖလားပွဲအတွက် ရုရှားကို ရွေးမယ်ဆိုတာ သဘောတူညီချက် ရခဲ့ပြီးပါပြီ။ ဘာ့ကြောင့်လည်းဆိုတော့ ဥရောပအရှေ့ပိုင်း ရုရှားက တစ်ခါမှ မကျင်းပရသေးလို့ပါ။ ၂၀၂၂ ကိုတော့ အမေရိကကို သွားမယ်။ ဒါဆိုရင် ကမ္ဘာ့ဖလားကို ကမ္ဘာ့နိုင်ငံရေး အင်အားကြီးနှစ်နိုင်ငံမှာ ကျင်းပရမှာပါ။ ဆာကိုဇီ (ပြင်သစ်သမ္မတဟောင်း) က လက်ရှိ ကာတာဘုရင်ဖြစ်နေတဲ့ အိမ်ရှေ့မင်းသားနဲ့ မတွေ့ဆုံခင်အထိ ဒါတွေ အားလုံးက အေးဆေးပါပဲ။ အိမ်ရှေ့မင်းသားနဲ့ မစ္စတာပလာတီနီ နေ့လည်စာစားပြီး နောက်ပိုင်းမှာ ပလာတီနီက ကာတာမှာလုပ်ရင် ကောင်းမယ်လို့ ပြောပါတယ်”

“အဲဒီမှာ အစီအစဉ်တွေအာလုံး ပြောင်းကုန်တာပါပဲ။ လျှို့ဝှက်မဲခွဲကြတဲ့အခါ ဥရောပက ၄ မဲက အမေရိကန်ကို မပေးတော့ဘဲ မဲက ၁၂ မဲကနေ ၈ မဲကို လျော့သွားပါတယ်။ အဲဒီ ၄ မဲကိုထည့်ပေါင်းရင် ၁၂ မဲ ၁၀ မဲဖြစ်မှာပါ။ တကယ်လို့ အမေရိကန်ကိုသာ ၂၀၂၂ အိမ်ရှင်အဖြစ်ရွေးရင် ၂၀၁၈ ရုရှားကမ္ဘာ့ဖလားဟာ တော်တော်အံ့သြဖွယ်ရာကောင်းတယ်လို့ ပြောမှာဖြစ်ပြီး ဖီဖာရဲ့ ပြဿနာအကြောင်းတွေလည်း ထွက်လာမှာ မဟုတ်တော့ပါဘူး” ဟု ဘလတ္တာက ပြောကြားခဲ့သည်။

Ref : Goal