ယီမင်ပြည်တွင်းစစ် အပစ်ရပ်ရေး သဘောတူညီချက်ရရှိ

ဒီဇင်ဘာ ၁၄၊ ၂၀၁၅
M-Media

– ယီမင်ပြည်တွင်းစစ် အဆုံးသတ်ရေးအတွက် အင်္ဂါနေ့တွင် ဆွစ်ဇာလန်၌ ပြုလုပ်မည့် ငြိမ်းချမ်းရေးဆွေးနွေးပွဲအလို တစ်ရက်ဖြစ်သော ယနေ့တွင် ပဋိပက္ခတွင် ပါဝင်ကြသည့် နှစ်ဖက်စလုံးက တစ်ပတ်တာကြာမြင့်မည့် အပစ်ရပ်ရေးကို သဘောတူညီခဲ့ကြသည်ဟု သိရသည်။

ဆွေးနွေးပွဲတွင် သမ္မတ ရဘ်ဘူ မန်ဆူရ် ဟာဒီ၏ ကိုယ်စားလှယ်အဖွဲ့ကို ဦးဆောင်မည့် ယီမင်နိုင်ငံခြားရေးဝန်ကြီး အဘ်ဒဲလ် မာလစ် အလ်-မခ်လာဖီက တိုက်ခိုက်မှုများမှာ ဒီဇင်ဘာ ၁၄ ရက်နေ့ ညနေပိုင်းတွင် ရပ်တန့်မည်ဟု ပြောကြားခဲ့သည်။

အီရန်ကျောထောက်နောက်ခံပြုထားသည့် ဟူသီသူပုန်များဘက်မှ ပြောရေးဆိုခွင့်ရှိသူ တစ်ဦးကလည်း တိုက်ခိုက်မှုများ ရပ်တန့်ရေး သဘောတူညီချက်ရရှိမှုကို အတည်ပြုခဲ့သည်။

ယီမင်တွင် အစိုးရကို ထောက်ခံသူများနှင့် ဟူသီသူပုန်များအကြား တိုက်ခိုက်မှုများ ဖြစ်ပွားနေသည်မှာ ၉ လကျော် ကြာမြင့်နေပြီဖြစ်ပြီး ဆော်ဒီဦးဆောင်သည့် မဟာမိတ်များကလည်း လေကြောင်းမှတိုက်ခိုက်ပေးခြင်း၊ မြေပြင်တပ်များ ချထားပေးခြင်းတို့ဖြင့် အစိုးရတပ်ဖွဲ့များအား ကူညီနေသည်။

တိုက်ခိုက်မှုများကြောင့် လူပေါင်း ၆၀၀၀ ကျော် သေဆုံးခဲ့ပြီး ထိုအထဲတွင် ကလေးငယ် ၆၃၇ ဦး ပါဝင်ခဲ့သည်ဟု ကုလ၏ ထုတ်ပြန်ချက်များအရ သိရသည်။

Ref: Aljazeera