ကစားသမားများ သစ္စာဖောက်နေသည်ဟု ခံစားရကြောင်း မော်ရင်ဟိုပြော

ဒီဇင်ဘာ ၁၅၊ ၂၀၁၅
M-Media

– ရလဒ်ဆိုးများနှင့် ကြုံတွေ့နေရပြီး ဖိအားဒဏ်ကို ခံနေရသည့် ချယ်ဆီးနည်းပြ မော်ရင်ဟိုက ကစားသမားများမှာ မိမိအား သစ္စာဖောက်နေသည်ဟု ခံစားရကြောင်း ပြောကြားလိုက်သည်။

ယနေ့မနက်က လက်စတာအသင်းနှင့် ကစားခဲ့သည့်ပွဲတွင် ချယ်ဆီးမှာ ၂ ဂိုး ၁ ဂိုးဖြင့် ရှုံးနိမ့်ခဲ့ပြီး ပရီးမီးယားလိဂ် ၉ ပွဲမြောက်အရှုံး ဖြစ်ခဲ့သည်။ လက်ရှိတွင် ချယ်ဆီးမှာ အဆင့် ၁၆ နေရာသို့ ရောက်ရှိနေကာ တန်းဆင်းဇုန်နှင့် ၁ မှတ်သာ ကွာဟတော့သည်။

“ကျွန်တော်တို့ ၂ ဂိုးပေးလိုက်ရပြီး ဒါဟာ ကျွန်တော့်အတွက် လက်မခံနိုင်စရာပါပဲ။ ကျွန်တော့်ရဲ့ အကောင်းဆုံး စွမ်းရည်တွေထဲက တစ်ခုဟာ ကစားသမားတွေရဲ့စိတ်ကို ဖတ်တာနဲ့ ပြိုင်ဘက်အသင်းရဲ့ အသေးစိတ်အချက်အလက်တိုင်းကို ဖော်ထုတ်တာပါပဲ။ ကျွန်တော့်ရဲ့အလုပ်က သစ္စာဖောက်ခံနေရပြီလို့ ခံစားရပါတယ်။ အကောင်းဆုံးအခြေအနေမရှိတဲ့ ကစားသမားတွေရှိနေတဲ့အခါ ဂိုးတွေသွင်းဖို့ဆိုတာ ခက်ခဲပါတယ်” ဟု မော်ရင်ဟိုက Sky Sports သို့ ပြောကြားခဲ့သည်။

ချယ်ဆီးမှာ လက်ရှိပရီးမီးယားလိဂ်ချန်ပီယံဖြစ်သော်လည်း မော်ရင်ဟိုကမူ မိမိတို့အသင်းမှာ ထိပ်ဆုံး ၄ သင်းပင် မ၀င်နိုင်တော့ဟု ၀န်ခံပြောကြားခဲ့သည်။

Ref: Goal