ကမ္ဘာ့လိုက်ဝယ်သာဝိတ်ချန်ပီယံ ကရောဖို့ဒ် ချန်ပီယံ ကာကွယ်ပွဲ ထိုးသတ်မည်

ဇန်န၀ါရီ ၇၊ ၂၀၁၅
M-Media

– ပက်ကွီအိုနှင့် ထိုးသတ်ရန် အားခဲထားသော်လည်း ဖြစ်မလာခဲ့သောကြာင့် အမေရိကန် နာမည်ကြီး လက်ဝှေ့သမား တာရန့်စ် ကရောဖို့ဒ်မှာ ဟန့်လန်ဒီနှင့် လာမည့်လတွင် ချန်ပီယံဘွဲ့ ကာကွယ်ပွဲကို ထိုးသတ်သွားမည်ဟု ပြောကြားလိုက်သည်။

ကမ္ဘာ့ လိုက်ဝယ်သာဝိတ်ချန်ပီယံ ကရောဖို့ဒ်မှာ ပက်ကွီအိုနှင့်ထိုးသတ်ရန် မျှော်လင့်ထားခဲ့သော်လည်း ဖိလစ်ပိုင်လက်ဝှေ့ကျော်မှာ ၎င်း၏ ပြိုင်ဘက်ဟောင်း တီမိုသီ ဘရက်ဒလေနှင့် ထိုးသတ်ရန် ရွေးချယ်ခဲ့သောကြောင့် ကရောဖို့ဒ်မှာ မျှော်လင့်ချက်မပြည့်ဝခဲ့ပေ။

WBO ချန်ပီယံကာကွယ်ပွဲအဖြစ် တစ်နိုင်ငံတည်းသား ဟန့်လန်ဒီနှင့် ထိုးသတ်မည့် ကရောဖို့ဒ်၏ ထိုပွဲမှာ လာမည့် ဖေဖော်ဝါရီ ၂၇ ရက်နေ့တွင် Madison Square Garden ၌ ပြုလုပ်သွားမည်ဖြစ်သည်။

အမေရိကန်၏ တက်သစ်စ လက်ဝှေ့သမားဟု နာမည်ကြီးနေသည့် ကရောဖို့ဒ်မှာ ၀ိတ်တန်းနှစ်ခု ချန်ပီယံဖြစ်ပြီး ၂၇ ပွဲ ထိုးသတ်ပြီးရာတွင် ရှုံးပွဲမရှိဘဲ ၁၉ ပွဲကို အလဲထိုးနိုင်ခဲ့သည်။ နောက်ဆုံးပွဲမှာ နိုဝင်ဘာလတွင် ဒီယာရီ ဂျင်းနှင့် ထိုးသတ်ခဲ့သည့်ပွဲဖြစ်ပြီး ၁၀ ချီမြောက်တွင် အလဲထိုးနိုင်ခဲ့သည်။

Ref: Dailymail