အပြောင်းအလဲ၊ ဒီမိုကရေစီနှင့် ရွေးကောက်ပွဲတွင် မဲပေးခြင်း

အောက်တိုဘာ ၃၁ ၊ ၂၀၁၅
M-Media
ရေးသားသူ – မာန်ထက်သျှံ

လက်ရှိမြန်မာနိုင်ငံရေးအခြေအနေသည် ဒီမိုကရေစီ အသွင်ကူးပြောင်းဆဲကာလဖြစ်သည်။ စနစ်တစ်ခုမှ တစ်ခုသို့ အရွေ့တစ်ခုဖြင့် ပြောင်းလဲနေချိန်ဖြစ်သည်။ အပြောင်းအလဲကို ပြည်သူလူထုက လိုလားသည်။ ကောင်းသောပြောင်းလဲခြင်း ကိုသာ မျှော်လင့်ကြသည်။

အခြေခံ သဘာတရား
———————-
ဒီမိုကရေစီ ဆိုသော ဝေါဟာရမှာ ဆန်းကြယ်သည်။ ဒီမိုဆိုတာ လူအများ ကရေစီးယား ဆိုတာ အုပ်ချုပ်ခြင်း တနည်းအားဖြင့် ဒီမိုကရေစီဆိုတာ အများဆန္ဒဖြင့် စီမံဆောင်ရွက်ခြင်း ဖြစ်သည်။ အများစုရဲ့ သဘောထား၊ လူနည်းစုရဲ့ ဆန္ဒများကို အလေးထားရသည့် စနစ်တစ်ရပ်ဖြစ်သည်။ Of the people, by the people, for the people ပြည်သူ့အတွက် ပြည်သူရွေးသော ပြည်သူ့အုပ်ချုပ်ရေး စနစ် တစ်ရပ်ပင်ဖြစ်သည်။ ဒီမိုကရေစီသည် တရားမျှတခြင်း ၊ လွတ်လပ်ခြင်း ၊ တန်းတူညီမျှမှုရှိခြင်း တို့တွင် အခြေခံသည်။

ဒီမိုကရေစီသည် ပန်းတိုင်တစ်ခုမဟုတ်ဘဲ ယနေ့ မြန်မာပြည်သူများ ကျင့်သုံးရမည့် စနစ်တစ်ခုသာဖြစ်ကြောင်း နားလည်ထားရမည်။ ဒီမိုကရေစီကို အခြေခံအားဖြင့် လူ့အခွင့်အရေး တန်ဖိုးများနှင့် ချိန်ထိုး နှိုင်းယှဉ်ကြည့်ရမည်သာဖြစ်သည်။

ခါးသီးတဲ့ သမိုင်း
———————
မြန်မာ့နိုင်ငံရေး ဖြစ်စဉ်ကိုကြည့်ပါ။ ဗိုလ်ချုပ်တို့ ဦးဆောင်ကာ လွတ်လပ်ရေး ရဖို့ ။ သူ့ကျွန်ဘဝမှ လွတ်မြောက်ဖို့ အသက် သွေးချွေးများစွာ စတေးအနစ်နာခံပြီး ရင်ဆိုင်ကျော်ဖြတ်ခဲ့ရသည်။ ၁၉၄၈ခုနှစ် ဇန်နဝါရီလ ၄ ရက်နေ့မှာတော့ လွတ်လပ်ရေး သမိုင်းမှတ်တိုင် တစ်ရပ်ကို စိုက်ထူနိုင်ခဲ့ပါတယ်။

