ဗဟိုအာဖရိကနိုင်ငံရှိ ပိတ်ဆို့ခံ ဒေသမှ ဗလီဝတ်ကျောင်းတော်ကို ပုပ်ရဟန်းမင်းကြီး သွားရောက်လည်ပတ်

နိုဝင်ဘာ ၃၀၊ ၂၀၁၅
M-Media

– အာဖရိကအလယ်ပိုင်းရှိ ပဋိပက္ခများဖြစ်ပွားရာ ဗဟိုအာဖရိကနိုင်ငံသို့ ရောက်ရှိနေသော ပုပ်ရဟန်းမင်းကြီး ဖရန်စစ်က တင်းမာမှုအမြင့်ဆုံးဒေသကို သွားရောက်ခဲ့ပြီး မွတ်စလင်များ၊ ခရစ်ယာန်များအနေဖြင့် ၎င်းတို့၏ မတူညီမှုကို ဘေးဖယ်ကာ ဆက်ဆံရေး ပြန်လည်တည်ဆောက်ရေး အာရုံစိုက်ရန် တိုက်တွန်းခဲ့သည်။

၂၀၁၃ ခုနှစ် အာဏာသိမ်းမှု ဖြစ်ပွားပြီးကတည်းက ခရစ်ယာန်နှင့် မွတ်စလင်များအကြား အကြမ်းဖက်တိုက်ခိုက်မှု အဖြစ်ပွားဆုံးနေရာမှ တစ်ခုဖြစ်သည့် မြို့တော်ဘန်ဂွီမှ PK5 ခရိုင်ရှိ ကူဒူကူ ဗလီဝတ်ကျောင်းတော်သို့ ယနေ့တွင် သွားရောက်လည်ပတ်ခဲ့စဉ် ထိုကဲ့သို့ ပြောကြားခဲ့ခြင်းဖြစ်သည်။

ပုပ်ရဟန်းမင်းကြီးက ခရစ်ယာန်များနှင့် မွတ်စလင်များကို ညီအစ်ကိုများအဖြစ် သတ်မှတ်ပြောကြားခဲ့ပြီး အမုန်းတရားများကို ဆန့်ကျင်ရန်နှင့် ပြန်လည်ရင်ကြားစေ့ရေးကို ဆက်လက်ဆောင်ရွက်သွားရန် တိုက်တွန်းခဲ့သည်။

“ခရစ်ယာန်နဲ့ မွတ်စလင်တွေဟာ ညီရင်းအစ်ကို မောင်ရင်းနှမတွေပါပဲ။ ဘုရားသခင်ကို ယုံကြည်တယ်လို့ ပြောကြားသူတွေဟာ ငြိမ်းချမ်းတဲ့ အမျိုးသားတွေ၊ အမျိုးသမီးတွေပဲ ဖြစ်ရပါမယ်။ အမုန်းတရား၊ လက်စားချေမှုနဲ့ အကြမ်းဖက်မှုတွေ၊ အထူးသဖြင့် ဘုရားသခင်ရဲ့နာမတော်ကိုကိုင်ပြီး ကျူးလွန်နေကြတဲ့ အကြမ်းဖက်မှုတွေကို အလိုမရှိဘူးလို့ အားလုံး အတူတကွ ပြောကြားရပါမယ်။ ဘုရားသခင်ဆိုတာ ငြိမ်းချမ်းရေး၊ “စလာမ်” ပါပဲ” ဟု ပုပ်ရဟန်းမင်းကြီးက ထည့်သွင်းပြောကြားခဲ့သည်။

မွတ်စလင်အများစုရှိရာ PK5 ဒေသကို “အန်တီဘာလကာ” ခရစ်ယာန်တိုက်ခိုက်ရေးသမားများက လွန်ခဲ့သည့် ၂ လမှစ၍ ၀န်းရံ ပိတ်ဆို့ထားကြပြီး ထိုဒေသသို့ ထောက်ပံ့ရေးပစ္စည်းများ ၀င်ရောက်ခြင်း၊ မွတ်စလင်များ အပြင်ထွက်ခြင်းတို့ကိုလည်း တားမြစ်ထားသည်။

PK5 ဒေသတွင် နှစ်ဖက်လူ့အဖွဲ့အစည်းအကြား လက်စားချေ တုန့်ပြန်မှုများကြောင့် စက်တင်ဘာလနှောင်းပိုင်းမှစ၍ အနည်းဆုံး လူပေါင်း ၁၀၀ ခန့် အသက်ဆုံးရှုံးခဲ့ရသည်ဟု လူ့အခွင့်အရေး စောင့်ကြည့်အဖွဲ့၏ အဆိုအရ သိရသည်။

၂၀၁၃ ခုနှစ် အစောပိုင်းတွင် မွတ်စလင်အများစုပါဝင်သည့် ဆီလီကာသူပုန်များက အာဏာသိမ်းပြီးနောက်ပိုင်း ခရစ်ယာန်အများစုရှိသည့် ဗဟိုအာဖရိကနိုင်ငံတွင် မတည်ငြိမ်မှုများ ဖြစ်ပွားခဲ့ပြီး ခရစ်ယာန်လက်နက်ကိုင်များက တုန့်ပြန်လက်စားချေမှုများလည်း ပေါ်ပေါက်လာခဲ့သည်။

