ပြင်သစ်ရွေးကောက်ပွဲတွင် အမျိုးသားရေးဝါဒီများ မရှုမလှ ရှုံးနိမ့်ခဲ့

ဒီဇင်ဘာ ၁၈၊ ၂၀၁၅

Front National – FN ပါတီခေါင်းဆောင် မာရီနာလီပင်အား ၂၀၁၅ ခုနှစ် အောက်တိုဘာလအတွင်း မဲဆွယ်ပွဲ၌ တွေ့ရစဉ် (ဓာတ်ပုံ – AFP)

– ၂၀၁၅ ဒီဇင်ဘာ ၁၃ ရက်ညဥ့်၌ ရွေးကောက်ပွဲအတွက် အစွန်းမရောက်ပြင်သစ်ပြည်သူတို့၏ မဲဆန္ဒများက လက်ျာစွန်းရောက်ခေါင်းဆောင် မာရီနီလီပင်၏ အမျိုးသားတပ်ဦးပါတီအား တုန်လှုပ်သွားစေခဲ့သည်။ သို့သော် သူမသည် သမ္မတလောင်းနေရာ၏လမ်းကြောင်းတွင် ရှိနေဆဲဟု ခေါင်းမာစွာ တင်းခံပြောကြားနေကြောင်း ပဲရစ်ရှိ John Lichfield ပေးပို့သောသတင်းများအရ သိရသည်။

လက်ျာစွန်းရောက် FN ပါတီသည် ဒုတိယအကျော့ ဒေသတွင်း ရွေးကောက်ပွဲ၌ ၎င်းတို့အပေါ် စိတ်ပျက်နေကြသည့် အစွန်းမရောက်ပြည်သူများ၏ ဆန္ဒမဲလှိုင်းလုံးကြီးကြောင့် ၂၀၁၅ ဒီဇင်ဘာ ၁၃ ရက်ညဥ့်က မထင်မှတ်လောက်အောင် အလဲထိုးခံလိုက်ရသည်။

ပြီးခဲ့သည့်ရက်သတ္တပတ် တနင်္ဂနွေက မာရီနီလီပန်၏ လက်ျာစွန်းရောက်ပါတီသည် ပထမအကျော့မဲပေးခြင်း၌ ပြင်သစ်နိုင်ငံ၏ အခရာကျသောဒေသ ၁၂ ခုအနက် ၆ ခုတွင် အနိုင်ရနေခဲ့သဖြင့် ဥရောပတစ်ခွင်မှ စိတ်အားထက်သန်စွာစောင့်ကြည့်ခဲ့ကြ၏။ သို့သော်လည်း ၎င်း၏သရဖူကို ပြည်လုံးကျွတ်မဲစာရင်း၌မူ မထိန်းသိမ်းနိုင်တော့ချေ။

ဝန်ကြီးချုပ် မန်နျူယယ်ဗောစ်က ထွက်ပေါ်လာသည့်ရလဒ်ကို “ကျွန်ုပ်တို့တိုင်းပြည်၏ အမှောင်မိုက်ဆုံးကာလများ၌ အမြဲတစေ အနိုင်ရစေခဲ့သည့် ညီနောင်မောင်နှမစိတ်ဓာတ်၊ တူညီသဘောထားနှင့် စည်းလုံးပါဝင်ခြင်းတို့၏ တန်ဖိုးများ၊ ၎င်းအပြင် လူထုအောင်ပွဲကြီးတစ်ခု” ဟူ၍ ဂုဏ်ယူစွာပြောဆိုလိုက်သည်။

မြောက်ပိုင်း Calais-Lille-Amiens ဒေသကို ကိုယ်စားပြု၍ ကိုယ်တိုင်ဝင်ပြိုင်သော မစ္စ လီပင်၊ သူမ၏တူမဖြစ်သူ အရှေ့တောင်ပိုင်းဒေသကိုယ်စားပြု Marion Mareဲchal-Le Pen (၂၆ နှစ်) အပါအ၀င် FN ပါတီကိုယ်စားလှယ်လောင်းများမှာ လက်ဝဲယိမ်းနှစ်သက်သူများ၏ နည်းဗျူဟာမြောက် မဲထည့်ဝင်မှုကြောင့် အလူးအလဲ ရှုံးနိမ့်သွားသည်။ ကနဦးပိုင်းတွင် မဲထည့်ရန် ယာယီငြင်းဆိုထားသည့် ၃.၅ သန်းသော မဲဆန္ဒရှင်တို့က ထိုသူတို့နှင့်ဆန့်ကျင်ဖက်သို့ ပြန်လှည့်စုပြုံ မဲပေးခဲ့ကြခြင်းကြောင့်ဖြစ်သည်။