၁၉၄၇-၄၉ ခုနှစ်ကာလများဟာ မြန်မာနိုင်ငံတွင်း  အဆိုးရွားဆုံး ကာလတစ်ခုကို ကျော်ဖြတ်ခဲ့ရပါတယ်။ စစ်မီးလျှံများ မြန်မာပြည်တဝှမ်းတောက်လောင်ပြီး စစ်၏ အမည်းစက်ကြောင့် ပြည်သူအများ ဒုက္ခများ ခါးသီးစွာ ခံစားခဲ့ရပါတယ်။ လွတ်လပ်ရေး ရပြီး ကတည်းက ရှည်ကြာနေသော လက်နက်ကိုင် ပဋိပက္ခများ ချုပ်ငြိမ်းဖို့ မကြာခင်က NCA စာချုပ်တစ်ရပ်ကို ချုပ်ဆိုနိုင်ခဲ့ခြင်းဟာ ကောင်းမွန်သော အရွေ့ တစ်ခုကို ချဉ်းကပ်သည်ဖြစ်ရာ ကြိုဆိုရမည်သာဖြစ်သည်။

အနာဂတ်ကာလတွင် တည်ငြိမ်အေးချမ်းစွာဖြင့် လက်နက်ကိုင် ပဋိပက္ခများ လူမျိုးရေး ဘာသာရေး နှင့် လူ့ဂုဏ်သိက္ခာကို  ခွဲခြားဆက်ဆံမှု များ အကြမ်းဖက်မှုများမရှိဘဲ တိုးတက်ကောင်းမွန်သော လူမှုရပ်ဝန်းနိုင်ငံသစ် တစ်ရပ်ကို လှပစွာ ပုံဖော်လိုကြခြင်းမှာ ပြည်သူအများ ရင်ထဲကိန်းအောင်းနေသော ဆန္ဒအမှန်ပင်ဖြစ်သည်။

ခေတ်အဆက်ဆက်ရွေးကောက်ပွဲများ
—————————————
ကိုလိုနီ နယ်ချဲ့တို့ မြန်မာနိုင်ငံကို သိမ်းပိုက်အပြီး ၁၈၈၆ ခုနှစ်ဧပြီလ ၁ရက်နေ့မှာ မြန်မာဘုရင့် လွှတ်တော်ကို ဖျက်သိမ်းခဲ့ပါတယ်။ ကိုလိုနီခေတ် ကာလတလျောက် ၁၉၂၂၊ ၁၉၂၅၊ ၁၉၂၈နဲ့ ၁၉၃၂ တွေမှာ ရွေးကောက်ပွဲတွေကျင်းပခဲ့ပါတယ်။ အဆိုပါ ရွေးကောက်ပွဲတွေကို မဲပေးခွင့်ရှိသူတွေဟာ အသက် ၁၈နှစ်ပြည့်ရုံသာမက အခွန် ၅ကျပ်ဆောင်ပြီး သူသာဖြစ်ရမယ်လို့ ကန့်သတ်ထားတာကို တွေ့ရပါတယ်။

လွတ်လပ်ရေး ရဖို့ ကြိုးပမ်းနေတဲ့ အချိန်မှာ ဗိုလ်ချုပ်တို့ဦးဆောင်ကာ ၁၉၄၇ခုနှစ် တိုင်းကျိုးပြည်ပြုလွှတ်တော်ရွေးကောက်ပွဲများကို ကျင်းပခဲ့ပါတယ်။ လွတ်လပ်ရေးရပြီး ကာလများမှာ ပထမအကြိမ်ပါလီမန် အထွေထွေရွေးကောက်ပွဲကို ၁၉၅၁ခုနှစ် ဇွန်လ ၁၂ရက်နေ့ကနေ ၁၉၅၂ခုနှစ် ဇန်နဝါရီလ ၃ရက်နေ့ထိ ၃ကြိမ်ခွဲပြီး ကျင်းပခဲ့ပါတယ်။ ဒုတိယအကြိမ် ပါလီမန်အထွေထွေရွေးကောက်ပွဲကို ၁၉၅၆ခုနှစ် ဧပြီလ ၂၇ရက်နေ့မှာ လည်းကောင်း ၊ တတိယအကြိမ်ရွေးကောက်ပွဲကို ၁၉၆၀ ခုနှစ်ဖေဖော်ဝါရီ ၆ရက်နေ့မှာ လည်းကောင်း အသီးသီး ကျင်းပခဲ့ပါတယ်။

