ဆီးရီးယားစစ်ပွဲတွင် ပါဝင်နေသည်ဟု အစ္စရေး ၀န်ခံ

ဒီဇင်ဘာ ၃၊ ၂၀၁၅
M-Media

– အီရန်ကျောထောက်နောက်ခံပေးသော အစိုးရက IS အပါအ၀င် သူပုန်များနှင့် စစ်ဖြစ်နေသည့် ဆီးရီးယားနိုင်ငံတွင် မိမိတို့တပ်များမှာ စစ်ဆင်ရေးများ ပြုလုပ်နေဟု အစ္စရေးဝန်ကြီးချုပ် နေတန်ယာဟုက အင်္ဂါနေ့တွင် ပထမဆုံးအကြိမ် ၀န်ခံပြောကြားလိုက်သည်။

‘ကျွန်တော်တို့ရဲ့ အတိုက်အခံ မဖြစ်လာအောင် ကာကွယ်တဲ့အနေနဲ့ ဆီးရီးယားမှာ ကျွန်တော်တို့ဟာ မကြာခဏ စစ်ဆင်ရေးတွေ ပြုလုပ်ပါတယ်။ ဆီးရီးယားကနေ လက်ဘနွန်ကို သယ်ဆောင်နေတဲ့ သေစေနိုင်တဲ့လက်နက်တွေကို အဓိကတားဆီးဖို့ ကျွန်တော်တို့ဘာမဆိုလုပ်ပါတယ်’ ဟု နေတန်ယာဟုက သတင်းထောက်များအား ပြောကြားခဲ့သည်။

သို့သော်လည်း နေတန်ယာဟုက အသေးစိတ်ကိုမူ ပြောကြားခဲ့ခြင်းမရှိဘဲ၊ ယခုပြောဆိုမှုမှာလည်း ပဋိပက္ခများ ဖြစ်ပွားနေသည့် ဆီးရီးယားတွင် အစ္စရေးက ပါဝင်နေမှုကို ပထမဆုံး လူသိရှင်ကြား ပြောကြားခဲ့ခြင်းလည်း ဖြစ်သည်။ ဆီးရီးယားမှ လက်ဘနွန်သို့ အီရန်လုပ် လက်နက်များ သယ်ဆောင်မှုကို ပစ်မှတ်ထား၍ လွန်ခဲ့သော လများတွင် မြောက်များစွာသော တိုက်ခိုက်မှုများဖြစ်ပွားခဲ့သည်ကို တွေ့ရှိခဲ့ရသည်။

သို့သော် ယင်းတိုက်ခိုက်မှုများကို အစ္စရေးအာဏာပိုင်များက ၎င်းတို့လုပ်သည်ဟု တရားဝင် ၀န်ခံထားခြင်း မရှိပေ။ မတ်လ ၂၀၁၁ ကတည်းက လက်နက်ကိုင်သူပုန်များနှင့် စစ်ဖြစ်နေသည့် ဆီးရီးယားသမ္မတ အာဆတ်အဖွဲ့အား အစ္စရေးက ဆန့်ကျင်ထားသော်လည်း ထိုစစ်ပွဲတွင် ပါဝင်ခြင်းမှ ရှောင်ရှားခဲ့သည်။

အစ္စရေးမှာ ၁၉၆၇ ခုနှစ် စစ်ပွဲတွင် ဆီးရီးယားရှိ ဂိုလန်တောင်ကုန်း နေရာအများစုကို ရရှိခဲ့ပြီး နောက်ပိုင်းတွင် ထိုနေရာကို သိမ်းပိုက်ခဲ့ကာ အစ္စရေး၏ ထိုလုပ်ရပ်အား နိုင်ငံတကာအဖွဲ့အစည်းက လုံးဝအသိအမှတ် မပြုခဲ့ပေ။

Ref: Alarabiya