အရှက်တကွဲရှုံးနိမ့်မှုမှ မန်စီးတီး ပြန်လာနိုင်မည်ဟု မီလ်နာပြော

နိုဝင်ဘာ ၂၃၊ ၂၀၁၅
M-Media

– မန်စီးတီးမှာ မိမိတို့အသင်းအား အရှက်တကွဲ ရှုံးနိမ့်ခဲ့ရမှုမှ ပြန်လာနိုင်မည်ဖြစ်ပြီး မိမိတို့အသင်းမှာလည်း ယခုပုံစံကောင်းကို ဆက်လက် ထိန်းသိမ်းထားနိုင်မည်ဟု မျှော်လင့်ကြောင်း လီဗာပူးလ်ကွင်းလယ်လူ ဂျိမ်းစ်မီလ်နာက ပြောကြားလိုက်သည်။

၎ ဂိုး ၁ ဂိုးဖြင့် ပွဲပြီးခဲ့သည့် မန်စီးတီး၏ ထိုအရှုံးမှာ အီတီဟတ်ကွင်းသို့ ပြောင်းရွှေ့ကစားပြီးနောက် အိမ်ကွင်း၌ အဆိုးဝါးဆုံး ရှုံးပွဲလည်း ဖြစ်ခဲ့သည်။ မီလ်နာမှာ မန်စီးတီးကစားသမား ဖြစ်ခဲ့ဖူးပြီး လီဗာပူးလ်သို့ ရောက်ရှိလာခဲ့ခြင်းဖြစ်ကာ ထိုအရှုံးက ၎င်း၏အသင်းဟောင်း ပုံစံကောင်းပြန်ရရန် လှုံ့ဆော်မှုဖြစ်မည်ဟု ၎င်းက ဆိုသည်။

“သူတို့ဟာ ထိပ်တန်းကစားသမားတွေ ရှိတဲ့အသင်းပါ။ ပြီးတော့ ဒီအရှုံးက သူတို့ကို နာကျင်စေပါလိမ့်မယ်။ သူတို့ထဲက တစ်ယောက်၊ နှစ်ယောက်လောက်နဲ့ ကျွန်တော် စကားပြောခဲ့ပါတယ်။ သူတို့စိတ်ပျက်နေကြတယ်။ ကျွန်တော်တို့ရဲ့ ကစားပုံကို သူတို့ချီးကျူးခဲ့ကြပြီး သူတို့ အဲဒီထက် ပိုကောင်းကောင်း ကစားနိုင်တယ်ဆိုတာလည်း သူတို့ သိပါတယ်။ သူတို့အတွက် ပွဲကောင်းတွေ ရှေ့မှာရှိနေပြီး ပြန်လာနိုင်မယ်လို့ ကျွန်တော် အသေအချာ ပြောရဲပါတယ်” ဟု မီလ်နာက ပြောကြားခဲ့သည်။

ယခုပွဲအရှုံးကြောင့် ထိပ်ဆုံး၌ ဦးဆောင်နေသည့် မန်စီးတီးမှာ တတိယနေရာအထိ ဆင်းပေးခဲ့ရသည်။

Ref: Goal