ဘရက်ဒလေနှင့်ပွဲပြီးလျှင် အနားယူတော့မည်ဟု လက်ဝှေ့ကျော် ပက်ကွီအို ပြော

ဇန်န၀ါရီ ၆၊ ၂၀၁၆
M-Media

– ဧပြီ ၉ ရက်နေ့တွင် တီမိုသီ ဘရက်ဒလေနှင့် ထိုးသတ်ပြီးနောက် မိမိမှာ လက်ဝှေ့လောကမှ အနားယူတော့မည်ဟု ဖိလစ်ပိုင်လက်ဝှေ့ကျော် မန်နီ ပက်ကွီအိုက ပြောကြားလိုက်သည်။

လက်စ်ဗီးဂက်စ်တွင် ထိုးသတ်မည့် ထိုပွဲမှာ ပက်ကွီအိုနှင့် ဘရက်ဒလေတို့၏ တတိယအကြိမ်မြောက် တွေ့ဆုံမှု ဖြစ်မည်ဖြစ်သည်။ ဗြိတိန်လက်ဝှေ့ကျော် အမီးရ်ခန်းကမူ ပက်ကွီအိုနှင့် ထိုးသတ်ရန် ကြိုးစားခဲ့သော်လည်း မအောင်မြင်ခဲ့ဘဲ ပက်ကွီအိုက ယခုကဲ့သို့ ကြေငြာမှုကြောင့် ၎င်းတို့နှစ်ဦး တွေ့ဆုံရန် မျှော်လင့်ချက်မှာ ပျက်ပြယ်သွားပြီဖြစ်သည်။

ပက်ကွီအို၏ ပွဲစီစဉ်သူ ဘော့ဘ်အာရမ်ကမူ ပက်ကွီအိုမှာ ဘရက်ဒလေနှင့် ထိုးသတ်ပြီးနောက်ပိုင်း ကြိုးဝိုင်းအတွင်းတွင် ဆက်ရှိနေဦးမည်ဟု စောစောပိုင်းက ပြောကြားခဲ့သော်လည်း ပက်ကွီအိုက ငြင်းပယ်ခဲ့သည်။

“ကျွန်တော့်ရဲ့ နိုင်ငံရေးနယ်ပယ်မှာ အာရုံစိုက်ဖို့အတွက် လက်ဝှေ့ကနေ အနားယူတော့မှာပါ။ တီမိုသီ ဘရက်ဒလေနဲ့ ထိုးသတ်မှုဟာ နောက်ဆုံးဖြစ်မှာပါ။ အရင်က ဒီလို ကျွန်တော် မပြောခဲ့ဖူးပါဘူး။ ဘယ်သူကမှလည်း ဒါနဲ့ပတ်သက်ပြီး ကျွန်တော့်ကို မဗျူးခဲ့ဘူးလေ။ ဧပြီ ၉ ရက်နေ့ပွဲ ပြီးတဲ့နောက်မှာ ကျွန်တော် အနားယူသွားမှာပါ” ဟု ပက်ကွီအိုက ပြောကြားခဲ့သည်။

၂၀၁၂ ခုနှစ်က ဘရက်ဒလေနှင့်တွေ့ဆုံမှုတွင် ဒိုင်လူကြီး၏ အငြင်းပွားဖွယ် ဆုံးဖြတ်ချက်ဖြင့် ပက်ကွီအိုက ရှုံးနိမ့်ခဲ့ပြီး နောက်ထပ် ၂ နှစ်အကြာတွင် ဘရက်ဒလေအား ပက်ကွီအိုက အလွယ်တကူပင် အနိုင်ရခဲ့သည်။

Ref: Dailymail