မွတ်စလင်နှင့် ခရစ်ယာန် နှစ်ဖက်စလုံးမှ ခေါင်းဆောင်များကမူ ဘာသာရေးအမုန်းတရားများကို နိုင်ငံရေး အမြတ်ထုတ်ရန်အတွက် အသုံးပြုနေကြသည်ဟု ပြောကြားခဲ့သည်။

ဗလီဝတ်ကျောင်းတော်တွင် ရောက်ရှိနေကြသည့် ပြည်သူများကို ပုပ်ရဟန်းမင်းကြီးက မိန့်ခွန်းပြောရာတွင် ဗဟိုအာဖရိကနိုင်ငံသို့ ၎င်း၏ လာရောက်လည်ပတ်မှုတွင် မွတ်စလင်လူ့အဖွဲ့အစည်းနှင့် ယခုကဲ့သို့ တွေ့ဆုံမှု မပြုပါက မိမိ၏ခရီးစဉ်မှာ ပြည့်စုံမည်မဟုတ်ကြောင်း ထည့်သွင်းပြောကြားခဲ့သည်။

ခရစ်ယာန်များနှင့် မွတ်စလင်များအကြား ပြိုကွဲမှုများကို ပြန်လည်သင့်မြတ်စေရေးမှာ ပုပ်ရဟန်းမင်းကြီး၏ အာဖရိကတိုက်သို့ ပထမဆုံးခရီးစဉ် တစ်လျှောက်လုံးတွင် အဓိက ကဏ္ဍတစ်ခု ဖြစ်ခဲ့သည်။ ပုပ်ရဟန်းမင်းကြီးမှာ ကင်ညာနှင့် ယူဂန်ဒါနိုင်ငံများသို့ သွားရောက်ခဲ့ပြီး ဗဟိုအာဖရိကနိုင်ငံမှာ ၎င်းခရီးစဉ်ဟု နောက်ဆုံးဖြစ်သည်။

ပြန်လည်သင့်မြတ်ရေးကို ကြိုးစားဆောင်ရွက်နေသည့် မွတ်စလင်ခေါင်းဆောင်များထဲမှ တစ်ဦးဖြစ်သူ အီမာမ် တီဒီယာနီ မူဆာ နိုင်ဘီက PK5 ဒေသကို လဟာပြင် အကျဉ်းထောင်ဟု ခေါ်ဆိုခဲ့သည်။ သို့သော်လည်း ယနေ့တွင် မျှော်လင့်ချက်ရှိသည့် မှတ်ချက်ကို ပေးခဲ့သည်။

“ကျွန်တော်တို့နဲ့ ခရစ်ယာန် ညီအစ်ကိုမောင်နှမတွေရဲ့ ဆက်ဆံရေးဟာ သိပ်နက်ရှိုင်းပြီး အဲဒါကို ပျက်ဆီးအောင်လုပ်တဲ့ ဘယ်လိုနည်းလမ်းကမှ အောင်မြင်မှာ မဟုတ်ပါဘူး။ ဒီတိုင်းပြည်က ခရစ်ယာန်နဲ့ မွတ်စလင်တွေဟာ အတူတကွနေထိုင်ဖို့၊ တစ်ဦးနဲ့တစ်ဦး ချစ်ခင်ကြင်နာဖို့ တာဝန်ရှိပါတယ်” ဟု နိုင်ဘီက ပုပ်ရဟန်းမင်းကြီးကို ပြောကြားခဲ့သည်။

နိုင်ငံအတွင်းသို့ ပုပ်ရဟန်းမင်းကြီး လာရောက်မှုကို ခရစ်ယာန်နှင့် မွတ်စလင် နှစ်ဖက်စလုံးက ကြိုဆိုခဲ့ကြပြီး၊ တွေ့ဆုံဆေးနွေးရန် ပြန်လည်စတင်ရန်နှင့် ငြိမ်းချမ်းမှု ပြန်လည်ရရှိရေး ဆောင်ရွက်ချက်များကို ပုံဖော်နိုင်မည်ဟု မျှော်လင့်နေကြသည်။ PK5 ဒေသမှ မွတ်စလင်ထောင်းပေါင်းများစွာမှာ ဒေသအတွင်းရှိ လမ်းတစ်လျှောက်တွင် တန်းစီ၍ ပုပ်ရဟန်းမင်းကြီးအား ကြိုဆိုခဲ့ကြသည်။

ပုပ်ရန်ဟန်းမင်းကြီးမှာ ဗဟိုအာဖရိကနိုင်ငံရှိ အမျိုးသားအားကစားရုံတွင် ထောင်ပေါင်းများစွာသော ကက်သလစ်ခရစ်ယာန်များအား မိန့်ခွန်းပြော၍ ၎င်း၏ ဗဟိုနှင့် အရှေ့အာဖရိကခရီးစဉ်ကို အဆုံးသတ်မည်ဖြစ်ပြီး ရောမသို့ ပြန်သွားမည်ဖြစ်သည်။

Ref: Aljazeera