IS မှာ အစ္စလာမ်ကို ကိုယ်စားမပြုဘဲ၊ အကြမ်းဖက်ဝါဒ တိုက်ဖျက်ရေးတွင် မွတ်စလင်များ ပါဝင်မှသာ အောင်မြင်မည်ဟု အိုဘားမားပြော

ဒီဇင်ဘာ ၇၊ ၂၀၁၅
M-Media

– IS အဖွဲ့၏ “တစ်ဘ၀စံ ၀ါဒ” က နိုင်ငံအား သွေးကွဲခွင့် ပေး၍မရဘဲ အမေရိကန်မွတ်စလင်များကို အမုန်းတရားများဖြင့် ဘေးဖယ်ခြင်းထက် IS အား အမြတ်ပြတ်သုတ်သင်ရေး ကြိုးပမ်းမှုတွင် ထည့်သွင်းရန် လိုအပ်သည်ဟု မေရိကန်သမ္မတ ဘာရက်အိုဘားမားက ပြောကြားလိုက်သည်။

ယမန်နေ့ညက ရုပ်မြင်သံကြားမှတစ်ဆင့် တိုင်းပြည်အား ပြောကြားသည့်မိန့်ခွန်းတွင် အိုဘားမားက ထိုကဲ့သို့ ပြောဆိုခဲ့ခြင်းဖြစ်ပြီး ပြီးခဲ့သည့်တစ်ပတ်က ကယ်လီဖိုးနီးယားတွင် ဖြစ်ပွားခဲ့သည့် သေနတ်ဖြင့် ပစ်ခတ်မှုကို ထောက်ပြ၍ IS ၏ သြဇာလွှမ်းမိုးမှုကို ဆက်စပ် ပြောကြားခဲ့သည်။

လေ့လာသူများကမူ နိုင်ငံတကာတွင် မကြာသေးမီကာလအတွင်းက တိုက်ခိုက်မှုများ ဖြစ်ပွားခဲ့ပြီးနောက် အမေရိကန်ပြည်သူများအား စိတ်သက်သာရာ ရစေရန် ထိုကဲ့သို့ မိန့်ခွန်းပြောကြားခဲ့ခြင်း ဖြစ်သည်ဟု သုံးသပ်ကြသည်။

“အီရတ်နဲ့ ဆီးရီးယားတို့မှာ စစ်ပွဲကြောင့် ၀ရုန်းသုန်းကားဖြစ်မှုတွေ ဖြစ်လာစဉ်အတွင်း IS လိုအဖွဲ့မျိုးတွေဟာ ကြီးထွား တောင့်တင်းလာကြတဲ့အချိန်၊ မွတ်စလင်နိုင်ငံတွေရဲ့ ဝေးကွာမှုကို အင်တာနက်က ကျုံ့ပေးလိုက်တဲ့အချိန်မှာ ဘော်စတွန်မာရသွန် ဗုံးခွဲသမားလိုမျိုး၊ ဆန်ဘာရ်နာဒီနို လူသတ်သမားတွေလိုမျိုး လူတွေရဲ့ စိတ်ဓာတ်တွေကို အကြမ်းဖက်သမားတွေက အဆိပ်ခပ်ပေးမှုဟာလည်း ကြီးထွားလာပါတယ်” ဟု အိုဘားမားက ပြောကြားခဲ့သည်။

ပြီးခဲ့သည့် အင်္ဂါနေ့က ဖြစ်ပွားခဲ့သော ဆန်ဘာရ်နာဒီနို ပစ်ခတ်မှုမှာ IS ၏ နောက်လိုက်များက ပြုလုပ်ခြင်း ဟုတ်၊ မဟုတ်ကိုမူ FBI က စုံစမ်းစစ်ဆေးမှုများ ပြုလုပ်နေသည်။

