ဇင်ဘာဘွေက တရုတ် “ယွမ်” ငွေကို တရားဝင်ငွေကြေးအဖြစ် သတ်မှတ်မည်

ဒီဇင်ဘာ ၂၄၊ ၂၀၁၅
M-Media

– အာဖရိကနိုင်ငံတစ်ခုဖြစ်သော ဇင်ဘာဘွေမှာ တရုတ်ယွမ်ငွေကို နိုင်ငံ၏ တရားဝင်ငွေကြေးအဖြစ် သုံးစွဲမည်ဖြစ်ပြီး အပြန်အလှန်အားဖြင့် တရုတ်ကလည်း အကြွေး ကန်ဒေါ်လာ သန်း ၄၀ ကို ပယ်ဖျက်ပေးမည်ဟု သိရသည်။

လူ့အခွင့်အရေးချိုးဖောက်မှုများကြောင့် အနောက်နိုင်ငံများက ကျဉ်ထားသော ဇင်ဘာဘွေတွင် တရုတ်မှာ အကြီးမားဆုံး ရင်းနှီးမြှုပ်နှံသူ ဖြစ်လာခဲ့သည်။ ထို့ပြင် ဇင်ဘာဘွေမှာ ၁၉၉၉-၂၀၀၈ ကာလအတွင်း ဆိုးရွားစွာ စီးပွားရေးကျဆင်းခဲ့မှုမှ ဦးမော့ရန် ရုန်းကန်နေရပြီး ထိုအကြောင်းအရင်းကြောင့်ပင် ၎င်းတို့၏ ကိုယ်ပိုင်ငွေကြေးကို စွန့်ပယ်ရန် အကြောင်းအရင်းဖြစ်စေခဲ့သည်။

ဇင်ဘာဘွေဘဏ္ဍာရေးဝန်ကြီး ပက်ထရစ် ချီနာမာဆာကမူ ကြေငြာချက်တစ်စောင် ထုတ်ပြန်ခဲ့ပြီး ယွမ်ငွေကြေး အသုံးပြုမှုမှာ “တရုတ်နှင့် ဇင်ဘာဘွေအကြား ကုန်သွယ်ရေးလုပ်ဆောင်ချက်တစ်ခုနှင့် ဇင်ဘာဘွေရှိ စားသုံးသူများကြား လက်ခံနိုင်မှုတစ်ရပ် ဖြစ်လာမည်” ဟု ပြောကြားခဲ့သည်။

လွန်ခဲ့သော ငါးနှစ်အတွင်း ဇင်ဘာဘွေမှာ တရုတ်ထံမှ အတိုးနည်းချေးငွေ ဒေါ်လာ ၁ ဘီလီယံ လက်ခံရရှိခဲ့ပြီး တောင်အာဖရိကအပြီး တရုတ်၏ ဒုတိယအကြီးဆုံး ကုန်သွယ်ဖက်နိုင်ငံ ဖြစ်လာခဲ့သည်။

“သူတို့ (တရုတ်) က ဒီနှစ်မှာ ဆပ်ရတော့မယ့် ကျွန်တော်တို့ရဲ့ အကြွေးတွေကို လျော်ပေးမယ်လို့ ပြောပါတယ်။ ကျွန်တော်တို့ကလည်း အကြွေးတွေကို နောက်ဆုံးအနေနဲ့ တွက်ချက်နေပါတယ်” ဟု ချီနာမာဆာက ပြောကြားခဲ့သည်။

ဇင်ဘာဘွေရှိ လေ့လာဆန်းစစ်သူတစ်ဦးကမူ ယွမ်ငွေမှာ လွန်ခဲ့သည့် ၂ နှစ်ကပင် ဇင်ဘာဘွေ၌ တရားဝင်ငွေကြေး ဖြစ်နေခဲ့သည်ဟု ပြောကြားခဲ့သည်။ တရုတ်နိုင်ငံမှာ ဇင်ဘာဘွေ၏ သံယဇာတများကို အမြတ်ထုတ်နေသည်ဟု စွပ်စွဲခံထားရသည်။

Ref: Aljazeera