ထိုရလဒ်က ဒေသတွင်း သရဖူဆောင်းရန် မျှော်လင့်နေပြီး၊ ၂၀၁၇ ခုနှစ်တွင် Elyseဲe နန်းတော်အား မဖွယ်မရာပြုလုပ်လိုနေသည့် မစ္စလီပင် (၄၇ နှစ်) အား အပြင်းအထန် စိတ်ပျက်စရာ ဖြစ်သွားစေခဲ့သည်။

FN ပါတီသည် ၂၀၁၂ သမ္မတနေရာရွေးကောက်ပွဲ၌ လူထု၏မဲဆန္ဒ ၆.၄ သန်းကို ရယူနိုင်ခဲ့သလို ယခုတစ်ခါတွင်လည်း ၇ သန်းနီးပါးခန့် အလားတူ ရယူစုဆောင်းနိုင်ခဲ့သည်ကို တွေ့ရသည်။ ဒေသတွင်း သြဇာထူထောင်လိုမှု ရှုံးနိမ့်လင့်ကစား မစ္စလီပင်၏ ပါတီသည် နိုင်ငံရေးပါတီနှစ်ရပ်အနက် အတိုက်အခံအင်အားစုအနေဖြင့် ၎င်း၏အင်အားကိုသုံးကာ ကြားနေအုပ်စုဖယ်ရှားခြင်းအတွက် ခြိမ်းခြောက်နေသေးသည်။

သူမ၏ပါတီရှုံးနိမ့်သည့်သတင်းထွက်ပေါ်ခဲ့သော်လည်း အထက်စီးစကားဆိုနေဆဲ လီပင် (ဓာတ်ပုံ – AFP)

သူမက အဆိုပါရလဒ်ကို ၁၈ လတာ ကာလအတွင်း သူမအား သမ္မတနေရာဝင်ပြိုင်စေသော “ကြောက်မက်ဖွယ်အောင်မြင်မှုတစ်ရပ်” ဟု ဆိုခဲ့၏။

“တိုင်းပြည်မှာ အင်အားစုနှစ်ရပ်ထဲ ရှိကြောင်း ဒီရွေးကောက်ပွဲက ပြသလိုက်ပါတယ်။ နိုင်ငံတကာအရှုပ်အထွေးကိစ္စတွေနဲ့ ပြင်သစ်ပြည်ကို နစ်မြုပ်သွားစေလိုတဲ့ ကမ္ဘာ့အရေးအင်အားစု (နဲ့) အမျိုးသားရေးနဲ့မျိုးချစ်အင်အားစုတွေပဲ ဖြစ်တယ်”။

လွန်ခဲ့သည့်လအတွင်း လူပေါင်း ၁၃၀ သေဆုံးခဲ့သော ပဲရစ်တိုက်ခိုက်မှုဂယက်များအောက်မှ ရွေးကောက်ပွဲကို ကျင်းပခဲ့ခြင်းဖြစ်သည်။ မကျော်ကြားလှသော ဆိုရှယ်လစ်အုပ်စုမှ ပြဋ္ဌာန်းလိုက်သည့် မပြတ်မသား ဈေးကွက်တံခါးဖွင့် ပြန်လည်ပြုပြင်ရေးဝါဒ၊ စံချိန်တင်အလုပ်လက်မဲ့ပြဿနာ၊ စီးပွားရေးထစ်ငေါ့နေမှု၊ အသုံးစားရိတ်လျှော့ချမှု စသည်တို့ကိုလည်း ဆန့်ကျင်သည့် မဲဆွယ်မှုများရှိခဲ့ကြသည်။

ပထမအကျော့ မဲရလဒ်အပေါ် FN ၏ခေါင်းထောင်မှုသည် ပြင်သစ်၌ ပြည်တွင်းစစ်ဖြစ်ပွားစေနိုင်ကြောင်း မစ္စတာဗောစ်၏ ပြောကြားချက်အပါအ၀င် ပြည်တွင်းပြည်ပ၏ ပြတ်သားသည့်တုန့်ပြန်မှုများက မဲမထည့်လိုသူ သိန်းချီလူထုများအား စုစည်းနိုင်ခဲ့သည်။ ပထမအကျော့က မဲရှောင်သူ ၅၀ ရာခိုင်နှုန်းဝန်းကျင်အား ဒုတိယအကျော့တွင် မဲထည့်သူ ၅၉ ရာခိုင်နှုန်းဖြစ်စေသည်အထိ လှည့်ပြောင်းသွား၏။ အထူးသဖြင့် FN ပါတီမှ အနိုင်ရရန် မျှော်လင့်ထားသည့် နာမည်ကြီးဒေသသုံးခုအတွင်း ယင်းသို့ မြင့်တက်ပြောင်းလဲသွားခဲ့ပေသည်။

