ပါလက်စတိုင်းမြေပေါ်တွင် အစ္စရေးက မြို့သစ်တည်မည်

ဇန်န၀ါရီ ၈၊ ၂၀၁၆
M-Media

– အစ္စရေးစစ်တပ်က မီးရှို့ဖျက်ဆီးထားသော ပါလက်စတိုင်းရွာနှစ်ခုတွင် မြို့သစ်တစ်ခု တည်ဆောက်ရန် အစ္စရေးအစိုးရက အတည်ပြုခဲ့သည်ဟု သိရသည်။

ဗုဒ္ဓဟူးနေ့တွင် ထုတ်ပြန်ခဲ့သော ကြောငြာချက်၌ အစ္စရေးဝန်ကြီးချုပ် ဘင်ဂျမင်နေတန်ယာဟုက မြို့သစ်နှင့်ပက်သက်၍ “ဒရုဇ်လူမျိုးတွေအတွက် စီးပွားရေး၊ လူမှုရေးအကျိုးဖြစ်ထွန်းစေမည်” ဟု ပြောကြားခဲ့သည်။ ထို့ပြင် ယခုမြို့သစ်မှာ ၁၉၄၈ ခုနှစ် အစ္စရေးနိုင်ငံ တည်ထောင်ကတည်းက ဒရုဇ်လူမျိုးများအတွက် ပထမဆုံးတည်ဆောက်မည့်မြို့ ဖြစ်မည်ဟု ဆိုသည်။

ထိုသို့ ဆောက်လုပ်ပေးခြင်းမှာ အစ္စရေးစစ်တပ်တွင် ရာခိုင်နှုန်းအမြင့်ဆုံးပါဝင်ပြီး နိုင်ငံရေးတွင်လည်း အရေးပါသည့် ဒရုဇ်လူမျိုးများကို ပေးထားသောကတိအား ဖြည့်ဆည်းပေးခြင်းဖြစ်ဟု နေတန်ယာဟုက ထည့်သွင်းပြောကြားခဲ့သည်။

ယခုတည်ဆောက်မည့်မြို့မှာ ၁၉၄၈ ခုနှစ်က ဖျက်ဆီးခံထားရသည့် ဟစ်တင်နှင့် နမ်ရင်းဟုခေါ်သော ပါလက်စတိုင်းရွာနှစ်ရွာ၏ မြေပိုင်နက်တွင် ဖြစ်သည်။

သို့သော်လည်း ဒရုဇ်လူမျိုးများမှာ ထိုလုပ်ရပ်ကို ဝေဖန်ခဲ့ကြသည်။ ဒရုဇ်လူမျိုးများ၏ ဘာသာရေးခေါင်းဆောင်ရှိခ်မူဝါကဖ် တာရီဖ်ကမူ အဆိုပါဆုံးဖြတ်ချက်အပေါ် များစွာအံ့သြမိသည်ဟု ပြောကြားခဲ့ကြောင်း ၎င်းနှင့်နီးစပ်သည့် ရင်းမြစ်ကို ကိုးကား၍ အစ္စရေးနေ့စဉ်သတင်းစာတွင် ရေးသားခဲ့ကြသည်။

“ကျွန်တော်တို့ ဒရုဇ်တွေ ဒီလိုကိစ္စမျိုးကို လက်မခံနိုင်ပါဘူး” ဟု အငြိမ်းစားရဲအရာရှိ ခါလီလ် ဟာလာဘီက ပြောကြားခဲ့သည်။ “ဒရုဇ်ရွာတွေရဲ့ အနီးအနားဝန်းကျင်မှာ ဖွံ့ဖြိုးရေးလုပ်လို့ရတဲ့ မြေတွေ အမြောက်အများရှိပါတယ်”

ပါလက်စတိုင်းပိုင် အနောက်ဘက်ကမ်းနှင့် အရှေ့ဂျေရုစလင်ကို အစ္စရေးက သိမ်ယူပြီ ဆောက်လုပ်ထားသည့် တရားမ၀င်အိမ်ယာများတွင် နေထိုင်သူ ဂျူးများမှာ သန်းဝက်ကျော် ရှိနေသည်။ ကုလသမဂ္ဂနှင့် နိုင်ငံအများစုကမူ အစ္စရေး၏ ထိုကဲ့သို့ ကျူးကျော်နေထိုင်မှုကို တရားမ၀င်ဟု သတ်မှတ်ထားသည်။

Ref: Presstv