အိုလံပစ် ဆုတံဆိပ် တခုရဲ့ တန်ဖိုး

ငြိမ်းချမ်းအေး

၁၂ ၊ သြဂုတ် ၊ ၂၀၁၂

စည်းလုံးခြင်း ရဲ့ သဘော နဲ့ ပျော်ရွှင်မှု တွေဟာ ကူးစက်မြန် ရောဂါတခုလို လူတွေကြား အလျင်အမြန် ပျံ့နှံ့သွားတယ်။ ဒါဟာ လန်ဒန် က အိုလံပစ် ပြိင်ပွဲကြီးမှာတင်မကဘဲ ကမ္ဘာကို ဖြန့် ဖြတ်ကျော်သွားရတယ်။ အထူးသဖြင့် စစ်ဆိုး၊ စနစ်ဆိုးရဲ့ ဒဏ်ကို ဆယ်စုနှစ် ပေါင်းများစွာ ခံစားနေရတဲ့ အာရှတိုက် အလယ်ပိုင်းက ကုန်းတွင်းပိတ် နိုင်ငံငယ်လေးတခုဆီကိုပေါ့..။

ပြီးခဲ့တဲ့ ကြာသာပတေးနေ့ လန်ဒန် အိုလံပစ် တိုက်ကွမ်ဒို ပြိုင်ပွဲ တတိယနေရာလုပွဲမှာ အာဖဂန်နစ်စတန် နိုင်ငံက ရာလ်ဟူး နစ်ပိုင် (Rohullah Nikpai)  ပြိုင်ဘက် ဂရိတ်ဗြိတိသျှ (The Great Britain) အသင်းက ကစားသမားကို အနိုင်ရ ကြေးတံဆိပ်ဆွတ်ခူးပြီး နောက်ပိုင်း လူမှုကွယ်ရက် အင်တာနက် စာမျက်နှာတွေ၊ အီးမေးလ်တွေ မှာ အာဖဂန်နိုင်ငံသားတွေ နဲ့ တကမ္ဘာလုံးက အိုလံပစ် အားကစားချစ်သူတွေရဲ့ ချီးကျူးထောပနာပြုမှုတွေဟာ ပြည့်လျှံ သွားခဲ့ရတယ်။

အသေခံဗုံးခွဲမှု.၊ ကျောင်းတွေမှာ လျှို့ဝှက် ဆန်းကြယ် အဆိပ်သင့်မှု၊ ပြန်ပေးမှု စတဲ့ အနိဌာရုံသတင်းတွေနဲ့ ပြည့်နှက်နေတဲ့ နှစ်တနှစ်ရဲ့ အာဖဂန်ပြည်အတွက် ဒီ အိုလံပစ် ကြေးတံဆိပ်ဟာ ရွှေဆုထက် ပို အဖိုးထိုက်တန်လှပါတယ်။ မတူညီ ကွဲပြားမှုတွေ တင်းကြမ်း နဲ့ ပြိုင်ဆိုင်မှု ပြင်းထန်လှတဲ့ အာဖဂန်က လူမျိုးစု၊ ဘာသာရေး အုပ်စုတွေကြား လူကြီး၊ ကလေး၊ အမျိုးသား၊ အမျိုးသမီးအားလုံးဟာ ဒီဆုတံဆိပ် သတင်းကြောင့် တနေ့တာအတွက်ဖြစ်ဖြစ် တူညီမျှဝေခံစားနိုင်တဲ့ အပျော်နဲ့အတူ ညီညွတ်မှုကို ရရှိခဲ့ကြတယ်။  တာလီဘန်တွေတောင်မှ ဒီအားကစားပွဲ နဲ့ သတင်းကို ရုပ်မြင်သံကြား၊ အင်တာနက် တွေကတဆင့် စောင့်ကြည့် အားပေးရင်း ဝမ်းသာနေကြမယ် ထင်ပါတယ်။

