ဟဂ်ျခရီးစဉ် အဂတိကင်းရေး ဆန္ဒထုတ်ဖေါ်

သြဂုတ် ၊ ၆ ရက်၊ ၂၀၁၂

ရန်ကုန်

M-Media

တာဝန်မဲ့ ဟဂ်ျလုပ်ငန်း အေးဂျင့်များကြောင့် ရန်ကုန် အပြည်ပြည်ဆိုင်ရာ လေဆိပ်တွင် သောင်တင်ခဲ့ကြပြီး ခရီးစဉ်ပျက်ပြယ်ကာ ငွေကြေး မြောက်မြားစွာ ဆုံးရှုံး နစ်နစ်ခဲ့ကျသည့် ဟာ့ဂ်ျခရီးစဉ် သွားရောက်မည့် မြန်မာမွတ်စလင်မ် ဟဂ်ျခရီးသည်များ (၂၀၁၁ ခုနှစ်)

ယခုနှစ် ဟဂ်ျခရီးစဉ်တွင် ဦးဆောင်လုပ်ပိုင်ခွင့်ကို အကျိုးအမြတ်မယူမည့် အစ္စလာမ်ဘာသာရေးအဖွဲ့ကြီး ၅ ဖွဲ့အား လုပ်ပိုင်ခွင့်ပေးရန်၊ အစိုးရနှင့် ပနံသင့်သည့် စီးပွားရေးလုပ်ငန်းရှင်အချို့ကသာ နှစ်ပေါင်းများစွာ လုပ်ပိုင်ခွင့်ရရှိခြင်းကို ရပ်တန့်ပေးရန်အတွက် တရားမျှတမှုကိုလိုလားသော မြန်မာမွတ်စလင်မ်အချို့ သာသနာရေးဦးစီးဌာန ရုံးရှေ့ နေ့လယ် ၁၂ နာရီခွဲ စုရုံး ဆန္ဒထုတ်ဖော်ခဲ့ကြသည်။

“အဓိက ကတော့ နာမည်ပျက်အလုပ်ခံထားရပေမဲ့ သူ့မိန်းမနာမည်နဲ့ ဟဂ်ျလုပ်ငန်းကို မသမာတဲ့နည်းသုံးပြီး ထိန်းချုပ်ထားတဲ့ ဖိုးလုံးရဲ့ ကုမ္ပဏီကို ဦးဆောင်လုပ်ပိုင်ခွင့် မပေးတော့ဖို့နဲ့ လူတိုင်း ဈေးသက်သက်သာသာနဲ့ ဟဂ်ျသွားနိုင်အောင် စီးပွားရေးအကျိုးအမြတ် လုံးဝမယူမဲ့ အစ္စလာမ်ဘာသာရေးအဖွဲ့ကြီး ၅ ဖွဲ့ကို လုပ်ပိုင်ခွင့် ပေးဖို့ပါပဲ”ဟု ဟာဂျီ မင်းမင်းက M-Media သို့ဆက်သွယ်ပြောကြားသည်။

ယခင်နှစ်များကတည်းက ဟဂ်ျ ကိုတာ ဗီဇာခွဲတမ်းကို သာသနာရေးဦးစီးတို့နှင့် လာဘ်ပေး လာဘ်ယူရှိသူတို့က ထိန်းချုပ်ထားသဖြင့် မလိုလားအပ်သော ဈေးနှုန်းကြီးမြင့်မှုများ အခက်အခဲများ ကြုံတွေ့ခဲ့ရသည်။

“၀န်ကြီး အနေနဲ့ အရင်နှစ်တွေက သူလုပ်ချင်တာ လုပ်ပြီးပြီ ဒီနှစ်မှာ မြန်မာ မွတ်စလင်တွေဟာ စိတ်မချမ်းသာ စရာ တစ်ခုပြီးတစ်ခု ကြုံနေရတယ်။ ဒါကြောင့် ဒီကိစ္စမှာတော့ စိတ်ချမ်းသာချင်တယ်” သာသနာရေးရုံးရှေ့ စုရုံး ရခြင်းနှင့် စပ်လျဉ်း၍ အထက်ပါပုဂ္ဂိုလ်ကပင် ဆက်လက်ပြောကြားသည်။

ယမန်နှစ် ၂၀၁၁ ခုနှစ်တွင် ဟာ့ဂ်ျခရီးစဉ် သွားရောက်မည့် မြန်မာမွတ်စလင်မ် ဟဂ်ျခရီးသည် ၁၂၀၀ခန့်သည်  တာဝန်မဲ့ ဟဂ်ျလုပ်ငန်း အေးဂျင့်များကြောင့် ရန်ကုန် အပြည်ပြည်ဆိုင်ရာ လေဆိပ်တွင် သောင်တင်ခဲ့ကြပြီး ခရီးစဉ်ပျက်ပြယ်ကာ ငွေကြေး မြောက်မြားစွာ ဆုံးရှုံး နစ်နာခဲ့ရသည်။