ဆီးရီးယားတွင် ဆာရင်းဓာတ်ငွေ့ အသုံးပြုခဲ့ဖွယ်ရှိသည်ဟု ကုလဆို

ဇန်န၀ါရီ ၇၊ ၂၀၁၅
M-Media

– အာရုံကြောသေစေနိုင်သည့် ဆာရင်းအဆိပ်ဓာတ်ငွေ့ကို ဆီးရီးယားတွင် အသုံးပြုနေသည်မှာ ဖြစ်နိုင်ချေရှိကြောင်း ကုလသမဂ္ဂ လက်နက်ဖျက်သိမ်းရေး အကြီးအကဲက ကင်ဝွန်ဆူးက လုံခြုံရေးကောင်စီသို့ ပြောကြားလိုက်သည်။

ဓာတုလက်နက်ဟန့်တားရေးအဖွဲ့ (OPCW) မှ နောက်ဆုံးအစီရင်ခံချက်အပေါ် လုံခြုံရေးကောင်စီက တံခါးပိတ် ဆွေးနွေးခဲ့ပြီး၊ ဓာတုလက်နက် အသုံပြုသည်ဟု သတင်းထွက်ပေါ်နေသော နေရာ ၁၁ နေရာကို OPCW စုံစမ်းရေးအဖွဲ့များက သွားရောက်ကြည့်ရှုကာ သွေးနမူနာများအား စစ်ဆေးမှုအရ တစ်ဦးတစ်ယောက်ချင်းစီတွင် အဆိပ်ငွေ့ သို့မဟုတ် အဆိပ်ငွေ့ကဲ့သို့ ပစ္စည်းများပါဝင်သည့် ဓာတုလက်နက်များနှင့် ထိတွေ့မှုကို ဖော်ပြနေသည် ဟု လုံခြုံရေးကောင်စီသို့ တင်သွင်းသော အစီရင်ခံစာတွင် ဖော်ပြထားသည်။

“ဒီလိုထိတွေ့မှုဟာ ဘယ်အချိန်၊ ဒါမှမဟုတ် ဘယ်လိုအခြေအနေမှာ ဖြစ်ပျက်ခဲ့သလဲဆိုတာ ဆုံးဖြတ်ဖို့အတွက် စုံစမ်းစစ်ဆေးမှုတွေ ထပ်လုပ်ဖို့ လိုအပ်ပါတယ်” ဟု အဆိုပါ အစီရင်ခံစာက ဆိုသည်။

OPCW အနေဖြင့် အချက်အလက်ရှာဖွေမှုလောက်သာ ပြုလုပ်ခဲ့သော်လည်း ကုလလုံခြံရေးကောင်စီကမူ သြဂုတ်လက ဆီးရီးယားစစ်ပွဲအတွင်း ဓာတုလက်နက်များဖြင့် တိုက်ခိုက်မှုအတွက် အပြစ်ရှိသူများကို စုံစမ်းဖော်ထုတ်ရန်ကျွမ်းကျင်ပညာရှင် အဖွဲ့တစ်ခုကို ဖွဲ့စည်းခဲ့သည်။

OPCW ၏ ပြောရေးဆိုခွင့်ရှိသူ မာလစ်ခ် အီလာဟီက သွေးနမူနာများ ထပ်မံစမ်းသပ်ရန် မည်သည့်ရုပ်အလာင်းအား အသုံးပြုရမည်ကို မဆုံးဖြတ်ရသေးကြောင်း ပြောကြားခဲ့သည်။

အတိုက်အခံ ဆီရီးယားအမျိုးသားမဟာမိတ်အဖွဲ့က ဒမတ်စကတ်မြို့ဆင်ခြေဖုံးရှိ အစိုးရတပ်များ တပ်စွဲထားသော မိုအာဒါမီယာတွင် ပြီးခဲ့သည့်လက ဓာတုလက်နက်ဖြင့် တိုက်ခိုက်မှုဟု သံသယရှိသည့် ကိစ္စကိုလည်း အလျင်အမြန် စုံစမ်းဖော်ထုတ်ပေးရန် တိုက်တွန်းပြောကြားလိုက်သည်။

ဓာတုလက်နက်သုံးစွဲမှုနှင့်ပတ်သက်၍ အတိုက်အခံများက သမ္မတအာဆတ်၏တပ်ကို အပြစ်တင်စွပ်စွဲခဲ့သော်လည်း ဆီးရီးယားအစိုးရက စွပ်စွဲမှုကို ငြင်းပယ်၍ သူပုန်အဖွဲ့များနှင့် ISIS အဖွဲ့တို့ကို အပြစ်ပုံချခဲ့သည်။

Ref: Al-jazeera