အာဖဂန်သမိုင်းမှာ ဗြိတိသျှ ကို နိုင်တာဟာ အဆန်းတော့ မဟုတ်ပါ။ လွန်ခဲ့တဲ့ ရာစုနှစ် နှစ်ခုအတွင်း ဗြိတိသျှ နဲ့ ဖြစ်တဲ့ စစ်ပွဲသုံးကြိမ်စလုံး အနိုင်ရရှိခဲ့တယ်။ ပြည်ပ ကျူးကျော်မှု တိုင်းကို တွန်းလှန်တိုက်ခိုက်နိုင်စွမ်းတဲ့ အာဖဂန် စစ်သမိုင်းကို ကမ္ဘာက အသိအမှတ်ပြု သိပြီးသားပါ။ ဒါပေမယ့် အခုလို ကမ္ဘာ့လူသားအားလုံး ချစ်ကြည်ရင်းနှီး မိတ်ဆွေသဟာ ဖြစ်မှု နဲ့ ငြိမ်းချမ်းရေး သဘောကို ကိုယ်စားပြု ဖော်ဆောင်တဲ့ အိုလံပစ် အားကစားပွဲမှာ ရာဇဝင် ပြိုင်ဘက်ဟောင်းကို အနိုင်ရရှိတာကတော့ သမိုင်းဝင် မှတ်တမ်း တခု ဖြစ်ခဲ့ရပါပြီ။

လက်ရှိ ကမ္ဘာ့ အခက်ထန် အကြမ်းတန်းဆုံး နဲ့ အန္တရာယ် အများဆုံးနေရာတခုလို ဖြစ်နေတဲ့ အာဖဂန်ပြည်ကို ကိုယ်စားပြု ပြိုင်ပွဲဝင်ခဲ့တဲ့ အသက် (၂၅) အရွယ် တိုက်ကွမ်ဒို ကစားသမားလေး ရာလ်ဟူး အတွက် ဒီလို အနိုင်ရရှိအောင် စွမ်းဆောင်နိုင်မှုမှာ ပြင်းထန်တဲ့ ဖိအားတွေ၊ တာဝန်တွေနဲ့ ပိနေခဲ့ပါတယ်။ အကြောင်းက အာဖဂန်တွေဟာ သွေးနဲ့ရေးတဲ့ သမိုင်းချည်းမဟုတ်ဘဲ သန့်ရှင်း၊ မျှတ၊ ချစ်ကြည် ငြိမ်းချမ်းမှုကို အရင်းတည်တဲ့ စင်ကြယ်တဲ့ ချွေးနဲ့ရေးတဲ့ အိုလံပစ် အားကစားသမိုင်းမှာပါ လူရာဝင် စွမ်းဆောင်နိုင်ကြောင်း ကမ္ဘာကို သက်သေပြနိုင်ဖို့ လိုတဲ့အတွက် ဖြစ်ပါတယ်။ သူ့တိုင်းပြည်အတွက် လူငယ်ကလေး ရာလ်ဟူး သက်သေပြုနိုင်ခဲ့ပါပြီ။

ယူရေးရှန်း၊ တာခ်-မွန်ဂို အနွယ် ပါရှန်စကားပြော ဟာဇရာ လူမျိုးစုဝင် ရာလ်ဟူးလေး ဒီလို အမိ အာဖဂန်ပြည်အတွက် ဂုဏ်ယူဖွယ် စွမ်းဆောင်နိုင်ခဲ့တာဟာ ဒါ ပထမအကြိမ်တော့ မဟုတ်ပါဘူး။ လွန်ခဲ့တဲ့ လေးနှစ် ဘေးဂျင်း အိုလံပစ်မှာလည်း အလားတူ ကြေးတံဆိတ် ဆွတ်ခူးခဲ့ပြီး အာဖဂန်နိုင်ငံ အိုလံပစ်သမိုင်းအတွက် ပထမဦးဆုံး ဆုတံဆိပ် ယူပေးရင်း တိုင်းပြည်ဂုဏ် ဆောင်ခဲ့ဖူးပါတယ်။

