စောင့်ကြည့် လေ့လာ အကဲဖြတ်ရမည့် ၂၀၁၅ ရွေးကောက်ပွဲ

ရေးသားသူ – မာန်ထက်သျှံ
M-Media
၅၊ နိုဝင်ဘာလ ၊ ၂၀၁၅

ရန်ကုန်တိုင်း၊ မြို့နယ်အချို့တွင် ပေါ်ထွက်နေသည့် အမည်တူမဲဆန္ဒရှင် သက်သေခံလက်မှတ်များ (Photo Credit- 7Days)

မကြာမီ ကျင်းပတော့မည့် ၂၀၁၅ ရွေးကောက်ပွဲဟာ အမှန်တကယ်ပဲ တရားမျှတမှု ရှိနိုင်ပါ့မလား ၊ ရာနှုန်းပြည့် သေချာမှန်ကန်ပါ့မလား ဆိုတဲ့ မေးခွန်းနှင့်ပတ်သက်၍ ပြည်တွင်းကရော ပြည်ပကပါ လေ့လာစောင့်ကြည့်သူများ၏ မေးခွန်း တစ်ရပ်ဖြစ်လာပါတယ်။

အသွင်ကူးပြောင်းဆဲ မြန်မာနိုင်ငံမှာ အာဏာရ USDP နဲ့ အတိုက်အခံ NLD တို့ကြားမှာ ပြည်သူလူထုရဲ့ ရွေးချယ် ဆုံဖြတ်မှုကို လက်ရှိအစိုးရ အနေနဲ့ မဖြစ်မနေ လက်ခံရမှာဖြစ်ပါတယ်။ နိုင်ငံတဝှမ်း မဲဆန္ဒနယ်တော်တော်များများမှာ USDP နဲ့ NLD တို့ရဲ့ အားပြိုင်မှု အားကောင်းနေဆဲဖြစ်သော်လည်း ပါတီငယ်များနဲ့ တသီးပုဂ္ဂလများရဲ့ အသံများဟာလည်း တချို့ မဲဆန္ဒနယ်များမှာ ရှင်သန်နေဆဲ ဖြစ်ပါတယ်။

၁၉၉၀ ခုနှစ်မှာ NLD ပါတီအနိုင်ရပြီး အာဏာမလွှဲတဲ့ ဖြစ်ရပ်ကိုကြည့်ပြီး လက်ရှိ ၂၀၁၅ ရွေးကောက်ပွဲမှာရော NLD အနိုင်ရပြီး အစိုးရဖွဲ့နိုင်လျှင်ရော တပ်မတော်ရဲ့ အခန်းကဏ္ဍက မည်သို့ မည်ပုံဖြစ်လာမည်ကို ထည့်သွင်းစဉ်းစားစရာ အချက်ဖြစ်လာပါတယ်။ လက်ရှိအစိုးရနဲ့ အတိုက်အခံကြား ဆက်ဆံရေး ၊ အတိုက်အခံနှင့် တပ်မတော်တို့ရဲ့ အပြန်အလှန် ယုံကြည်မှု တည်ဆောက်နိုင်ရေး စတာတွေဟာ လက်ငင်းကြုံတွေ့နေရတဲ့ အနေအထားတစ်ခုပါ။ ဒါတွေက နိုင်ငံရေးအရ စိန်ခေါ်မှုတွေဖြစ်ပါတယ်။

တဖက်မှာ ရွေးကောက်ပွဲ အကြိုကာလ ၊ ရွေးကောက်ပွဲ ကျင်းပစဉ်နှင့် ရွေးကောက်ပွဲပြီးကာလများမှာ တည်ငြိမ်အေးချမ်းစွာ ဖြတ်သန်းနိုင်ရေးဟာ အလွန်အရေးကြီးတဲ့ ရွေးကောက်ပွဲအပေါ် အကျိုးသက်ရောက်စေမယ့် အချက်ဖြစ်ပါတယ်။ ရွေးကောက်ပွဲကြီး တစ်ခုလုံး စ-လယ်-ဆုံး အောင်မြင်စွာ ကျင်းပပြီးစီးရေးဟာ ရွေးကောက်ပွဲနဲ့ ပတ်သက် ဆက်နွယ်သူအားလုံးအပေါ်မှာ တာဝန်ရှိသလို တာဝန်ခံထားသူတွေရဲ့ ဒီရွေးကောက်ပွဲကို မည်သို့ မည်ပုံကိုင်တွယ်ပြီး မည်သို့ မည်ပုံ ဖြစ်လာမည်ကိုလည်း မှတ်တမ်းတင် စောင့်ကြည့်လေ့လာရမည်လည်း ဖြစ်သည်။