၁၉၇၃ခုနှစ်မှာတော့ ၁၉၇၄ ဖွဲ့စည်းပုံအခြေခံဥပဒေ ပေါ်ပေါက်ဖို့ ပထမအကြိမ် ပြည်သူ့လွှတ်တော်နဲ့ ပြည်သူ့ကောင်စီ အဆင့်ဆင့် ရွေးချယ်တင်မြှောက်ပွဲကို ကျင်းပခဲ့ပါတယ်။ ၁၉၇၇ခုနှစ်မှာ ဒုတိယအကြိမ် ၊ ၁၉၈၁ ခုနှစ်မှာ တတိယအကြိမ် နဲ့ ၁၉၈၅ခုနှစ်မှာတော့ စတုတ္ထအကြိမ် အသီးသီး ကျင်းပခဲ့ပြန်ပါတယ်။ ၁၉၈၈ခုနှစ် နောက်ပိုင်း ၁၉၉၀ ပါတီစုံ အထွေထွေရွေးကောက်ပွဲကို ကျင်းပခဲ့ပါတယ်။

၂၀၁၀ ပြည့်နှစ်မှာ ပထမအကြိမ် လွှတ်တော် သက်တမ်းအတွက် ပါတီစုံ ဒီမိုကရေစီ အထွေထွေရွေးကောက်ပွဲကို နိုင်ငံနှင့် အဝှမ်း ကျင်းပခဲ့ပြီး ၂၀၁၂ခုနှစ်မှာ ကြားဖြတ်ရွေးကောက်ပွဲကို ကျင်းပခဲ့ပြန်ပါတယ်။ ယခုမကြာခင် နိုဝင်ဘာ ၈ ရက်နေ့မှာ ကျင်းပမှာကတော့ ဒုတိယအကြိမ် လွှတ်တော် သက်တမ်းအတွက် ၂၀၁၅ခုနှစ် ပါတီစုံ အထွေထွေ ရွေးကောက်ပွဲပဲဖြစ်ပါတယ်။

၂၀၁၅ ရွေးကောက်ပွဲ
———————-
၂၀၁၅ခုနှစ် နိုဝင်ဘာလ၈ရက်နေ့တွင် ရွေးကောက်ပွဲ ကျင်းပမည်။ မဲဆန္ဒနယ် အသီးသီးတွင် တစ်နိုင်ငံလုံး ယှဉ်ပြိုင်သူ ကိုယ်စားလှယ်လောင်းဦးရေ ၆၁၈၉ဦးရှိသည်။ လွတ်လပ်ရေးရပြီး ကာလများက ကျင်းပခဲ့တဲ့ ရွေးကောက်ပွဲများမှာ ဖဆပလပါတီ ၊ အတိုက်အခံအနေဖြင့် ပမညတ နဲ့ ဖြည့်မဲ အဖြစ် ငါးရောင်ခြယ်ပါတီ နှင့် တသီးပုဂ္ဂလ အချို့သာရှိခဲ့ပေမယ့် လက်ရှိမြန်မာ့နိုင်ငံရေး ရွေးကောက်ပွဲမှာ အင်အားကြီး ပါတီနှစ်ခုဖြစ်သည့် ပြည်ခိုင်ဖြိုး ပါတီနှင့် NLD အပါအဝင် ပါတီပေါင်း ၉၀ကျော်နှင့် တသီးပုဂ္ဂလ ကိုယ်စားလှယ်လောင်း သုံးရာကျော် ပါဝင်တာကို တွေ့ရသည်။ ပြည်သူ့လွှတ်တော်အတွက် ကိုယ်စားလှယ်လောင်း ၁၇၇၂ဦး ၊ အမျိုးသားလွှတ်တော်အတွက် ၉၁၃ဦး ၊ တိုင်းဒေသကြီး /ပြည်နယ် လွှတ်တော် မဲဆန္ဒနယ် အသီးသီး အတွကိ၃၃၄၁ ဦးတို့ အမည်စာရင်းတင်သွင်းထားကြောင်း ပြည်ထောင်စု ရွေးကောက်ပွဲကော်မရှင်ရဲ့ ထုတ်ပြန်ကြေညာချက်အရ သိရသည်။ မြန်မာ့သမိုင်းစဉ်တလျောက် ကျင်းပခဲ့သော ရွေးကောက်ပွဲများအနက် လွှတ်တော် အသီးသီးအတွက် ဝင်ရောက် ယှဉ်ပြိုင်သော ကိုယ်စားလှယ်လောင်း အများဆုံးဖြင့် ကျင်းပမည့် ရွေးကောက်ပွဲဟု ဆိုနိုင် ပါသည်။ ပြည်တွင်းနှင့် နိုင်ငံတကာ စောင့်ကြည့်သူများလည်း ပါဝင် လာသဖြင့် အလွန် စိတ်ဝင်စားဖွယ်ကောင်းသော ရွေးကောက်ပွဲ တစ်ရပ်လည်း ဖြစ်ပါတယ်။