သွေးချောင်းစီး မြို့တွင်းတိုက်ပွဲတွေကြား မြို့တော် ကာဘူလ်းရဲ့ ခက်ခက်ကြမ်းတမ်းလှတဲ့ လူမှုဘဝအောက်မှာ အသက် (၁၀) နှစ် အရွယ် ရာလ်ဟူးလေး ဟာ အခြား ရွယ်တူ ကလေးသူငယ် များနဲ့အတူ တိုက်ကွမ်ဒို ပညာရပ်ကိုစတင် ဆည်းပူးလေ့ကျင့်ခွင့်ရခဲ့တယ်။ နောင် မိသားစု စစ်ဒဏ်ကြောင့် တိုင်းပြည်က ထွက်ပြေးရတော့လည်း နေထိုင်ခဲ့ရတဲ့ အီရန်နိုင်ငံက ဒုက္ခသည် စခန်းများစွာရဲ့ အဘက်ဘက်က ပြည့်စုံမှု အားနည်းလှတဲ့ ဘဝမှာလည်း ရာလ်ဟူးလေးဟာ အခြားဘဝတူ ဒုက္ခသည်ကလေးများနဲ့အတူ တိုက်ကွမ်ဒို ကစားနည်းကို တစိုက်မတ်မတ် လေ့ကျင့်ခဲ့တယ်။ တိုင်းပြည် တာလီဘန် လက်က လွတ်လို့ မြို့တော် ကာဘူလ်း ကို ပြန်အခြေချ နေထိုင်ခွင့်ရတော့လည်း အိုလံပစ် အားကစား အစီအစဉ်နဲ့ အစိုးရက ဖွင့်လှစ်ထားတဲ့ အားကစားလေ့ကျင့်ရေးစခန်းမှာ ဆက်လက်လေ့ကျင့်ခဲ့တယ်။

သူရဲ့ ငယ်ဘဝ တိုက်ကွမ်ဒို အားကစားကို စတင် တိမ်းညွတ်ဝါသနာပါလာရမှုကတော့ အာရှ နဲ့ ကမ္ဘာတဝှမ်းမှာ ရေပန်းစားတဲ့ သိုင်းရုပ်ရှင်တွေကြောင့်ပါ။ လူငယ်တိုင်း စိတ်ကူးယဉ်လေ့ရှိတဲ့ ခေတ်သစ် တိုက်ပွဲဝင် စစ်သူရဲကောင်းလေးအဖြစ် မျှော်လင့်ရင်းပေါ့။ ဒါပေမယ့် ဒီအားကစားနည်း နဲ့ တိုင်းပြည်ကို ကိုယ်စားပြု နိုင်ငံတကာမှာ ယှဉ်ပြိုင်ခွင့် ရလာတဲ့ အချိန်ကစပြီးတော့ ဒါဟာ နိုင်ငံ့ ဂုဏ်သိက္ခာ၊ တိုင်းပြည်က လူမျိုးပေါင်းစုံ ရဲ့ စည်းလုံးညီညွတ် သွေးစည်းရေး၊ တိုင်းပြည်မှာ နှစ်ပေါင်းများစွာ မရှိမဖြစ် လိုအပ်နေတဲ့ ငြိမ်းချမ်းရေး အတွက် အင်မတန် အရေးကြီးတဲ့ ပြယုဂ်တခုဖြစ်ကြောင်း ရာလ်ဟူးလေး ကောင်းကောင်းသဘောပေါက်ခဲ့ပါတယ်။ တိုက်ပွဲဝင် စစ်သူရဲကောင်း အနေနဲ့ မဟုတ်ဘဲ တိုင်းပြည်ဂုဏ်ဆောင် ပြိုင်ပွဲဝင် အားကစားသမားကောင်းလေးအနေနဲ့ အမိနိုင်ငံ အကျိုးကို ဖော်ဆောင်ကာ ငြိမ်းချမ်းရေး တိုက်ပွဲကို ငြိမ်းချမ်းတဲ့ အားကစားနဲ့ ရှေ့ဆောင်မယ့် သူရဲကောင်းလေးအနေနဲ့ပေ့ါ။

၂၀၀၈ ဘေးဂျင်း အိုလံပစ်ပွဲမှာ သူ့ရဲ့ အိမ်မက်တွေ စတင်အကောင်အထည် ပေါ်လာခဲ့ပါတယ်။  ကမ္ဘာ့ချန်ပီယံ နှစ်ကြိမ်ရဖူးတဲ့ စပိန်က ပြိုင်ဘက်ကို အနိုင်ယူကာ တိုင်းပြည်အတွက် ပထမဦးဆုံး အိုလံပစ် ဆုတံဆိပ် ယူပေးပြီး အမိမြေကို ပြန်လာတဲ့ နိုင်ငံ့သူရဲကောင်း လူငယ်လေး ရာလ်ဟူးကို အစိုးရက ကား၊ အိမ်၊ ဆုကြေးငွေ ချီးမြှင့်မှုတွေနဲ့အတူ လူမျိုးစုံပါဝင်တဲ့ ထောင်ချီနေတဲ့ အာဖဂန် ပြည်သားတွေဟာ အားရဝမ်းသာ လှိုက်လှိုက်လဲလဲ သောင်းသောင်းဖြဖြကြိုဆို ခဲ့ကြတယ်။ အဲ့အချိန်ဟာ သူချစ်တဲ့ တိုင်းပြည်က လူတွေအတွက် ငြိမ်းချမ်းရေး နဲ့ ညီညွတ်ရေး သဘောတွေကို အားကစား အောင်မြင်မှုကနေတဆင့် ဦးဆောင်လမ်းပြပေးနိုင်ခဲ့တဲ့ အချိန်လည်း ဖြစ်ခဲ့ရတယ်။

