ရ၀မ်ဒါလူမျိုးတုန်းသတ်ဖြတ်မှုအား စီစဉ်ခဲ့သူတစ်ဦးကို ကွန်ဂိုတွင် ဖမ်းဆီးရမိ

ဒီဇင်ဘာ ၁၁၊ ၂၀၁၅
M-Media

– ရ၀မ်ဒါ လူမျိုးတုန်းသတ်ဖြတ်မှုအတွက် ထိပ်တန်းသံသယရှိသူ ၀ရမ်းပြေ ၉ ဦးမှ တစ်ဦးဖြစ်ပြီး လူသားထုအပေါ် ရာဇ၀တ်မှုများ ကျူလွန်ခဲ့သည်ဟု စွပ်စွဲခံထားရသူ မြို့တော်ဝန်တစ်ဦးအား ကွန်ဂိုနိုင်ငံ၌ ဖမ်းဆီးရမိခဲ့သည်ဟု ကုလသမဂ္ဂက ပြောကြားလိုက်သည်။

ဘာဒစ်လာ့စ် အန်တာဂန်ဇွာဆိုသူဖြစ်ပြီး “ဒေသအတော်များများတွင် တွတ်ဆီလူမျိုး ထောင်ပေါင်းများစွာအား အစုလိုက်အပြုံလိုက် သတ်ဖြတ်မှု” ကို ဆောင်ရွက်ခဲ့ကြောင်း စွပ်စွဲခံထားထားရသူဖြစ်သည်ဟု ကုလကျောထောက်နောက်ခံပြု  နိုင်ငံတကာရာဇ၀တ်ခုံရုံး လုပ်ငန်းစဉ်အဖွဲ့ MICT မှ ယမန်နေ့တွင် ထုတ်ပြန်သော ကြေငြာချက်၌ ဖော်ပြထားသည်။ အန်တာဂန်ဇွာအား ဗုဒ္ဓဟူးနေ့က ဖမ်းဆီးရမိခဲ့ခြင်းဖြစ်သည်။

“အမျိုးသမီးတော်တော်များများကို အဓမ္မပြုကျင့်တာတွေ၊ လိင်ပိုင်းဆိုင်ရာ အကြမ်းဖက်တာတွေကို သူက စီစဉ်ဆောင်ရွက်ပေးခဲ့တယ်လို့ စွပ်စွဲခံထားရပါတယ်” ဟု အဆိုပါ ကြေငြာချက်တွင် ဖော်ပြထားပြီး ဖမ်းဆီးရမိမှု အသေးစိတ်အချက်အလက်ကိုမူ ထည့်သွင်းဖော်ပြထားခြင်း မရှိပေ။

၁၉၉၄ ခုနှစ်က ဖြစ်ပွားခဲ့ပြီး ရက်ပေါင်း ၁၀၀ ခန့် ကြာမြင့်ခဲ့သည့် ဟူတူများ၏ လူမျိုးတုန်းသတ်ဖြတ်မှုတွင် လူ ၈ သိန်းခန့် သေဆုံးခဲ့ပြီး အများစုမှာ တွတ်ဆီလူမျိုးများဖြစ်သည်။

အသက် ၅၃ နှစ်အရွယ်ရှိပြီဖြစ်သည့် အန်တာဂန်ဇွာမှာ လူမျိုးတုံးသတ်ဖြတ်မှု၊ လူသားထုအပေါ်ကျူးလွန်သည့် ရာဇ၀တ်မှုနှင့် ဂျီနီဗာသဘောတူညီချက်အား ချိုးဖောက်မှု စသည့် စွဲချက် ၉ ခုဖြင့် ရ၀မ်ဒါနိုင်ငံ၌ တရားရင်ဆိုင်ရဖွယ် ရှိနေသည်။

ဆုကြေး ဒေါ်လာ ၅ သန်း

အမေရိကန် စစ်ရာဇ၀တ်မှု ဆုကြေးငွေထုတ်ရေး အစီအစဉ်အရ အန်တာဂန်ဇွာအတွက် ကန်ဒေါ်လာ ၅ သန်း ဆုကြေးငွေထုတ်ထားပြီး၊ ၎င်းအား လူမျိုးတုန်းသတ်ဖြတ်မှုပြုလုပ်ရန် အဓိက ဆော်သြသူများထဲမှ တစ်ဦးအဖြစ် သတ်မှတ်ထားသည်။

“အန်တာဂန်ဇွာဟာ ဒေသတွင်းမှာ တွတ်ဆီတွေကို မျိုးဖြုတ်သတ်ဖြတ်ဖို့အတွက် ဆော်သြခဲ့သူအဖြစ်၊ တွတ်ဆီ ဒုက္ခသည်တွေကို သတ်ဖြတ်ဖို့ စီစဉ်ပေးသူအဖြစ် စွပ်စွဲခံထားရပါတယ်” ဟု အမေရိကန် ဆုကြေးငွေအဖွဲ့က ထည့်သွင်းပြောကြားခဲ့သည်။

ရ၀မ်ဒါလူမျိုးတုန်းသတ်ဖြတ်မှုနောက်ပိုင်းတွင် အန်တာ ဂန်ဇွာမှာ အိမ်နီးချင်းကွန်ဂိုနိုင်ငံသို့ ထွက်ပြေးခဲ့ပြီး တွတ်ဆီဦးဆောင်သည့် ကွန်ဂိုအစိုးရအား ဖြုတ်ချရန်အတွက် ကြိုးစားနေသော ရ၀မ်ဒါမှ ဟူတူ သူပုန်အုပ်စု FDLR ၏ ကာကွယ်မှုအောက်တွင် နှစ်များစွာကြာ နေထိုင်ခဲ့သည်။

Ref : Aljazeera