သူလို လူကိုရွေးပါ
——————–
ယခုအခါ မဲဆွယ်စည်းရုံးရေး ကာလဖြစ်သည့်အတွက် ပါတီ အစုံစုံမှ ကိုယ်စားလှယ်လောင်း အမျိုးမျိုးမှ မဲဆန္ဒရှင်ပြည်သူများထံ ချဉ်းကပ် မဲဆွယ်ပါလိမ့်မည်။ မဲဆန္ဒရှင်များအနေဖြင့် မိမိရွေးချယ်လိုသော ကိုယ်စားလှယ်ရဲ့ အရည်အချင်း ၊ လုပ်ရည်ကိုင်ရည် ၊ မိမိဒေသနဲ့ ကိုက်ညီမှုရှိမရှိ စတာတွေကို သုံးသပ်ပါ။ မေးမြန်းပါ။ စဉ်းစားပြီးမှ ရွေးချယ်သင့်ပါတယ်။ မိမိရွေးချယ်တင်မြှောက်လိုက်သော ကိုယ်စားလှယ်မှာ လွှတ်တော်တွင်းရောက်ပြီး ပြည်သူ့အကျိုး ၊ ရပ်ကျိုးရွာကျိုး ၊ တိုင်းပြည်အကျိုးစတာတွေကို ၎င်း၏ အရည်အချင်း၊ အတွေးအခေါ် အယူအဆများ ၊ အတွေ့အကြုံများဖြင့် ချိန်ထိုးဖြေရှင်းနိုင်သူကိုရွေးချယ်ပါ။

အတွေ့အကြုံရငိ့ကျက်ပြီး အရညိအချင်းရှိသော လုပ်ကိုင်နိုင်စွမ်းရှိသူ သိက္ခာသမာဓိနှင့် ပြည့်စုံပြီး ခေါင်းဆောင်ကောင်းဖြစ်ထိုက် သူများ ပြည်သူဘက်က မားမားမတ်မတ်ရပ်တည်ပြီး အခက်အခဲ အကျပ်အတည်းများကို  ရင်ဆိုင် ဖြေရှင်းပေးနိုင်သူများသာ လွှတ်တော်တွင်းရောက်ရှိပါမှ တိုင်းပြည်တည်ငြိမ်အေးချမ်းပြီး လှပတဲ့ အနာဂတ်ကို ပုံဖော် ဖန်တီးနိုင်မှာ ဖြစ်ပါတယ်။

2C ပေါ်လစီ
—————
အပြောင်းအလဲ ( Change) တစ်ခုလုပ်ဖို့ဆိုလျှင် ရွေးကောက်ပွဲကို မဖြစ်မနေ ကျော်ဖြတ်ရမည်။ ပြည်သူများက ထိုအပြောင်းအလဲ ( Change )ကိုလုပ်ဖို့ မိမိတို့ကို ကိုယ်စားပြုမည့် ကိုယ်စားလှယ်များကို ရွေးချယ် (Choice) လုပ်ရမည်။ Change လုပ်ဖို့ Choice လုပ်ရမည်သာဖြစ်သည်။

