အာဖရိကန်ကျောင်းသား၏ အသားအရောင်အား နောက်ပြောင်မှုအတွက် တောင်ကိုရီးယားသမ္မတလောင်း ပြန်လည်တောင်းပန်

ဒီဇင်ဘာ ၁၉၊ ၂၀၁၅
M-Media

– တောင်ကိုရီးယား၏ နောက်ထပ်သမ္မတဖြစ်မည်ဟု ရေပန်းစားနေသည့် ကင်မ်မူဆန်က အာဖရိက ကျောင်းသားတစ်ဦးအား အသားအရောင်အရ လှောင်ပြောင်ပြောဆိုခဲ့မှုအတွက် ပြန်လည်တောင်းပန်ခဲ့သည်ဟု သိရသည်။

ကင်မ်မူဆန်မှာ အာဏာရ ကွန်ဆာဗေးတစ်ပါတီ Saenuri ၏ ခေါင်းဆောင်တစ်ဦးလည်း ဖြစ်ပြီး ၂၀၁၇ ခုနှစ် ဒီဇင်ဘာရွေးကောက်ပွဲတွင် အနိုင်ရမည်ဟု ရေပန်းစားနေသူလည်း ဖြစ်သည်။ ၎င်းမှာ သောကြာနေ့မနက်ပိုင်းက ဆိုးလ်မြို့ရှိ ချို့တဲ့သူများအား ကူညီသည့် အခမ်းနားတစ်ခုတွင် အာဖရိကကျောင်းသားတစ်ဦး၏ အသားအား မီးသွေးနှင့်တူသည်ဟု အရွှန်းဖောက်ပြောဆိုခဲ့ခြင်းဖြစ်သည်။

ထိုသို့ပြောကြားမှုကြောင့် ကင်မ်မူဆန်မှာ ကျယ်ကျယ်ပြန့်ပြန့် ဝေဖန်ရှုတ်ချခြင်း ခံခဲ့ရပြီးနောက် ယခုကဲ့သို့ ပြန်လည်တောင်းပန်ခဲ့ခြင်းဖြစ်သည်။

“ဒီလိုနည်းလမ်းမျိုးနဲ့ ရင်းနှီးမှုကို ပြသတာဟာ တစ်ဦးတစ်ယောက်ကို နာကျင်ခံစားရလိမ့်မယ်လို့ ကျွန်တော် မထင်ခဲ့ပါဘူး။ ကျွန်တော် အနူးအညွတ်တောင်းပန်ပြီး အဲဒီအတွက်လည်း ဆင်ခြေမပေးချင်ပါဘူး။ ကျွန်တော် ကျွန်တော် စိတ်ရောကိုယ်ပါ တောင်းပန်ပါတယ်” ဟု ယမန်နေ့က ၎င်း၏ Facebook စာမျက်နှာတွင် ရေးသားတောင်းပန်ခဲ့သည်။

အဆိုပါ အကူအညီပေးရေး အခမ်းအနားတွင် နိုင်ငံပေါင်း ၂၇ နိုင်ငံမှ ကျောင်းသား ၄၀ ခန့်နှင့် Saenuri ပါတီမှ လူငယ်အဖွဲ့ဝင် ၅၀ လည်း တက်ရောက်ခဲ့သည်။

“မင်းရဲ့မျက်နှာက မီးသွေးခဲနဲ့တူတယ်” ဟု အသက် ၆၄ နှစ်ရှိ ကင်မ်မူဆန်က နိုက်ဂျီရီးယား ကျောင်းသား ဘာဘာလိုလာ ဂျိုရှူဝါ အဒီကူနီအား ရယ်မော၍ ပြောဆိုခဲ့သည်။ အဒီကူနီကမူ ထိုကိစ္စအတွက် အပြစ်မတင်ဟု ဆိုသည်။

“ဒါကို ကျွန်တော်က တစ်ခြားအဓိပ္ပါယ် မကောက်ပါဘူး။ သူက နောက်တာပါ။ ရယ်ရယ်မောမောနဲ့ ပြောဆိုခဲ့တာပါ။ ကျွန်တော်က လူမည်းပဲ။ ဒါက ရှက်စရာမှမဟုတ်တာ” ဟု Focus News သို့ အဒီကူနီက ပြောကြားခဲ့သည်။

ကင်မ်က ၎င်းအား တောင်းပန်သင့်လားဟု မေးမြန်းရာတွင် ၎င်းက “ကိစ္စမရှိပါဘူး” ဟု ကိုရီးယားဘာသာစကားဖြင့် ပြန်လည်ဖြေကြားခဲ့သည်။ ၎င်းမှာ တောင်ကိုရီးယားအစိုးရ၏ ပညာသင်ဆု အစီအစဉ်ဖြင့် ဆိုးလ်ရှိ တက္ကသိုလ်တစ်ခုတွင် ပညာသင်ကြားနေသူဖြစ်သည်။

Ref: Aljazeera