နိုင်ငံတစ်နိုင်ငံရဲ့ ရွေးကောက်ပွဲဟာ တရားမျှတမှုရှိမရှိ နိုင်ငံတကာစံနှုန်းများနှင့်အညီ ဒီမိုကရေစီ နည်းလမ်းတကျကျင်းပခြင်း ဟုတ်မဟုတ် စတာတွေကို စောင့်ကြည့်ဖို့ ယေဘုယျအားဖြင့် အဖွဲ့အစည်း ၄ရပ်မှ ထိန်းကျောင်းစောင့်ကြည့်တတ်ကြပါတယ်။

သက်ဆိုင်ရာ ရွေးကောက်ပွဲ ကော်မရှင် အဆင့်ဆင့်ဟာ ၎င်းတို့သည် ဥပဒေ ၊ နည်းဥပဒေ၊ အမိန့် ၊ ကြေညာချက် ၊ လုပ်ထုံးလုပ်နည်းများနဲ့ အညီ အလွှာ အဆင့်ဆင့်မှာ လုပ်ဆောင်ခြင်းရှိမရှိဆိုတာကို ဆောင်ရွက်ကြပါတယ်။ အလားတူ နိုင်ငံရေးပါတီများမှလည်း ၎င်းတို့ ပါဝင်ယှဉ်ပြိုင်မည့် မဲဆန္ဒနယ်နှင့် ရွေးကောက်ပွဲကြီး တစ်ခုလုံးအပေါ်မှာ မဲစာရင်း မှန်ကန်မှုရှိမရှိမှ စ၍ ရွေးကောက်ပွဲကြီး ပြီးစီးသည်အထိ ၎င်းတို့ ပါတီမူဝါဒတွေနဲ့ လုပ်ပိုင်ခွင့် အတိုင်းအတာထဲမှ ဆန်းစစ်အကဲဖြတ်နေဆဲဖြစ်သည်။

သတင်းမီဒီယာများအနေနဲ့လည်း မီဒီယာ ကျင့်ဝတ် စည်းမျဉ်း စည်းကမ်းများအတိုင်း ရွေးကောက်ပွဲအပေါ် ချဉ်းကပ်ကာ မီဒီယာရှုထောင့်မှ မှတ်တမ်းတင်ခွင့်ရမည် ဖြစ်သည်။

ထိုအဖွဲ့တွေအပြင် လွတ်လပ်ပြီး ဘက်လိုက်မှုကင်းသည့် အရပ်ဘက် အဖွဲ့အစည်းများ အနေနဲ့လည်း ရွေးကောက်ပွဲ အပေါ် စောင့်ကြည့် လေ့လာအကဲဖြတ်ကြပါတယ်။ ၎င်းအရပ်ဘက် အဖွဲ့အစည်းများအနေဖြင့် လွတ်လပ်ပြီး ဘက်လိုက်မှုကင်းကင်းဖြင့် နိုင်ငံရေးအရ သမာသမတ်ကျနမှု ၊ ရွေးကောက်ပွဲ စောင့်ကြည့်လေ့လာသူများရဲ့ ကျင့်ဝတ် သိက္ခာ ၊ စည်းမျဉ်း ဥပဒေများနှင့်အညီ မှတ်တမ်းတင် ဆန်းစစ်အကဲဖြတ်ရမည်ဖြစ်သည်။