မဲစာရင်းကြည့်ပါ
—————-
အသက် ၁၈နှစ်ပြည့်ပြီးသူ မြန်မာနိုင်ငံသားတိုင်း မဲပေးခွင့်ရှိသည်။ အပြောင်းအလဲကို လိုလားသော မြန်မာပြည်သူတိုင်း ရွေးကောက်ပွဲမှာ မဲပေးလိုကြသည်။ မဲပေးဖို့အတွက် မဲပေးခွင့်ရှိသူတိုင်း မိမိနာမည်မဲစာရင်းမှာ ပါ မပါ စစ်ဆေးရပါမည်။ မိမိနာမည် မဲစာရင်းမှာ မပါလျှင်သက်ဆိုင်ရာ ရပ်ကွက် ရွေးကောက်ပွဲ ကော်မရှင်အဖွဲ့ခွဲမှာ ပုံစံ ၃ တောင်းယူ ဖြည့်စွက် လျှောက်ထားရလိမ့်မည်။

သာသနာ့ဝန်ထမ်းတွေ ၊ ထောင်ကျနေသူတွေ ၊ စိတ်ပေါသွပ်သူတွေ ၊ လူမွဲစာရင်းဝင်သူတွေ ၊ သေဆုံးသူ ၊ ဥပဒေအရ တားမြစ်ထားသူများနှင့် နိုင်ငံခြားသားများကတော့ မဲစာရင်းမှာ ပါဝင်မည်မဟုတ်သလို မဲပေးပိုင်ခွင့်လည်း ရှိမည်မဟုတ်တာကိုတော့ ဂရုပြုရမည်။

မဲပေးကြမည်
————
၂၀၁၅ ခုနှစ် ၊ နိုဝင်ဘာလ ၈ရက်နေ့။ တနင်္ဂနွေနေ့။ မနက် ၆နာရီမှ ညနေ ၄နာရီအတွင်း မဲရုံသို့ သွားကာ မဲပေးကြရမည်။ သက်ဆိုင်ရာမှ နိုဝင်ဘာ ၁ ရက်နေ့မှ နိုဝင်ဘာ ၇ ရက်နေ့ အတွင်း မဲပေးရာတွင် လွယ်ကူစေဖို့ မဲစာရင်းတွင် ပါဝင်သူများကို မဲပေးခွင့် သက်သေခံလက်မှတ် ထုတ်ပေးမည်ဟု ကြားသိရသည်။

မဲပေးမည့် နေ့တွင် အဆိုပါ သက်သေခံ လက်မှတ်( သို့မဟုတ်)  မှတ်ပုံတင် နိုင်ငံသားကတ် တစ်ခုခု ယူဆောင်ကာမဲရုံ သို့ သွားပါ။ မဲရုံအတွင်း ဆန္ဒပြုလက်မှတ်ထုတ်ပေးပါလိမ့်မည်။ ပြည်သူ့လွှတ်တော် ၊ အမျိုးသားလွှတ်တော် ၊ တိုင်းဒေသကြီး / ပြည်နယ်လွှတ်တော် များအတွက် မိမိဆန္ဒပြုလိုသော ကိုယ်စားလှယ်ကို လျှိုဝှက် ဆန္ဒပြု နေရာတွင် တံဆိပ်တုံးနှိပ် ဆန္ဒပြုပြီး သက်ဆိုင်ရာ မဲပုံးအလိုက် မဲထည့်ရမည်။ လူနည်းစု တိုင်းရင်းသားဖြစ်လျှင် သက်ဆိုင်ရာ တိုငိးရင်းသား ကိုယ်စားလှယ် အတွက်ပါ ဆန္ဒပြု မဲပေးကြရမည်။