FN ပါတီ၏ နည်းဗျူဟာမြောက်ခြေလှမ်းကြောင့် မြောက်ပိုင်းနှင့်အရှေ့ပိုင်းဒေသကြီးနှစ်ခု၌ အာဏာရ ဆိုရှယ်လစ်တို့ အကြီးအကျယ် ရှုံးနိမ့်ခဲ့သည်။ သို့ဖြင့် မိမိတို့၏ကိုယ်စားလှယ်အားလုံး ရှုံးနိမ့်ရသဖြင့် ၎င်းတို့က လက်ဝဲယိမ်းမဲဆန္ဒရှင်တို့ကို ကြားနေအဖြစ် ပြောင်းလဲရေးသို့ ခွင့်ပြုပေးခဲ့ကြသည်။

အစောပိုင်းခန့်မှန်းချက်များအရ မစ္စလီပင်သည် သူမ၏ နိုင်ငံရေးဗဟိုပြုခံတပ်ဖြစ်သော Nord-Pas de Calais-Picardy နယ်တွင် သောင်ပြိုကမ်းပြို အနိုင်ရထားခဲ့ကြောင်း ဖော်ပြသည်။ ၎င်း၌ ဆန္ဒမဲ ၄၂ ရာခိုင်နှုန်းရရှိခဲ့၏။ သို့သော် ထိုပထမအကျော့ကရရှိခဲ့သော ၄၀ ရာခိုင်နှုန်းကျော်ထက် ထပ်တိုးမလာတော့ပေ။ သူမ၏ပြိုင်ဖက် လက်ျာယိမ်းကြားနေသူ ကျန်းမာရေးဝန်ကြီးဟောင်း ဇေဗီယာ ဘာထရန်က ၅၈ ရာခိုင်နှုန်း ရရှိခဲ့သည်။

တောင်ပိုင်းရှိ Marseilles-Nice ဒေသတွင် Marion Mareဲchal-Le Pen သည်လည်း လက်ျာယိမ်းကြားနေ ကိုယ်စားလှယ်ဖြစ်သော Nice မြို့တော်ဝန် Christian Estrosi ၏အလဲထိုးခြင်းကို ခံလိုက်ရသည်။ သူမ၏ ၄၅ ရာခိုင်နှုန်းကို သူ၏ ၅၅ ရာခိုင်နှုန်းမဲဖြင့် အနိုင်ရခဲ့သည်။

ပြင်သစ် အရှေ့မြောက်ပိုင်း Alsace-Lorraine ၊ Champagne နှင့် Ardennes ဒေသတစ်ကြောတွင် ဒေသခံ ဆိုရှယ်လစ်ခေါင်းဆောင်က ဆုတ်ခွာကျောခိုင်းမှုကို လက်မခံခဲ့။

မည်သို့ပင်ဆိုစေကာမူ မြောက်များစွာသော လက်ဝဲယိမ်းသမားများက လက်ျာယိမ်းကြားနေ ကိုယ်စားလှယ်အား ဆန္ဒမဲလှည့်ပြောင်းထည့်ကာ ၎င်းကို ၄၆ ရာခိုင်နှုန်းဖြင့် အနိုင်ပေးလိုက်ကြသည်။ FN က ၃၇ ရာခိုင်နှုန်း၊ ဆိုရှယ်လစ်က ၁၆ ရာခိုင်နှုန်း အသီးသီးရရှိခဲ့ကြသည်။

မစ္စတာ ဆာကိုဇီ၏ လက်ျာယိမ်းကြားနေပါတီဖြစ်သော Les Reဲpublicains က တောင်စွန်းပိုင်းဒေသ Languedoc-Roussillon-Midi-Pyrenees မှ ကျန်ရှိနယ်ပယ်များကို FN အပေါ် အနိုင်ယူရေးအတွက် တိုးဝင်ခဲ့ကြသည်။ နောက်ဆုံးသော ဆိုရှယ်လစ် ကိုယ်စားလှယ်မှ ရှောင်တခင် မထင်မှတ်သောမဲတို့ဖြင့် လီပင်၏လုပ်ဖော်ကိုင်ဖက်နှင့် FN ၏ ဒုဥက္ကဋ္ဌဖြစ်သော လက်ျာစွန်းရောက်ကိုယ်စားလှယ် Louis Aliot အား ဖြတ်ကျော်သွားသည်။