မကြာသေးမီက ပြုလုပ်ခဲ့သည့် စစ်တမ်းများအရ သမ္မတအိုဘားမား၏ IS အဖွဲ့အား ကိုင်တွယ်မှုကို အမေရိကန်ပြည်သူ ၅၇ ရာခိုင်နှုန်းက မကျေနပ်ကြဘဲ ၇၂ ရာခိုင်နှုန်းကမူ ထိုဆောင်ရွက်မှုမှာ ဆိုးရွားသည်ဟု ပြောကြားခဲ့ကြသည်။ အခြား ၆၀ ရာခိုင်နှုန်းက IS အဖွဲ့အား တိုက်ခိုက်ရန်အတွက် အီရတ်နှင့် ဆီးရီးယားတို့တွင် အမေရိကန်က စစ်တပ်များကို ပိုမို စေလွှတ်ချိန်တန်ပြီဟု ပြောကြားခဲ့သည်။

အိုဘားမားကမူ IS ၏ ရည်ရွယ်ချက်မှာ ယဉ်ကျေးမှုများ ထိပ်တိုက်တွေ့မှုကို အသုံးပြု၍ မီးမွှေးရန်ဖြစ်သည်ဟု ထပ်လောင်းပြောကြားခဲ့သည်။

“ဒီတိုက်ခိုက်မှုဟာ အမေရိကန်နဲ့ အစ္စလာမ်ကြားက စစ်ပွဲလို့ အဓိပ္ပါယ်သတ်မှတ်တာမျိုးကို ခွင့်ပြုပြီး တစ်ယောက်နဲ့တစ်ယောက် လက်ညှိုးထိုးလို့ မရပါဘူး။ ဒါမျိုးကို IS က လိုချင်နေတာပါ။ IS ဟာ အစ္စလာမ်သာသနာကို ကိုယ်စားမပြုပါဘူး။ သူတို့ဟာ ရာဇ၀တ်သားတွေ၊ လူသတ်သမားတွေ၊ တစ်ဘ၀စံတွေပါပဲ။ ပြီးတော့ တိုင်းပြည်ကို ချစ်မြတ်နိုးပြီး၊ IS ရဲ့ အမုန်းဝါဒကို ဆန့်ကျင်ကြတဲ့ အမေရိကန်မွတ်စလင်တွေ အပါအ၀င် ကမ္ဘာ့တစ်ဝှမ်းက သန်းတစ်ထောင်ကျော်သော မွတ်စလင်တွေထဲကမှ IS ဟာ သေးသေးကွေးကွေး အုပ်စုလေးပါပဲ”

“နောက်ပြီး ကမ္ဘာတစ်ဝှမ်းမှာ အကြမ်းဖက်သမားတွေရဲ့ သားကောင်ဖြစ်နေရသူ အများစုဟာလည်း မွတ်စလင်တွေပါပဲ။ တကယ်လို့ ကျွန်တော်တို့ဟာ အကြမ်းဖက်ဝါဒ တိုက်ဖျက်မှုကို အောင်မြင်လိုတယ်ဆိုရင်တော့ မွတ်စလင်လူ့အဖွဲ့အစည်းတွေကို သံသယတွေ၊ အမုန်းတွေနဲ့ ဘေးဖယ်ထားတာထက် ကျွန်တော်တို့ရဲ့ အခိုင်အမြဲဆုံး မဟာမိတ်တွေအဖြစ် မဖြစ်မနေ ထည့်သွင်းရပါလိမ့်ယ်” ဟု အိုဘားမားက ထည့်သွင်းပြောကြားခဲ့သည်။

ဝါရှင်တန်အခြေစိုက် အမေရိကန်-အစ္စလာမ် ဆက်ဆံရေးကောင်စီမှ တာဝန်ရှိသူ အဒီလ် ရဗ်ဇီကလည်း အိုဘားမား၏ သဘောထားအား သဘောတူညီခဲ့သည်။

“ကမ္ဘာကြီးကို နားလည်အောင်လုပ်ရမယ့် အဓိကအချက်တစ်ခုက နိုင်ငံတစ်ခု၊ ဒေသတစ်ခုတည်းမဟုတ်ဘဲ တစ်ကမ္ဘာလုံးနဲ့ ဆိုင်နေတယ်လို့ သူတို့ရှုမြင်နေကြတဲ့ အကြမ်းဖက်ဝါဒဟာ အစ္စလာမ်ကို ကိုယ်စားမပြုဘူးဆိုတာပါပဲ”

Ref: Aljazeera