ပယ်မဲမဖြစ်ဖို့ ဂရုပြု
——————-
မိမိပေးလိုက်သော အသည်းကြားက မဲတစ်ပြားသည် တန်ဖိုးရှိသည်။ မိမိပေးလိုက်သော မဲဖြင့် ရွေးချယါလိုက်သော ကိုယ်စားလှယ်သည် မိမိအပါအဝင် ပြည်သူလူထုတစ်ရပ်လုံးနှင့် နိုင်ငံ၏ ကံကြမ္မာကို ဖန်တီးမည်ဖြစ်ရာ ပြည်သူ့ရင်ထဲမှ ပေါကိဖွားလာသော မဲတစ်ပြားချင်းစီအလိုက် ပယ်မဲမဖြစ်စေဖို့ တစ်ဦးချင်း အထူးဂရုပြုမိစေဖို့ အရေးကြီးသည်။

ပယ်မဲ(၈ )မျိုး
—————–
၁. ဆန္ဒပြုရမည့် အကွက်၏ ပြင်ပတွင် ဆန္ဒပြုထားသော မဲလက်မှတ်
၂. တစ်ကြိမ်ထက်ပို၍ ဆန္ဒပြုထားသောမဲလက်မှတ်
၃. လုံးဝဆန္ဒပြုမထားသော မဲလက်မှတ်
၎. အစွန်းအထင်းများနဲ့ စုတ်ပြဲနေသော မဲလက်မှတ်
၅. တစုံတရာ အမှတ်အသားပြုထားသော မဲလက်မှတ်
၆. မဲရုံမှူး၏ လက်မှတ်မပါသော မဲလက်မှတ်
၇. မည်သူအားဆန္ဒပြုထားသည်ကို ဆုံးဖြတ်ရခက်သည့် မဲလက်မှတ်
၈. ကော်မရှင်က ပယ်မဲအဖြစ် သတ်မှတ်ထားသော မဲလက်မှတ်
( ဥပမာ – မဲရုံမှူးက အတုဖြစ်သည်ဟု သတ်မှတ်ထားသော မဲလက်မှတ်)

ဖော်ပြပါ ပယ်မဲအမျိုးအစားထဲတွင်မိမိ မဲလက်မှတ် မပါဝင်စေဖို့ မိမိထံ  မဲလက်မှတ်ရရှိလာလျှင် မဲလက်မှတ်ကို သေချာစစ်ဆေးပါ။ အထူးဂရုပြုသင့်ပါသည်။ ထို့နောက် မိမိဆန္ဒပြုလိုသော ကိုယ်စားလှယ်လောင်း၏ ဘေးအကွက်တွင် တိကျသေချာစွာ တံဆိပ်တုံး ခတ်နှိပ်မဲပေးရမည်ဖြစ်သည်။

နိုင်ငံသား တစ်ယောက်ရဲ့ တာဝန်
——————————–
သက်ဆိုင်ရာ လွှတ်တော်မဲဆန္ဒနယ်များအလိုက် မဲမျာပေးပြီးပါက မဲရုံမှ မထွက်ခင် (နောက်တစ်ကြိမ် မဲမပေးနိုင်ရန်) လက်သန်းကို မှင်တို့ ပေးပါလိမ့်မည်။

မဲပေးခြင်းဟာ နိုင်ငံသားတစ်ယောက်ရတဲ့ အခွင့်အရေး တစ်ရပ်ဖြစ်လေရာ မကြာခင် ကျင်းပတော့မယ့် ၂၀၁၅ အထွေထွေရွေးကောက်ပွဲမှာ မဲပေးပိုင်ခွင့်ရှိသူတိုင်း မဲရုံသို့သွားကာ မဲသွားပေးကြပါ။ မဲပေးခြင်းဖြင့် နိုင်ငံသားတစ်ယောက်ရဲ့ တာဝန်ကျေပွန်ကြောင်း ဂုဏ်ယူစွာ ဖော်ထုတ်ကြပါလို့ ဆန္ဒပြုလိုက်ရပါသည်။