တစ်ပတ်အတွင်း ဒုတိယမြောက်အဖြစ် အမေရိကန်တွင် သေနတ်ပစ်ခတ်မှု ဖြစ်ပွားပြန်

ဒီဇင်ဘာ ၃၊ ၂၀၁၅
M-Media

– အမေရိကန်ပြည်ထောင်စု ကယ်လီဖိုးနီးယားတောင်ပိုင်းရှိ ဆန် ဘာရ်နာဒီနိုမြို့တွင် သေနတ်ဖြင့်ပစ်ခတ်မှုတစ်ခု ယမန်နေ့က ဖြစ်ပွားခဲ့သောကြောင့် အနည်းဆုံး ၁၄ ဦး သေဆုံးခဲ့သည်ဟု သိရသည်။

မသန်းစွမ်းသူများ စင်တာတွင် အားလပ်ရက်ပါတီ ပြုလုပ်နေချိန် နေ့လည်ပိုင်း၌ ဖြစ်ပွားခဲ့ခြင်းဖြစ်ပြီး ထိုပစ်ခတ်မှုတွင် သေနတ်သမား ၃ ဦးခန့် ပါဝင်ခဲ့ကာ လိုက်လံဖမ်းဆီးမှုအတွင်း သံသယရှိသူ ၂ ဦး သေဆုံးခဲ့သည်ဟု ရဲတပ်ဖွဲ့က ပြောကြားခဲ့သည်။ တတိယ တစ်ဦးကိုမူ ဖမ်းဆီးရမိထားသော်လည်း ၎င်းမှာ သေနတ်ပစ်မှုတွင် ပါဝင်လားဆိုသည်ကို ရှင်းရှင်းလင်းလင်း မသိရှိရသေးပေ။

ထိုပစ်ခတ်မှုအတွင်း ဒဏ်ရာရရှိသူမှာ ၁၇ ဦးရှိခဲ့ပြီး အနက်ရောင်ဇိမ်ခံကားနှင့် ထွက်ပြေးသွားသည့် သေနတ်သမားများကို ရဲတပ်ဖွဲ့ဝင်များက လိုက်လံပစ်ခတ်ခဲ့သည်။

ယမန်နေ့ညနေပိုင်းက ပြုလုပ်ခဲ့သည့် သတင်းစာရှင်းလင်းပွဲတွင် ဆန်ဘာရ်နာဒီနို ရဲတပ်ဖွဲ့အကြီးအကဲ ဂျာရော့ဒ် ဘာရ်ကွမ်က သေဆုံးသွားသည့် သံသယရှိသူ ၂ ဦးမှာ တိုက်ခိုက်ရေးသမားဆန်ဆန် ၀တ်စုံများကို ၀တ်ဆင်ထားပြီး ရိုင်ဖယ်များ၊ ပစ္စတိုများ ကိုင်ဆောင်ထားကြသည်ဟု ပြောကြားခဲ့သည်။ ထို့ပြင် ပစ်ခတ်ခံခဲ့ရသည့် စင်တာတွင်လည်း ပေါက်ကွဲစေတတ်သည့် ပစ္စည်းတစ်ခုကို တွေ့ရှိခဲ့ရသည်ဟု ဆိုသည်။

အာဏာပိုင်များကမူ ထိုတိုက်ခိုက်မှု၏ နောက်ကွယ်မှ အကြောင်းအရင်းကို စုံစမ်းစစ်ဆေးမှုများ ပြုလုပ်နေပြီး လော့စ်အိန်ဂျလိစ်ရှိ FBI ၏ ရုံးခန်းမှ လက်ထောက်ဒါရိုက်တာဖြစ်သူ ဒေးဗစ် ဘောင်ဒစ်ခ်ျက ထိုတိုက်ခိုက်မှုမှာ အလုပ်နှင့်သက်ဆိုင်သည့် တိုက်ခိုက်မှု ဖြစ်နိုင်သကဲ့သို့ အကြမ်းဖက်ဝါဒနှင့်လည်း ပတ်သက်နိုင်သည်ဟု ပြောကြားခဲ့သည်။

ပြီးခဲ့သည့် တစ်ပတ်ကလည်း ကိုလိုရာဒိုပြည်နယ် ကိုလိုရာဒိုစပရင်းမြို့ရှိ ဆေးခန်းတစ်ခုကို လူဖြူအစွန်းရောက်တစ်ဦးက ၀င်ရောက်ပစ်ခတ်သောကြောင့် လူ ၃ ဦးသေဆုံးပြီး ၉ ဦး ဒဏ်ရာရရှိခဲ့သည်။

Ref: Aljzaeera