FN ပါတီသည် ယခင်ရက်သတ္တပတ်၌ အခြားဒေသသုံးခုအတွင်း ပထမနေရာရောက်နေရာမှ ပြီးခဲ့သည့်တနင်္ဂနွေညဥ့်တွင်မူ အားလုံးကို လက်လွှတ်ဆုံးရှုံးသွားခဲ့သည်။ အဘယ်ကြောင့်ဆိုသော် အပယ်ခံပါတီငယ်တို့ထံမှ မဲများကို လက်ဝဲ သို့ လက်ျာယိမ်းကြားနေ လူထုပါတီများမှ ရက်သတ္တပတ်အတွင်း ပြတ်သားထင်ရှားစွာ သိမ်းယူသွားနိုင်၍ဖြစ်သည်။

သမ္မတဟောင်း နီကိုလပ် ဆာကိုဇီ ဦးဆောင်သော လက်ျာယိမ်းကြားနေ Reဲpublicians ပါတီက ဒေသကြီး ၇ ခု သို့မဟုတ် ၈ ခု၌လည်းကောင်း၊ ဆိုရှယ်လစ်ပါတီက ၄ ခု သို့မဟုတ် ၅ ခု၌လည်းကောင်း ကြီးစိုးသွားသည်။ မစ္စတာ ဆာကိုဇီက မိမိ၏ ပါတီဝင်အောက်ခြေအဆင့်များအဖို့ နားလည်လက်ခံရန် လိုအပ်နေသေးသော အောင်ပွဲတစ်ရပ်ဟု ဆိုလိုက်သည်။ လက်ဝဲသမားတို့၏ ဘက်ပြောင်းမှုမပါဝင်လျှင် FN အားရှုံးနိုင်ချေရှိသော ဒေသသုံးခုတွင် အနိုင်ရလာမှုကို ဆိုလိုသည်။

ယမန်နှစ်မှစ၍ ကိုယ်ပိုင်အစိုးရအုပ်ချုပ်ရေးပေးရန် ကြိုးစားနေသော နယ်ပယ်ကြီး ၁၂ ခုအတွင်း ရွေးကောက်ပွဲမှာ အကြိတ်အနယ်ဖြစ်ခဲ့သည်။ တနင်္ဂနွေနေ့က Corsica ဒေသ၌လည်းကောင်း၊ ပြည်ပရှိ ပြင်သစ်အစိုးရဋ္ဌာနများ၌လည်းကောင်း မဲထည့်ခဲ့ကြသည်။

မာရီနီ လီပင်သည် သူမဖက်ရပ်တည်သည့်လူဦးရေအင်အား တောင့်တင်းနေသေးသော်လည်း ထိုကိန်းဂဏန်းက ၂၀၁၇ ခုနှစ်တွင် သမ္မတလီပင် ဘ၀ရောက်ရန်လိုအပ်သည့် တစ်နိုင်ငံလုံး၏မဲအများစု ၅၀ ရာခိုင်နှုန်းရရန်အထိတော့ ဝေးကွာလွန်းလှသည်။

FN ပါတီသည် အငယ်စား၊ အလတ်စားမြို့လက်တစ်ဆုပ်စာထက် ကြီးမားကျယ်ပြန့်သော မဲဆန္ဒနယ်ကြီးတစ်ရပ်မှာပင် အနိုင်ရရန် မစွမ်းဆောင်နိုင်ခဲ့။ သို့ဆိုလျှင် ဒေသတစ်ခု၌အနိုင်ရရှိယုံဖြင့် နိုင်ငံကြီးတစ်ခုလုံးကို အဆုံးသတ် အုပ်ချုပ်သွားနိုင်လိမ့်မည်ဟု လူထုက မည်သို့ယုံကြည်လက်ခံရပါတော့မည်နည်း ?

(The Independent မှ ဖော်ပြသော John Lichfield ၏ France election: Front National fails to win a single region in second round of voting – but Marine Le Pen insists she’s still on course for presidency ဆောင်းပါးကို မြင့်မိုရ်မောင်မောင် မှ ဆီလျော်အောင် ပြန်ဆိုသည်။)