ကမ္ဘာ့ဟဲဗီးဝိတ်ချန်ပီယံသစ် ဖျူရီ ခါးပတ်တစ်ခု ရုပ်သိမ်းခံရ

ဒီဇင်ဘာ ၉၊ ၂၀၁၅
M-Media

– ပြီးခဲ့သည့် သီတင်းနှစ်ပတ်ကျော်ကမှ ကမ္ဘာ့ဟဲဗီးဝိတ်ချန်ပီယံသစ် ဖြစ်လာခဲ့သော ဗြိတိန်လက်ဝှေ့ကျော် တိုင်ဆန်ဖျူရီမှာ ၎င်း၏ IBF ဟဲဗီးဝိတ်ချန်ပီယံဘွဲ့ကို ရုပ်သိမ်းခံလိုက်ရသည်ဟု သိရသည်။

ဖျူရီမှာ ၁၀ စုနှစ်တစ်ခုကြာ ချန်ပီယံဘွဲ့ကို ထိန်းသိမ်းထားနိုင်ခဲ့သည့် ယူကရိန်းလက်ဝှေ့ကျော် ၀လာဒီမီရ် ကလစ်ရ်ှကိုအား ပြီးခဲ့သည့်လက ဂျာမနီတွင် အမှတ်ဖြင့် အနိုင်ထိုးသတ်ကာ WBO၊ WBA၊ IBO နှင့် IBF တို့၏ ဟဲဗီးဝိတ်ချန်ပီယံ ခါးပတ်များကို ရရှိခဲ့ပြီး ကမ္ဘာ့ချန်ပီယံ ဖြစ်လာခြင်းဖြစ်သည်။

IBF မှာ ၎င်းတို့၏ ဟဲဗီးဝိတ်ချန်ပီယံဘွဲ့အတွက် စိန်ခေါ်သူ ယူကရိန်းနိုင်ငံသား ယာချက်စ်လက်ဗ် ဂလာ့ဇ်ကော့ဗ်နှင့် ထိုးသတ်ရန် တောင်းဆိုခဲ့သော်လည်း ကလစ်ရ်ှကိုနှင့် ချုပ်ဆိုခဲ့သည့်စာချုပ်တွင် နောက်တစ်ပွဲထပ်မံထိုးသတ်ရန် ဖျူရီက သဘောတူညီထားခဲ့ခြင်းကြောင့် IBF ၏ တောင်းဆိုမှုကို လိုက်လျောနိုင်ခြင်းမရှိခဲ့ပေ။

ထိုအချက်ကြောင့် IBF က ၎င်းတို့၏ ချန်ပီယံခါးပတ်ကို ပြန်လည်ရုပ်သိမ်းခဲ့ပြီး အဆိုပါ ချန်ပီယံဘွဲ့အတွက် ကလာ့ဇ်ကော့ဗ်နှင် ချားလ်းစ် မာတင်တို့အား ယှဉ်ပြိုင်စေမည်ဖြစ်သည်။

IBF ၏ ထိုလုပ်ရပ်ကို ဖျူရီ၏ ပွဲစီစဉ်သူ မစ်က် ဟန်နက်စီက ဝေဖန်ပြောကြားခဲ့သည်။

“ကျွန်တော့်အမြင်ပြောရရင် IBF ဟာ သူတို့ကိုယ်သူတို့ ရှက်သင့်ပါတယ်။ ပထမတုန်းက သူတို့ဟာ နှစ်ကိုယ်ကြားဆွေးနွေးဖို့ ခေါ်တယ်။ ပြီးတော့ပြန်ဖျက်တယ်။ ကမ်းလှမ်းမှုထပ်လုပ်တယ်။ အဲဒါလည်း ပြန်ဖျက်ပါတယ်။ နောက်တော့ ဖျူရီက ၀င်စွက်လို့မရတဲ့ကိစ္စအတွက် ချန်ပီယံဘွဲ့ကို ရုပ်သိမ်းလိုက်ပါတယ်”

Ref: Dailymail