အံ့သြဝမ်းသာလွန်းလို့ ကျလုဆဲဆဲဖြစ်နေတဲ့ မျက်ရည်တွေကြား ချိုသာတဲ့ အပြုံးနဲ့အတူ ပြောလိုက်တဲ့ “ဒီဆုတံဆိပ်ဟာ နှစ်ပေါင်း (၃၀) ကျော် ပြင်းထန်တဲ့ စစ်ပွဲဒဏ်ခံပြီးတဲ့ ကျနော့်ရဲ့ တိုင်းပြည်အတွက် ငြိမ်းချမ်းရေး သတင်းစကားလက်ဆောင်ဖြစ်ဖို့ မျှော်လင့်ပါတယ်” ဆိုတဲ့ သူ့ရဲ့ စကားဟာ အာဖဂန်ပြည်သူတွေ ရှေ့ဆက် လျှောက်လှမ်းရမယ့် ဆူးညှောင့်ခလုတ်ပေါင်း မြောက်များစွာနဲ့ ခက်ခဲကြမ်းတမ်းလှတဲ့ ငြိမ်းချမ်းရေး ခရီးကြမ်းအတွက် အားဆေးတခွက်ထက် ပိုခဲ့ရပါတယ်။

ခု လေးနှစ်အကြာမှာလည်း သူဟာ ထပ်မံပြီးတော့ တိုင်းပြည်မှာ စည်းလုံးညီညွတ် တည်ငြိမ် ငြိမ်ချမ်း ဖွံ့ဖြိုးတိုးတက်ဖို့ အရေးကြီးတဲ့ အကြောင်းကို နောက်ထပ် ဆုတံဆိပ်တခု နဲ့ တိုင်းပြည်က လူမျိုးစုံကို သက်သေပြနိုင်ရင်းနဲ့ ကမ္ဘာ့အလယ်မှာလည်း အာဖဂန်ပြည်သူပြည်သားတွေရဲ့ ဂုဏ်ကို ဆောင်နိုင်ခဲ့ပြန်ပါပြီ။  မတူညီ ကွဲပြားမှုတွေ ရှိတဲ့ လူမျိုးစု အုပ်စုလေးတွေဟာ သွေးချောင်းစီး သတ်ဖြတ်မှုတွေ၊ အရိုးစွဲ မုန်းတီးမှုတွေ၊ ငွေကြေး ဥစ္စာ အာဏာ အယူအဆ ဝါဒရေးရာ မာန်မာနအခြေပြု အလုံးစုံ ပျက်စီးရေးကိုသာ ရှေးရှုတဲ့ ပြင်းထန်တဲ့ ပြိုင်ဆိုင်မှုတွေ၊ အကျည်းတန် အရုပ်ဆိုးလှတဲ့ စစ်ပွဲတွေ၊ အစွန်းရောက် ရူးသွပ်မှုတွေထက် သန့်ရှင်းစင်ကြယ် ငြိမ်ချမ်းလှတဲ့ အားကစား ဆိုတဲ့ ခေါင်းစဉ်အောက်မှာ စည်းလုံးညီညွတ် သာယာအေးချမ်းတဲ့ နိုင်ငံတခု အဖြစ် ကိုယ်စားပြုနိုင်တယ်ဆိုတာကို ရာလ်ဟူးလေးရဲ့ အိုလံပစ်ဆုတံဆိပ်တွေက ဖော်ဆောင် ညွှန်းဆိုနေပါပြီ။