ရွေးကောက်ပွဲနေ့မှာ နိုင်ငံတကာ သံရုံး၃၂ရုံးမှ လေ့လာသူ ၄၇၀ဦး ၊ EU အပါအဝင် နိုင်ငံတကာ ရွေးကောက်ပွဲ စောင့်ကြည့်လေ့လာရေး အဖွဲ့ ၆ခုမှ ၄၆၅ဦး ၊ ရွေးကောက်ပွဲဆိုင်ရာလုပ်ငန်းစဉ်များကို ကူညီအားဖြည့်ပေးနေသည့် နိုင်ငံတကာ အဖွဲ့အစည်း ၉ခုမှ ၁၈၃ဦး အပါအဝင် ပြည်ပလေ့လာစောင့်ကြည့်သူ ၁၁၁၈ဦး၊ ပြည်တွင်းမှ ရွေးကောက်ပွဲစောင့်ကြည့်လေ့လာရေးအဖွဲ့ ၁၃ဖွဲ့မှ ၉၄၀၆ဦး ၊ ပြည်ပသတင်းမီဒီယာ ၄၅ခုမှ ၂၉၁ဦးတို့ စောင့်ကြည့် လေ့လာမည်ဖြစ်ကြောင်း ပြည်ထောင်စု ရွေးကောက်ပွဲကော်မရှင်ရဲ့ ထုတ်ပြန်ကြေညာချက်အရသိရပါတယ်။

အဆိုပါ အရပ်ဘက်ရွေးကောက်ပွဲ စောင့်ကြည့်ရေး အဖွဲ့အစည်းများ အနက်မှ အချို့မှာ ရွေးကောက်ပွဲအပြီး ၄၈နာရီအတွင်း ကနဦး အစီရင်ခံစာကို ထုတ်ပြန်မည်ဖြစ်သလို ရက်သတ္တပတ်၊ တစ်လအတွင်း ၎င်းတို့ လေ့လာစောင့်ကြည့်ထားသည့် ရွေးကောက်ပွဲဆိုင်ရာ အစီရင်ခံစာများ ထွက်ပေါ်လာဖွယ်ရှိပါတယ်။ ထိုအစီရင်ခံစာများထဲမှာ ၂၀၁၅ ရွေးကောက်ပွဲဟာ ပွင့်လင်းမြင်သာမှု ရှိမရှိ လွတ်လပ်ပြီး တရားမျှတမှုများ မတရားပြုကျင့်ခံရမှုများ ပြုပြင်ပြောင်းလဲရေးနှင့် တိုးတက်ရေးအတွက် ရွေးကောက်ပွဲဆိုင်ရာ ဒီမိုကရေစီ စံနှုန်းများ စတာတွေကို မှတ်တမ်းယူအကဲဖြတ်ပြီး နောင်ကျင်းပမည့် ရွေးကောက်ပွဲများအပေါ် ဝေဖန်ဆန်းစစ်ချက် အကြံပြုချက်များကို ပံ့ပိုးကူညီနိုင်မှာလည်း ဖြစ်ပါတယ်။

ဒါကြောင့် ရွေးကောက်ပွဲကျင်းပရာတွင် ရွေးကောက်ပွဲဆိုင်ရာ မူမမှန်မှုများနှင့် အလွဲသုံးစားပြုမှုများကို ရပ်တန့်စေပြီး သမာသမတ်ရှိမရှိ ပွင့်လင်းမြင်သာမှု တာဝန်ယူမှု တာဝန်ခံမှုများ ရှိမရှိ ဆိုတာကတော့ ဆန်းစစ်ရဦးမည်ဖြစ်သည်။

နိုင်ငံသားတိုင်း ရွေးကောက်ပွဲမှာ ပါဝင်စေပြီး အမှန်တကယ်ပဲ ၂၀၁၅ရွေးကောက်ပွဲဟာ မှန်ကန်ပြီး ဘက်လိုက်မှုကင်းမဲ့စွာ ကျင်းပသည့် လွတ်လပ်တရား မျှတသည့် ရွေးကောက်ပွဲ အစစ်အမှန်ဖြစ်လာမည်လား ဆိုတာကတော့ သန်း၅၀ကျော်သော မြန်မာပြည်သူများက စောင့်ကြည့် လေ့လာ အကဲခတ် ရဦးမည်သာ။     ။

မာန်ထက်သျှံ