အမေရိကန်၏ ကျူးကျော်စစ်တွင် အဓိကပါဝင်ခဲ့သူ အီရတ်နိုင်ငံရေးသမား ကွယ်လွန်

နိုဝင်ဘာ ၃၊ ၂၀၁၅
M-Media

– ၂၀၀၃ ခုနှစ်က အီရတ်သို့ အမေရိကန်က ကျူးကျော်ဝင်ရောက်မှုအတွင်း အဓိကအခန်းကဏ္ဍမှ ပါဝင်ခဲ့သူ အီရတ်နိုင်ငံရေး သမားဟောင်း အသက် ၇၁ နှစ်အရွယ် အဟ်မဒ် ချာလာဘီမှာ ယနေ့မနက်ပိုင်းက ဘဂ္ဂဒတ်ရှိ ၎င်း၏ နေအိမ်တွင် နှလုံးရောဂါဖြင့် ကွယ်လွန်သွားခဲ့သည်ဟု သိရသည်။

လက်ရှိတွင် အီရတ်လွှတ်တော်၏ ဘဏ္ဍာရေးကော်မတီ အကြီးအကဲဖြစ်သော ချာလာဘီမှာ ၁၉၄၄ ခုနှစ်တွင် ဘဂ္ဂဒတ်၌ မွေးဖွားခဲ့ပြီး ဆက်ဒမ်အစိုးရကို ဖြုတ်ချရန် အချိန်အတော်ကြာ ကြိုးစားခဲ့သည့် ထင်ရှားသော အတိုက်အခံ ခေါင်းဆောင်တစ်ဦးလည်း ဖြစ်သည်။

၁၉၅၆ ခုနှစ်တွင် အီရတ်မှ ထွက်ခွာခဲ့ပြီး ဗြိတိန်နှင့် အမေရိကန်တို့တွင် နေထိုင်ခဲ့ကာ ပြည်ပရောက် အီရတ်အမျိုးသား ကွန်ဂရက်၏ ခေါင်းဆောင်အဖြစ်လည်း ဆောင်ရွက်ခဲ့သူ ဖြစ်သည်။ ၎င်းမှာ အီရတ်တွင် အစုလိုက်အပြုံလိုက် သေစေနိုင်သော ဖျက်အားပြင်းလက်နက်များ ရှိသည်ဟုလည်း လိမ်လည် သတင်းပေးခဲ့ကာ အမေရိကန်က အီရတ်အား ကျူးကျော်တိုက်ခိုက်ရန် လူသိရှင်ကြား ထောက်ခံအားပေးခဲ့သူလည်း ဖြစ်သည်။

ချာလာဘီမှာ ဘုရ်ှအစိုးရနှင့် နီးကပ်သည့် ဆက်ဆံရေးရှိပြီး ဆက်ဒမ်ဟူစိန် ပြုတ်ကျပြီးနောက် အီရတ်ကို ၎င်းက ခေါင်းဆောင်ရမည်ဟု ထင်မှတ်ထားသူလည်း ဖြစ်သည်။ သို့သော်လည်း စစ်ဖြစ်ပွားပြီးနောက် အမေရိကန်က ဖွဲ့စည်းပေးသည့် အီရတ် အုပ်ချုပ်ရေး ကောင်စီတွင် ဒုတိယ၀န်ကြီးချုပ်ရာထူးသာ ရရှိခဲ့ပြီး နောက်ပိုင်းတွင် ထိုရာထူးမှလည်း ဖယ်ပေးခဲ့ရကာ ထိုကဲ့သို့ အဆင့်မြင့်ရာထူးမျိုးကို ထပ်မံရရှိခြင်း မရှိတော့ပေ။

Ref: Aljazeera