တာလီဘန်တွေရဲ့ တကျော့ပြန်ခေါင်းထောင်လာနေမှု၊ ပြည်တွင်းစစ်မီး၊ အစိုးရရဲ့ အကျင့်ပျက်ခြစားမှု၊ ဘိန်းကုန်ကူးမှု ပြဿနာ စတဲ့ အခက်အခဲ အတားအဆီးမျိုးစုံ ပြည့်နှက်နေတဲ့ အာဖဂန်ပြည်သူတွေရဲ့ ရှေ့ဆက်ရမယ့် မနက်ဖန်ပေါင်းများစွာ ကတော့ ခုအခြေအနေ အနေအထားနဲ့ကြည့်ရင် အကောင်းဆုံး အလှဆုံး မဟုတ်သေးပါဘူး။ ရာလ်ဟူးလေးလို တိုင်းပြည်ရဲ့ အနာဂတ် ပါရမီ၊ အရည်အသွေး ရှိ လူငယ်လေးတွေ၊ ပညာတတ်လေးတွေဟာလည်း ခက်ထန်လွန်းတဲ့ အခြေအနေတွေကြောင့် တိုင်းပြည်ကနေ မဖြစ်မနေ စွန့်ခွာနေရဆဲ၊ ဒုက္ခသည် စခန်းတွေမှာ ဘဝတွေကို ရှင်သန်ဖို့ ကြိုးစားနေရဆဲ ဖြစ်ပါတယ်။

ဒါပေမယ့် ဒီ ပထန်၊ တာဂျစ်၊ ဥဇဘက်၊ ရှီယာ၊ ဆွန်နီ၊ ဟာဇရာ စတဲ့ လူမျိုးစုံ နေထိုင်နေတဲ့ တိုင်းပြည်ရဲ့ စဉ်ဆက်မပြတ် ပူဆွေးငိုကြွေးမှု ရက်စွဲတွေနဲ့သာ ပြည့်နှက်နေတဲ့ သမိုင်းမှာ ရာလ်ဟူးလေး အိုလံပစ် ဆုတံဆိပ်ယူပေးခဲ့တဲ့ နေ့ဟာ အတိတ်က အိမ်မက်ရိုင်း၊ အိမ်မက်ဆိုး ဒဏ်ရာ အနာတရတွေကို ဖြေဖျောက်ကုသပေးနိုင်စွမ်းတဲ့ စည်းလုံးပျော်ရွှင်ငြိမ်းချမ်းမှုတွေ အပြည့်နဲ့ နေ့ကလေးတခု ဖြစ်ခဲ့ရပါတယ်။ ဒီနေ့ကလေးကို ဆောင်ကြည်းလာသူဟာ တိုင်းပြည်မှာ ရာစုနှစ်ပေါင်းများစွာ ခွဲခြားဖိနှိပ်ခံခဲ့ရတဲ့ ဟာဇရာ လူမျိုးစုငယ်ဝင် ဖြစ်နေတာဟာလည်း လူမျိုးစုံ ငြိမ်းချမ်းစွာ အတူယှဉ်တွဲ နေထိုင်နိုင်မှုရဲ့ ကောင်းမွန် ပြည့်ဝတဲ့ သဘောကို ဖော်ဆောင်နိုင်တဲ့အတွက် အဓိပ္ပာယ်ပြည့်ဝလှပါတယ်။ ဒါဟာ အာဖဂန်ပြည်သူတွေ အတွက် လှပတဲ့ မျှော်လင့်ချက် အနာဂတ်လည်း ဖြစ်ပါတယ်။

ကျနော်တို့ ဗမာပြည်မှာလည်း လူမျိုးစုံ သွေးစည်းရေးအတွက် စစ်ပွဲတွေ၊ အမုန်းတွေ၊ သေနတ်တွေ၊ ကျည်ဆံတွေ ကို ကျောခိုင်းပြီး ချစ်ကြည်ရင်းနှီးမှုကို ဖြစ်ထွန်းစေတဲ့ ငြိမ်းချမ်းတဲ့ အားကစားပွဲတွေ၊ အားကစားကို အခြေပြုတဲ့ ညီညွတ်တဲ့ စိတ်ဓာတ်တွေ၊ ခိုင်မာတဲ့ တိုင်းပြည် အနာဂတ် ရည်မှန်းချက် တွေ ထားရှိ ဖော်ဆောင်ဖို့လိုပါတယ်။  ရှေ့ဆက် လျှောက်ရမယ့် ဗမာပြည်ရဲ့ အနာဂတ် ခရီးလမ်းဟာလည်း အာဖဂန်လောက် အခြေအနေ မဆိုးပါဘူးလို့ သေချာပေါက် ဆိုနိုင်ပေမယ့် ကိုယ့်အတိုင်းအတာနဲ့ ကိုယ် ကြမ်းတမ်းပြီး ရှည်လျားလှပါသေးတယ်။

