ဥရောပသို့ရောက်လာသည့် ဒုက္ခသည် ပြီးခဲ့သည့်လတွင် စံချိန်တင်

နိုဝင်ဘာ ၂၊ ၂၀၁၅
M-Media

– ပြီးခဲ့သည့် အောက်တိုဘာလအတွင်း မြေထဲပင်လယ်ကို ဖြတ်၍ ဥရောပသို့ ၀င်ရောက်လာသည့် ဒုက္ခသည်အရေအတွက်မှာ ၂၁၈၀၀၀ ကျော် ရှိပြီး တစ်လတာဝင်ရောက်မှု စံချိန်တင်အမြင့်ဆုံးဖြစ်ကာ ၂၀၁၄ ခုနှစ် တစ်နှစ်လုံး၏ အရေအတွက်နီးနီး ရှိသည်ဟု ကုလက ပြောကြားလိုက်သည်။

ထိုအရေအတွက်ကြောင့် ယခုနှစ်အတွင်း ဥရောပသို့ ၀င်ရောက်လာသည့် ဒုက္ခသည်မှာ စုစုပေါင်း ၇၄၄၀၀၀ ကျော် ရှိနေပြီး၊ အောက်တိုဘာလ စာရင်းအရ ဒုက္ခသည်များမှာ အေးလွန်သည့် ဆောင်းရာသီသို့ ၀င်ရောက်လာပြီး ပင်လယ်ပြင်တွင် အခြေအနေမကောင်းသော်လည်း ဥရောပသို့ ၀င်ရောက်မှု မြင့်တက်နေဆဲဖြစ်သည်ကို တွေ့ခဲ့ရသည်။ ထို့ပြင် ဥရောပနိုင်ငံများအနေဖြင့် ၎င်းတို့၏ နယ်စပ်များကို ပိတ်ပစ်နိုင်သည့် စိုးရိမ်မှုများလည်း ရှိနေသည်။

ယခုနှစ်အစကတည်းက ဂရိနိုင်ငံကို ဖြတ်ကျော်၍ ဥရောပသို့ ၀င်ရောက်လာသော ဒုက္ခသည် ၆ သိန်းကျော်၏ ၉၄ ရာခိုင်နှုန်းမှာ ကမ္ဘာ့ထိပ်တန်း ဒုက္ခသည်များထွက်သော နိုင်ငံ ၁၀ နိုင်ငံမှ ဖြစ်နေသည်။ ထို့ပြင် ဥရောပသို့ ၀င်ရောက်ရန် ကြိုးစားမှုအတွင်း သေဆုံးမှုများမှာလည်း နေ့စဉ်နှင့်အမျှ မြင့်တက်လာပြီး လက်ရှိအချိန်အထိ မြေထဲပင်လယ်ကိုဖြတ်လာသူ ဒုက္ခသည်များတွင် ၃၄၄၀ ခန့်မှာ သေဆုံး သို့မဟုတ် ပျောက်ဆုံးခဲ့ရသည်ဟု သိရသည်။

Ref: Aljazeera