ဂျာမနီရှိ Facebook ရုံး အဆောက်အဦး ဖျက်ဆီးခံရ

ဒီဇင်ဘာ ၁၄၊ ၂၀၁၅
M-Media

– ဂျာမနီနိုင်ငံမြောက်ပိုင်း ဟမ်းဘတ်မြို့ရှိ Facebook ရုံခန်းများရှိရာ အဆောက်အဦးမှာ တိုက်ခိုက်ဖျက်ဆီးမှု ခံခဲ့ရသည်ဟု ရဲတပ်ဖွဲ့က ယမန်နေ့တွင် ကြေငြာချက်ထုတ်ပြန်ခဲ့သည်။

စနေနေ့က ဖြစ်ပွားခဲ့သည့် အဆိုပါတိုက်ခိုက်မှုအား အနက်ရောင်အင်္ကျီနှင့် ခေါင်းစွပ်များ ၀တ်ဆင်ထားသည့် လူ ၁၅ မှ ၂၀ ခန့် ပါဝင်သော အုပ်စုက ပြုလုပ်ခဲ့ခြင်းဖြစ်ပြီး အဆောက်အဦးရှိ မှန်များကို ရိုက်ခွဲကာ နံရံတွင်လည်း Facebook dislike ဆိုသည့် စာသားကို စပရေးဖြင့် ရေးသားခဲ့သည်။

Facebook မှာ ၎င်းတို့၏ စာမျက်နှာတွင် လူမျိုးရေး အမုန်းစကားမှတ်ချက်များကို ဖယ်ရှားရန် ပျက်ကွက်ခဲ့သည်ဟုဆိုကာ Facebook ၏ ဥရောပဆိုင်ရာ အကြီးအကဲမှာ ဂျာမနီတွင် စုံစမ်းစစ်ဆေးမှုများကို ခံနေရသည်။

ဂျာမနီရှိ နိုင်ငံရေးသမားများနှင့် ထင်ရှားကျော်ကြားသူများမှာ Facebook ၌ ဂျာမနီနိုင်ငံသားများ၏ နိုင်ငံခြားသားမုန်း သဘောထားများကို ဖော်ပြမှု မြင့်တက်လာခြင်းအတွက် စိုးရိမ်မိသည်ဟု ပြောကြားခဲ့ကြပြီးနောက်ပိုင်း ထိုစုံစမ်းစစ်ဆေးမှုကို ပြီးခဲ့သည့်လက စတင်ခဲ့ခြင်းဖြစ်သည်။

ထိုကဲ့သို့ အမုန်းစကားများ မဖယ်ရှားမှုအတွက် ဥရောပ မြောက်ပိုင်း၊ အလယ်ပိုင်းနှင့် အရှေ့ပိုင်းဆိုင်ရာ Facebook ၏ မန်းနေးဂျင်းဒါရိုက်တာဖြစ်ပြီး ဟမ်းဘတ်တွင် အခြေစိုက်သည့် မာတင်အော့တ်က တာဝန်ယူရမည်ဟု စုံစမ်းစစ်ဆေးမှုနှင့် နီးစပ်သည့် အမျိုးသမီးတစ်ဦးက ပြောကြားခဲ့သည်။

ထိုစုံစမ်းစစ်ဆေးမှုနှင့် ပတ်သက်၍ Facebook ၏ ပြောရေးဆိုခွင့်ရှိသူတစ်ဦးက “ဒီစွပ်စွဲချက်တွေဟာ အခြေအမြစ်မရှိဘူးလို့ ပြောလို့ရပါတယ်။ Facebook နဲ့ သူတို့ရဲ့ လုပ်သားတွေဟာ ဂျာမနီရဲ့ ဥပဒေကို ချိုးဖောက်မှု မရှိခဲ့ပါဘူး” ဟု ပြီးခဲ့သည့်လက ပြန်လည်ဖြေရှင်းခဲ့သည်။

မာလ်တီမီဒီယာ ၀န်ဆောင်မှုကုမ္ပဏီများအား စေတနာ့ဝန်ထမ်း စောင့်ကြည့်နေသည့် FSM အဖွဲ့နှင့် မိတ်ဖက်ဖြစ်သည့် Facebook မှာ မိမိတို့၏ အသုံးပြုသူများကို လူမျိုးရေးခွဲခြားမှုအား ဆန့်ကျင်ရေး တွန်းအားပေးသွားမည်ဟု ဆိုသည်။

Ref: The Guardian