ဒါပေမယ့် တိုင်းရင်းသား လူမျိုးစုံ မှီတင်းနေထိုင်နေတဲ့ ကျနော်တို့ ဗမာပြည်မှာ တိုင်းရင်းသာ ပြဿနာ အားလုံး အလုံးစုံ ဖြေရှင်းပြီး စစ်မှန်တဲ့ ငြိမ်းချမ်းရေးနဲ့အတူ ပြည်ထောင်စု စစ်စစ် တည်ထောင်ကာ လူမျိုး၊ ဘာသာ မခွဲ လူမျိုးစု အားလုံး သာတူ၊ ညီမျှစိတ်နဲ့ ဥမကွဲ သိုက်မပျက် နေထိုင်နိုင်ဖို့ ကြိုးစားနိုင်ရင် တိုင်းပြည်လည်း ငြိမ်းချမ်းသာယာ တည်ငြိမ်လာပြီး အဘက်ဘက်က တိုးတက်ဖွံ့ဖြိုးလာကာ နိုင်ငံ့ အားကစား ကဏ္ဍလည်း နိုင်ငံတကာ အဆင့်အတန်းမီလာမှာ ဖြစ်ပါတယ်။ အဲ့အချိန်မှာတော့ ဗမာ့ အိုလံပစ် ဆုတံဆိပ် အိမ်မက်တွေ ဧကံမုချ အကောင်အထည်ပေါ်လာမှာပါ။ အဲ့အချိန်မှာတော့ မွန်၊ မြန်မာ၊ ရခိုင်၊ ရှမ်း၊ ချင်း၊ ကချင်၊ ကရင်၊ ကရင်နီ အစရှိတဲ့ လူမျိုးစုစုံ အားကစားသမားလေးတွေဟာ ရာလ်ဟူးလေးလို တိုင်းပြည်ရဲ့ စည်းလုံးရေး နဲ့ ငြိမ်းချမ်းရေး တရားတွေကို အားကစား ဆုတံဆပ်တွေကနေတဆင့် ဖော်ဆောင်လာနိုင်မှာဖြစ်ပါတယ်။

အာဖဂန်နစ်စတန် လို ကိုယ့်ထက် ရာသီဥတု၊ သဘာဝ အခြေအနေ အပါအဝင် အဘက်ဘက်က ပြည့်စုံမှု၊ အခွင့်အရေးသာ ကောင်းမွန်မှု အားနည်းတဲ့ နိုင်ငံတနိုင်ငံကတောင် ခုအချိန်မှာ အိုလံပစ် ဆုတံဆိပ် ကို နှစ်ကြိမ်ဆက်တိုက် ရယူနိုင်နေပြီဆိုရင် ကျနော်တို့ ဗမာပြည်လည်း ရှေ့လာမယ့် ဆယ်စုနှစ်တွေအတွင်း အိုလံပစ်မှာ ဆုချိတ်အောင် ရည်မှန်းချက်ထား အင်တိုက်အားတိုက် ကြိုးစားရမှာ ဖြစ်ပါတယ်။ ခုလောလောဆယ်မှာတော့ အနီးစပ်ဆုံးဖြစ်တဲ့ နှစ်ပေါင်း (၄၀) ကျော်အတွင်း ပထမဆုံးအကြိမ် အိမ်ရှင်အဖြစ် လက်ခံကျင်းပခွင့်ရတဲ့ လာမယ့် အရှေ့တောင်အာရှ ဆီးဂိမ်း ပြိုင်ပွဲကို တရားမျှတစွာ ကျင်းပပေးရင်းနဲ့ လူမျိုးစုံ ဗမာ့အားကစားသမားများ တိုင်းပြည် ဂုဏ်ဆောင်ကာ ဆုတံဆိပ်အမြောက်အများ ဆွတ်ခူးနိုင်စေဖို့ ဆုမွန်ကောင်းနဲ့ ဆန္ဒပြုလိုက်ပါတယ်။ အဲ့အချိန်မှာလည်း အခုထက်ပို ကြည်နူးဝမ်းမြောက်စိတ်နဲ့ အက်ဆေးစာတမ်းတိုလေးတပုဒ် ရေးပြီး ကိုယ့်တိုင်းပြည်က အားကစားသမားတွေကို အားရပါရ ဂုဏ်ပြုခွင့်ရဖို့ မျှော်လင့်နေပါတယ်။

စာရေးသူထံမှ ခွင့်ပြုချက်တောင်းခံပြီးဖော်ပြပါသည်။